Budyšin (CS/SN). K programej dnja Budyskeho měšćanskeho lěsa słuša wot wšeho spočatka zhromadne sadźenje štomikow. Tomu bě tež minjenu sobotu na 20. zarjadowanju tohole razu tak. Něhdźe 65 wobdźělnikow je 400 jědlow na Čornoboze sadźiło. Do toho pak dožiwichu hišće wosebitu sadźensku akciju. Wyši měšćanosta Christian Schramm (CDU) kaž tež jeho zastupjer, financny měšćanosta Michael Böhmer, podataj so bórze na wuměnk. Dokelž staj so wobaj stajnje za měšćanski lěs zasadźałoj, smědźeštaj kóždy z njeju wosom lět staru lipu sadźić. Wonej stejitej nětko napřećo pomjatnemu kamjenjej za filozofa Jakoba Böhmu. Christian Schramm skedźbni na to, zo je lipowe łopješko symbol dwurěčneje Łužicy.
Wobdźělnicy ekskursije zhonichu nimo toho wjele zajimaweho wo žnjach drjewa a wo jeho zwičnjenju. Tak móžachu při dźěle harvestera, drjewo žnějaceje mašiny, přihladować. Město Budyšin je wot lěta 1996 do 2013 ze swojeho měšćanskeho lěsa dobytk 1,5 milionow eurow docpěło.