Wobydlerjo Koslowa su w zašłosći časćišo z iniciatiwami za swoju wjes na so skedźbnili. Nětko zwoprawdźeja woni dalši projekt, wo kotrymž su hižo wjacore lěta rozmyslowali.
Koslow (JK/SN). Wjesny domicil „K žorawjej“ je Koslowčanam hižo tójšto lět spodobna městnosć zetkawanja. Tam su w zašłosći hižo někotryžkuli podawk zhromadnje woswjećili. Wjesnjenjo so tuž dołho njedlijachu a přimachu so gratu, jako rěkaše dom wobnowić a rozšěrić. W swójskej iniciatiwje zahajichu přitwar swojeho kulturneho srjedźišća. Za to prócowachu so wo spěchowanske srědki z programa Leader, kotrež jim po 75 procentach přizwolichu.
Petra Wowčerkowa, kotraž so w spěchowanskich naležnosćach derje wuznawa, je cyłkowne spěchowanje 32 000 eurow organizowała. 10 000 eurow Koslowčenjo sami zwjedźechu, štož su sej w běhu nimale dźesać lět nazběrali. Tak dołho hižo so z myslu noša swój wjesny dom powjetšić a wobnowić. Twarske dźěła derje postupuja a hruby twar je nimale zakónčeny.