Dołhemu rjadej štomow lěta, kotrež mjeztym w Lipju w Pančicach-Kukowje nadeńdźeš, je wčera popołdnju dalši k tomu přišoł. We wobłuku zahajenja sezony sadźichu tam pólny klon.
Pančicy-Kukow (SN/MWj). Po kónčkojtym klonje 1995 a hórskim klonje lěta 2009 je pólny hižo třeći klon, kotryž nětko přirodu w Lipju wobohaća. Tele a hišće dalše zajimawostki zhonichu wobdźělnicy kóždolětneje sadźenskeje akcije při klóšterskej muri wot nawody hornjołužiskeho lěsnistwoweho wobwoda Holma Karraßa. Sadźili su štom wčera zastupjerjej Budyskeje a Drježdźanskeje wokrjesneje lutowarnje Brigitte Richter a Helmar Frei, zapósłancaj zwjazkoweho sejma a Sakskeho krajneho sejma Marja Michałkowa a Alojs Mikławšk (wobaj CDU) a abatisa Philippa Kraft.
