Wjes Lipiny trjeba wjac žiwjenskeje kwality a zwisk k turizmej

Lipiny (AK/SN). Wobydlerjo Lipin (Lippen) we Łazowskej gmejnje čuja so zabyći. Po tym zo bě tam 2010 a 2012 k zesuwanjam zemje dóšło – zapadnje wsy běchu so něhdźe 1,3 hektary płoniny sadźili – bě Łužiska a srjedźoněmska towaršnosć hórnistwoweho zarjadnistwa (LMBV) po dorěčenju ze zamołwitymi šěroke pasmo zawrěć dała. Hišće dźensa je něhdźe 2 000 hektarow mjez Lipinami a Łazom zaraćenych. „Zawrjenje bě hłuboki zarěz do žiwjenskeje kwality. To hač do dźensnišeho začuwamy“, měnitaj Christa a Hans Domšec. „Wot lěta 2010 je něhdźe pjeć kilometrow dołha kolesowarska šćežka mjez Lipinami a Łazom začinjena. Nimamy hižo direktny zwisk do Łaza.“ Šulske dźěći běchu šćežku jako šulski puć wužiwali, seniorojo podawachu so po njej k nakupowanju abo k lěkarjej. Tež turisća-kolesowarjo rady po šćežce jězdźachu. Podłu njeje informuja zdobom wo stawiznach bywšeje jamy Łaz III, čehoždla zhubichu w lětach 1960 do 1964 zapadny dźěl wsy. 195 wobydlerjow – dwě třećinje wjesneje ludnosće – tehdy přesydlichu, mjez druhim stachu so tež jednaće hatow z woporom brunicy.