„Swarjeć a so huntorić je lochko, něšto změnić pak doma w křesle sedźo njemóžeš. Nimo toho so dołho a rady na najwšelakorišich polach angažuju, wo skutkowanju w gmejnskej radźe sym hdys a hdys tež hižo rozmyslował. Jako so mje Clemens Škoda wopraša, hač nochcu na lisćinje Serbskeho wolerskeho zjednoćenstwa (SWZ) za komunalny parlament kandidować, njetrjebach sej tuž wulce hłowu łamać – ćim bóle, dokelž sym so mjeztym za to rozsudźił, doskónčnje tu wostać a sej takrjec we Łužicy swój statok stajić“, Beno Šołta motiwaciju za wukonjenje swojeho pasiwneho wólbneho prawa w Pančicach-Kukowje zjima.