Město Wojerecy chce Šibojski jězor turistisce dale wuwiwać

Wojerecy (AK/SN). Zapadny přibrjóh Šibojskeho­ jězora chcedźa turistisce dale wuwiwać. To podšmórny twarski zamołwity města Wojerecy Dietmar Wolf na zašłym posedźenju měšćanskeje rady. Jeho­ čłonojo naćiskej za přichodne turistiske wuwiće zasadnje přihłosowachu.

Jedyn z hłownych dypkow je, zo ma při Šibojskim jězoru nowy hotel wyšeje kategorije nastać. W nadawku měšćanskich radźićelow ma wyši měšćanosta Stefan Skora (CDU) jednanja k załoženju wobsedźerskeje towaršnosće wjesć. Jako inwestor wustupuje po wšej Němskej aktiwna Hamburgska hotelowa skupina RIMC. Za wuwiće projekta a twarske planowanje ma předewzaće HHiG ze Schleswigsko-Holsteinskeho Hemdingena zamołwite być. „We 28 lětach je so RIMC wo nimale 30 projektow starała. Firma ma 2 400 sobudźěłaćerjow“, Wolf rozłoži.