Młodostni pomoc z města dóstali

srjeda, 29. meje 2019
artikl hódnoćić
(0 )
Před kulisu Róžeńčanskeje cyrkwje rejwachu dźěći a młodostni minjenu sobotu k mejemjetanju, prjedy hač mužojo meju pomału dele wzachu.  Foto: Tomaš Šołta Před kulisu Róžeńčanskeje cyrkwje rejwachu dźěći a młodostni minjenu sobotu k mejemjetanju, prjedy hač mužojo meju pomału dele wzachu. Foto: Tomaš Šołta

Róžant (jh/SN). 17 porow pěstowarskich dźěći, šulerjow a młodźiny w starobje třoch do 17 lět – wšitke holcy w serbskej narodnej drasće – je so minjenu sobotu w Róžeńće na lětušim mejemjetanju, kotrež­ měli poprawom mejudelebraće mjenować, wobdźěliło.

Kaž hižo loni so Róžeńčanscy mužojo rozsudźichu meju ze žerdźemi zaso pomału dele wzać, zo njeby so wona wo­spjet złamała, a zo njeby so metalowa rynka wěnca wobškodźiła. Wšo to bě so jim minjene lěta mjenujcy někotre razy stało, dokelž padnje meja w hnadownym měsće při klasiskim mejemjetanju na twjerdy puć a na kromu granitoweho chódnika. Dalša wosebitostka lětsa bě, zo dyrbjachu tři hodźiny do mejemjetanja we wokolnych wsach a w Budyšinje wo pomoc prosyć, dokelž bě jedyn z rej­warjow-młodostnych krótkodobnje zastupny lisćik za pokalne finale RB Lipsk – FC Bayern Mnichow dóstał a do Berlina jěł. Na zbožo Budyšan Filip Budar při­praji a tak wodźělenje rejwarki zaruči. Tež z druhich wokolnych wsow a samo z Drježdźan běchu holcy a hólcy Róžeńčanam wupomhali a so wo nahladnu ličbu­ porow postarali.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND