Formalny zmylk móhł so tež w druhich gmejnach jewić
Hodźij (CK/SN). Hospodarski plan 2019 je Hodźijska gmejnska rada na swojim wčerawšim posedźenju wobzamknyła. To běchu tež hižo na zašłym zetkanju w nowembru 2018 činili. Po wuprajenju komornicy Ines Henichoweje pak je wokrjesny dohladowanski zarjad při tym formalny zmylk zwěsćił. Dotal dyrbješe naćisk komunalneho etata sydom dźěłowych dnjow wupołoženy być. Na to mějachu wobydlerjo dalše sydom dźěłowych dnjow chwile znapřećiwjenja zapodać. Po změnje sakskeho gmejnskeho porjada pak je to hižo wot prěnjeho dnja wupołoženja móžno. To w Hodźiju wobkedźbowali njeběchu. A kaž wjesnjanosta Gerald Meyer (njestronjan) rjekny, drje njejsu při tym jenička gmejna. Dohladowanski zarjad měješe za trěbne, wobzamknjenje z nowembra cofnyć a etat znowa schwalić. Na tym tež ničo njezměni, zo nichtó z wobydlerjow do naćiska pohladnyć nochcyše a tež nichtó žane znapřećiwjenja zapodał njeje – ani do prěnjeho wobzamknjenja ani w druhim pospyće.