Wolfganga Kotiseka znaje wjetšina jako kulturnika Slepjanskeho serbskeho folklorneho ansambla kaž tež jako hrajerja na dudach a huslerja. Wón pak ma tež hišće cyle hinaši hobby.
Slepo (JoS/SN). Nowa wustajeńca w Slepjanskim (SKC) Serbskim kulturnym centrumje wěnuje so wot minjeneho pjatka domjacemu swětej pawkow. Widźeć je tam nimale 120 fotow, kotrež je Wolfgang Kotisek z Brězowki fotografował. Pawki su druhi wulki hobby 67lětneho, kiž je čłon předsydstwa Slepjanskeho folklorneho ansambla a so w nim předewšěm wo instrumentalny dorost stara. Hižo w šulskim času so wón za přirodu zajimowaše. Po studiju wučerstwa swoju wědu z fachowej literaturu rozšěrješe. Ze spočatkom digitalnych kamerow so lěta 2003 tež fotografowanje přidruži. Dźensa wobsedźi Wolfgang Kotisek wjacore kamery z wotpowědnym wuhotowanjom. W SKC wustajene wobrazy pawkow je wón wšitke na swojej priwatnej ležownosći w Brězowce fotografował. 68 družin je tam zapopadnył. Mjeztym ma wón tež fotowu datowu banku jednotliwych družin pawkow.