Budyšin (SN). Składnostnje dnja wotewrjenych duri zaklinča jutře, sobotu, w Budyskej pišćeletwarskej firmje Hermann Eule prěnje zwuki nowych pišćelow za awlu Halleskeje Ewangelskeje wysokeje šule za cyrkwinsku hudźbu. „Normalnje su naše instrumenty zwjetša tak wulke, zo je hakle na městnje jako cyłk hromadźe twarimy. Tele pišćele z 23 registrami pak so natwarjene do našeje dźěłarnje hodźa“, praji jednaćelka Anne-Christin Eule. Wot 14 do 17 hodź. hraja na pišćelach studenća wysokeje šule za hudźbu Halle.