W třećim jednanskim kole móžachu so přistajeni Wojerowskeje ZooKultury srjedu na nowe tarify dojednać. Sobudźěłaćerjo zwěrjenca, měšćanskeho muzeja, biblioteki, hudźbneje šule a ludoweje uniwersity dóstanu wyšu mzdu.
Wojerecy (SN/mwe). Wróćo datowane bu mzda hladarjow Wojerowskeho zwěrjenca, přistajenych hudźbnych wučerjow Wojerowskeje hudźbneje šule, bibliotekarjow a dalšich sobudźěłaćerjow ZooKultury wot 1. januara 2019 wo dwaj procentaj zwyšena. Wot 1. januara 2020 budu to hišće raz tři procenty wjace. Wukubłacy powšitkownowužitneho předewzaća dóstanu wotpowědujo wukubłanskemu lětu zwyšenje 3,7 hač do 4,9 procentow. Dorěčenje płaći za časowu dobu 24 měsacow. Nowym tarifam pak ma Zwjazkowa tarifowa komisija dźěłarnistwa ver.di hišće přihłosować.