Židźino (UH/SN). Wjeleličbny publikum je poprawom hižo zwoprědka zaručeny, hdyž Židźinske drastowe towarstwo prěnju njedźelu junija na swačinu na pólnej mjezy přeprošuje. Lětsa wšak telko wopytowarjow kaž hewak njebě, štož pak njezaležeše na programje, ale skerje na mnohich poskitkach samsny dźeń w bliskosći.

Po dujerskich muzikantach z Wjelceje witaše předsyda drastoweho towarstwa Uwe Schuster Židźinski chór pod nawodom Kerstin Lieder. Tón njezawjeseli publikum jeno z němsko-serbskim repertoirom, ale tež z humorom, jako spjelni plahowarjam hromaka na Horach jich přeće za „hromakowym spěwom“. Cyły spěw wšak to poprawom njebě, ale znajmjeńša štučka, kotruž je Kerstin Lieder z hromakom w ruce dirigowała. To so tež jednaćelej Horjanskeho agrarneho předewzaća Rolandej Nukej zalubi. Skónčnje přeprosy Židźinski chór hišće na zasowidźenje, a to 3. julija na wječorne spěwanje pod domjacym Měrowym dubom. Tam witaja lětsa jako hóstne ćěleso chór Lipa z Pančic-Kukowa.