Mjez kandidatami Rakečanskeho gmejnskeho zwjazka CDU za wólby gmejnskeje rady 26. meje je tež muž, kiž so w serbskim towarstwje Bjesada a w ewangelskim cyrkwinskim towarstwje angažuje: dr. Günter Holder. 67lětny rentnar dźěłaše w swojim powołanskim žiwjenju jako inženjer za elektrotechniku, mjez druhim w Kamjenjanskej kaolinowni.
Towarstwo Bjesada je Günterej Holderej wažne městno skutkowanja. Čłonojo so měsačnje zetkawaja, zo bychu serbšćinu nałožowali. Sam ju Rakečan wot lěta 2010 wuknje, mjez druhim na Budyskej ludowej uniwersiće. Byrnjež z ryzy serbskeje swójby pochadźał, njeběchu tam maćeršćinu mjez sobu hižo wužiwali. Bjesada je tuž srjedźišćo tym, kotřiž so za serbsku rěč zajimuja, nimaja pak składnosć, ju hewak nałožować. Na měsačne zetkawanja přichadźa něhdźe pjeć zajimcow, na wosebite wjerški hač do dwaceći. Rady wobdźělataj so na nich tež nowy wosadny farar Robert Malink a jeho mandźelska Jadwiga.
