Sakski ministerski prezident na prašenja wobydlerjow wotmołwjał
Trjebin (AK/SN). Sakska wuznawa so k dojednanemu planej naprawow za gmejnje Slepo a Trjebin, kotryž su swobodny stat, Zhorjelski krajny rada, wobaj wjesnjanostaj a LEAG w meji 2017 podpisali. Nětko dyrbja jón zwoprawdźić. To podšmórny sakski ministerski prezident Michael Kretschmer (CDU) na wčerawšim wobydlerskim zarjadowanju w Trjebinje. Něhdźe 250 zajimcow bě do sportownje přišło. Do toho wuradźowaštej Slepjanska a Trjebinska gmejnska rada hromadźe z ministerskim prezidentom njezjawnje wo přesydlenju Miłoraza, wo škiće před haru a prochom kaž tež wo wohnjowych woborach Slepjanskeje gmejny.