Radwor (SN/MkWj). Lěkarske zastaranje we wjesnych kónčinach steješe w srjedźišću wobydlerskeho foruma, na kotryž bě wčera, srjedu, Radworska wjesna skupina CDU z Romanom Dźisławkom na čole přeprosyła. Něhdźe 20 zajimcow je přeprošenje sćěhowało.

W debaće so spěšnje pokaza, hdźe leži hłowny problem njedostatka wjesnych lěkarjow. „Žiwjenski wobraz młodeje generacije je so změnił. Młodźi medicinarjo chcedźa powołanske a swójbne žiwjenje lěpje zwjazać. Nimo toho je mnohim lěkarska samostatnosć a z tym zwjazana zamołwitosć přeriskantna. K tomu přińdźe přiběraca běrokratija“, rozłoži Christin Bartke z Budyskeje chorownje. Štož wona twjerdźeše, móžachu připosłucharjo najpozdźišo po wuwjedźenjach Ra­dworskeje lěkarki Moniki Liznarjoweje derje rozumić: Po napinacym tydźenju w lěkarskej praksy a domjacych wopytach po swjatoku syda wona kónc tydźenja za pisanskim blidom, zo by pisomne dźěło zrjadowała.