Zabawny a wědu šěrjacy kulinariski wječor

wutora, 12. februara 2019
artikl hódnoćić
(0 )
Sven Bogacz je jako spěwytwórc Folkskammer „Kulinarisku jězbu po swěće łužiskich  bajow“ hudźbno-literarnje wobrubił.  Foto: Ulrike Herzger Sven Bogacz je jako spěwytwórc Folkskammer „Kulinarisku jězbu po swěće łužiskich bajow“ hudźbno-literarnje wobrubił. Foto: Ulrike Herzger

Čorny Chołmc (UH/SN). Zabawny a wědu šěrjacy wječor dožiwichu minjeny pjatk wopytowarjo hosćenca „Dom młynka“ w Čornochołmčanskim Krabatowym młynje. Pod hesłom „Kulinariska jězba po swěće łužiskich bajow“ čakaše hosćina ze za region typiskimi jědźemi a napojemi na wobdźělnikow.

Přestawkam mjez pojědźemi menija da němsko-serbski spěwytwórc Sven Bogacz alias Folkskammer prawy słód. Tak předstaji wón baje a legendy z Błótow a zaspěwa wot nich inspirowane swójske pěsnje. Nimo toho hosćo zhonichu, zo su błótowske domy ze sćinu (Ried) kryte a čehodla su mnohe z nich z hadźacej hłowu na třěše pyšene.

Bogacz, kiž powołansce jako policist dźěła, pěstuje swój hobby „lubosće k serbskej domiznje dla“. Wažny wliw wukonješe na njeho folklorna hudźba, kotruž bě na Podstupimskej „Irish traditional session“ zasłyšał. Rady wustupuje w smužkatej módro-běłej košli z čerwjenymi slemi, zo by tak serbske narodne barby prezentował.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND