Wjace hač jednu miliardu eurow wopřijima dwójny etat Budyskeho wokrjesa za lěće 2019 a 2020. Wokrjesny sejmik je jón wčera jednohłósnje wobzamknył. Hačrunjež socialne wudawki woteběraja, wostanu wone najwjetša pozicija.
Budyšin (SN/at). Schwalenje etata je tež za Budyski wokrjesny sejmik wjeršk, a k jeho wobzamknjenju su so krajny rada kaž tež frakciscy předsydźa słowa jimali. Wuslědkowy budget wučinja klětu kaž tež lěto pozdźišo 510 milionow eurow, rjekny Budyski krajny rada. 30 procentow z toho, něhdźe 150 milionow eurow, je za jobcenter, zo móže wokrjes nadawki opciskeje komuny w swójskej zamołwitosći za dołhodobnje bjezdźěłnych a přijimarjow zakładneho zawěsćenja spjelnić. Před pjeć lětami bě podźěl za jobcenter hišće 45 procentow. To mjenowaše krajny rada někotre nahladne strukturne daty. Wokrjesny wotedawk, kotryž płaća města a gmejny, wostanje dale 32 procentow, njedóńdźe-li k budgetnym rizikam. „Wón słuša sobu k najmjeńšim popłatkam přirunujo z cyłej Sakskej. Z widom na wočakowane wuwiće kóštow njeje to samozrozumliwosć“, Harig podšmórny.