Lětuša bičwolejbulowa tura Radija Satkula je so 2. julija zahajiła. Hač do kónca awgusta hišće so mustwa na dohromady dźewjeć stacijach wubědźuja. W małej seriji jednotliwe hrajnišća předstajamy.
Kulow (SN/pdź). Jedna ze stacijow Satkula-bičtury běše před dwěmaj lětomaj Kulowc. Tam přichwata tehdy dźewjeć mustwow. Na kóncu přesadźi so Dwójna nula w finalnej hrě přećiwo Serbskej muri. Po jednym lěće přestawki zarjaduje Kulowska młodźina lětsa zaso staciju tury w swojej domiznje. Přichodnu póndźelu přeproša wšěch zajimcow do Kulowskeje lěsneje kupjele.
„Poprawom mějachmy planowane, zaso na hrajnišću w Kulowcu sportować“, rozprawja Wincenc Krječmar z Dubrjenka. „Tola tamniše hrajnišćo je wokomiknje w hubjenym stawje. Nimo toho maja w lěsnej kupjeli hnydom dwě bičwolejbulnišći.“