Pjeć procentow wjace njeskutkow – Mjenje kradnjenych awtow a kolesow
Zhorjelc (UM/SN). We wobłuku Zhorjelskeje policajskeje direkcije je kriminalita loni chětro přiběrała. Ličba přizjewjenych njeskutkow rozrosće wot 38 916 lěta 2013 na 41 027, to su 5,4 procenty wjace. Ćežišćo při tym je dale pomjezny region k Pólskej.
„Aktualne ličby njehodźa so porjeńšić“, wujasnja Conny Stiehl, nawoda Zhorjelskeje policajskeje direkcije, kotraž wopřijimuje Budyski a Zhorjelski wokrjes. „Rozrost kriminality wo pjeć procentow je chutna naležnosć a nas starosći.“ Přiwšěm Conny Stiehl warnuje połoženje dramatizować, wšako móžachu 58,1 procent wšěch padow wujasnić, štož je nad sakskim přerězkom (54,8).