Wojerecy (SN). Wosebita informaciska tafla steji wot njedawna při klětce rapakow we Wojerowskej coologiskej zahrodźe. Wotkryłoj staj ju nawoda coowa Eugène Bruins a jednaćel Čornochołmčanskeho Krabatoweho młyna Tobias Čižik. Na tafli informuja wo wosebitej róli čornych rapakow w baji wo Krabaće a poručeja Krabatowy młyn wopytać a tam wjace wo dušnym serbskim kuzłarju zhonić.
Runočasnje wuhladaja wopytowarjo w Čornochołmčanskim młynje infotaflu wo rapakach a zhonja serbsce a němsce něštožkuli zajimaweho wo rozšěrjenju, picy a socialnym zadźerženju tohole ptaka. Nimo toho wopřijima tafla pokazku na to, zo móžeš žiwe rapaki we Wojerowskim zwěrjencu widźeć a zo dóstanješ so tam z kolesom a awtom runje tak kaž z direktnym busowym zwiskom měšćanskeje čary 1.