Koćina (aha/SN). Mjeztym druhe lěto nawjeduje André Szczepanski 23 čłonow wopřijacy Koćinski wjesny klub, kotryž je hłowny organizator wjesneho swjedźenja. Tón dožiwi wčera z kotołom pisaneho swój wjeršk. Volkmar Korch, Wiktorija Langec a Luiza Korchec su hosći serbsce a němsce witali. Přeprosychu jich do cirkusa a podachu so na pućowanje po Europje. Prěnja stacija bě Berlin, hdźež chcychu sej knježerstwowy cirkus hromadźe z kanclerku wobhladać. Ta pak přebywaše runje w Americe, zo by sej tam klawna wujednała. Cirkus poby dale w Moskwje, Parisu a dalšich stolicach. Do programa bě wjace hač 40 wobdźělnikow zapřijatych. Z nich běchu nimale połojca dźěći.

Tež sportowe wubědźowanja kóžde lěto na Koćinskim wjesnym swjedźenju přewjeduja. Koparski turněr dźewjeć mustwow dobychu Němčenjo před domjacymi hrajerjemi. Při kehelowanju doby mjez mužemi Andreas Mróz, najlěpša žona bě Monika Reineltowa. Mjez młódšimi dźěćimi bě Larisa Čórlichec najwuspěšniša, jeje bratr Niklas doby mjez trochu staršimi dźěćimi.