Do noweho lěta pućowali

pjatk, 04. januara 2019
artikl hódnoćić
(0 )
Něhdźe 150 ludźi z Bóščanskeje gmejny wobdźěli so minjenu wutoru na nowo lětnym hwězdnym pućowanju do Noweje Jaseńcy.  Foto: Marija Šmitowa Něhdźe 150 ludźi z Bóščanskeje gmejny wobdźěli so minjenu wutoru na nowo lětnym hwězdnym pućowanju do Noweje Jaseńcy. Foto: Marija Šmitowa

Bóšicy (MŠm/SN). W Bóščanskej gmejnje su wobydlerjo lěto 2019 na wosebite wašnje witali. Dobreho wothłosa minjeneho lěta dla přeprosy wjesnjanosta Stanij Ryćer (Bóščanske rjemjesło) na druhe hwězdne pućowanje. Wobdźělnicy po­dachu so ze štyrjoch městnow na pućowanske čary, kotrež běchu stajnje štyri do pjeć kilometrow dołhe. Tak nóžko­waše 150 ludźi z Jaseńcy, Bóšic, Wětrowa a z Hory do Noweje Jaseńcy.

Na pućowanskej čarje dyrbjachu ­wobdźělnicy kedźbować, dokelž měješe wjesnjanosta na kóncu mały kwis spřihotowany. Kóžda pućowanska čara wjedźeše­ nimo wosebiteho kamjenja, tak mjenowaneho Kralowsko-sakskeho triangulaciskeho dypka. Kamjeń steji­ při pólnym­ pućiku pola Hory. Je to jedyn z cyłkownje 125 tajkich dypkow w swobodnym staće. Dohromady bě jich w Sakskej raz 158 stacijow. Kralowsko-sakski triangulaciski dypk pola Hory eksistuje wot oktobra 1865.

Cil hwězdneho pućowanja bě nowe hrajkanišćo z hětu w Nowej Jaseńcy. Tam čakachu na wšitkich wobdźělnikow horce wino, dźěćacy punš kaž tohorunja pražena kołbaska z całtu.

wozjewjene w: Lokalka
Prošu přizjewće so, chceće-li komentar podać

nawěšk

nowostki LND