Za lětuše gmejnske rady 22 žonow w zarjadniskim zwjazku kandiduje

26. meja je dźeń europskich a komunalnych wólbow. W małym rjedźe předstaja Serbske Nowiny konstelacije za wólby gmejnskich radow. Započinamy dźensa z komunami w zarjadniskim zwjazku Při Klóšterskej wodźe.

Pančicy-Kukow (SN/at/BŠe). W gmejnach Ralbicy-Róžant, Njebjelčicy, Pančicy-Kukow, Chrósćicy a Worklecy su dwě stronje a wólbne zjednoćenstwa 118 kandidatow a kandidatkow nominowali. To je jědnaće wjace hač před pjeć lětami. Wosebje zwjesela přirost kandidatkow wo dźesać na 22. Tu steja Serbske wolerske zjednoćenstwo Worklecy ze štyrjomi žonami kaž tež Swobodni wolerjo gmejny Chrósćicy a gmejnski zwjazk CDU Ralbicy-Róžant po třoch na čole.

W Ralbicach-Róžeńće nastupi Swobodne wolerske zjednoćenstwo „Delany“ ze 14 wosobami (minus 1 porno lětu 2014), z nich je jedna žona (-1). Sedmjo su nowačcy. Tamniši zwjazk CDU ma tři žony mjez dwanaće kandidatami (+1). „Šesćo so scyła prěni raz a dźewjećo so jako njestronjenjo wo mandat CDU požadaja“, informuje tuchwilny radźićel Eduard Luhmann.