Krótkopowěsće (26.11.20)

štwórtk, 26. nowembera 2020 spisane wot:

MSPI jutře w parlamenće

Berlin. Zwjazkowy sejm zaběra so na swojim jutřišim posedźenju z namjetomaj CDU/CSU a SPD kaž tež Zelenych nastupajo Europsku wobydlersku iniciatiwu „Minory SafePack“ (MSPI). Předmjet steji prěni raz na dnjowym porjedźe, wo nim maja zapósłancy direktnje wothłosować. Koaliciskej frakciji namołwitej knježerstwo namjety MSPI, dalokož Europska komisija je sćěhuje, bórze pruwowować. Zeleni žadaja sej, zo so knježerstwo za zaměry MSPI zasudźuje.

Połnej staciji korony dla

Budyšin. Z 260 nowymi koronainfekcijemi wostanje niwow w Budyskim wo­krjesu wysoki. Kaž krajnoradny zarjad wčera zdźěli, su aktualnje 2 199 schorjenych (+77), z nich 128 (+1) w klinice lěkuja, a dalšej smjertnej padaj. Wobě korona-staciji Budyskeje chorownje stej runje tak połnej kaž tamniša intensiwna stacija, hdźež maja dźesać korona-łožow, Serbski rozhłós dźensa rano rozprawješe.

Zawodny zakaz płaći

Krótkopowěsće (25.11.20)

srjeda, 25. nowembera 2020 spisane wot:

Próstwu wo pomoc stajili

Budyšin. Budyski wo­krjes pomha Marje-Marćinemu bydlenskemu zhromadźenstwu w Pančicach-Kukowje a Budyskemu domej Słónčny dwór dohladowanje pod přiwótřenymi wuměnjenjemi korony zaručić a prócuje so k tomu wo podpěru zwjazkoweje wobory. Wčera bě we wokrjesu 142 nowoinfekcijow z koronawirusom, dwaj pacientaj staj zemrěłoj. Wot aktualnje 2 122 (-16) schorjenych lěkuja 127 (+7) w klinikach.

Ze zhromadnym předewzaćom

Choćebuz/Janšojce. Připrawa za energetiske zwužitkowanje zarunanskich paliwow ma w industrijnišću Janšojskeje milinarnje nastać. K tomu stej LEAG a firma Veolia zhromadne přede­wzaće EVA Jänschwalde GmbH & Co. wutworiłoj, kaž energijowy koncern wčera zdźěli. Na nowej zhromadnej towaršnosći ze sy­dłom w Choćebuzu staj wobaj partneraj po połsta procentach wobdźělenej.

Ćahi we wuběžku spěšniše

Krótkopowěsće (24.11.20)

wutora, 24. nowembera 2020 spisane wot:

Myto do Njebjelčic

Drježdźany. Njebjelčansku firmu WeDa Metall GmbH su z Předewzaćelskim mytom 2020 wuchodoněmskeho zwjazka lutowarnjow wuznamjenili. Wona je přikład za mnohich, kotřiž běchu po wudyrjenju koronapandemije spěšnje jednali, zwjazk dźensa zdźěli. Předewzaće bě w nalěću započało wobswět njepoćežowace a lědma hladanja potrěbne desinfekciske sudobjo na wikach poskićeć.

Hladarnja jara potrjechena

Budyšin. Wot koronapandemije jara potrjechena je hladarnja we Łazu. Kaž Budyski krajnoradny zarjad wčera zdźěli, su tam 51 wot 62 wobydlerjow pozitiwnje testowali, 23 nich měješe za krótki čas sylne symptomy. Wobydlerka je wumrěła, pjeć je w chorowni. Dwanaće pacientow do kliniki njepřepołoža; móža jich po rozsudźe přisłušneho lěkarja w hladarni hojić. We wokrjesu bě wčera 15 nowoinfekcijow a sydom smjertnych padow.

Twarske prawo wukazane

Krótkopowěsće (23.11.20)

póndźela, 23. nowembera 2020 spisane wot:

Tróšku mjenje nowoinfekcijow

Budyšin. 391 nowych koronainfekcijow su wot minjeneho pjatka hač do wčerawšeho w Budyskim wokrjesu zwěsćili. Kaž krajnoradny zarjad zdźěli, je 2 130 schorjenych (+20), z kotrychž 107 (+13) stacionarnje lěkuja. W klinikach wokrjesa je 165 koronapacientow z wjacorych wo­krjesow, 29 z nich na intensiwnej staciji. W Zhorjelskim wokrjesu bě w samsnym času 361 dalšich natyknjenjow.

Na swoje dźěło skedźbniła

Budyšin. Z dwurěčnym nawěškom pod hesłom „Domizna je pola nas doma“ je Domowina sobotu we wosom lokalnych wudaćach tydźenika Wochenkurier w serbskim sydlenskim rumje Hornjeje a Delnjeje Łužicy na swoje dźěło za serbskosć jako tudyšu jónkrótnosć skedźbniła. Zdobom pokaza na swoju internetnu stronu a tam na trojorěčne wosebite wudaće „Naša Domowina“.

Prěnja hodowna amnestija

Krótkopowěsće (20.11.20)

pjatk, 20. nowembera 2020 spisane wot:

Wčera mjenje infekcijow

Budyšin. 82 wčera zwěsćenych konorainfekcijow w Budyskim wo­krjesu steji w zwisku z pokutnym dnjom. Srjedu njejsu žane testy přewjedli, kaž krajnoradny zarjad zdźěli. Dalšich 167 wosobow je wustrowjenych. Aktualnje je 2 081 schorjenych (-85), z nich 89 (+1) w klinice lěkuja. W Zhorjelskim wokrjesu zwěsćichu wčera 61 nowonatyknjenjow a pjeć smjertnych padow.

Stasipodłožki do archiwa

Berlin. Podłožki bywšeje statneje bjezstrašnosće NDR (stasi) přeńdu do zwjazkoweho archiwa. To je zwjazkowy sejm wčera wobzamknył. Tež přichodnje pak maja akty wobydlerjam, medijam a wědomostnikam přistupnje wostać. CDU/CSU, SPD, FPD a Zeleni hłosowachu za zhromadny naćisk zakonja. Lěwica so hłosa wzda, AfD bě přećiwo tomu.

Hač do kónca lěta wšo wotprajene

Krótkopowěsće (19.11.20)

štwórtk, 19. nowembera 2020 spisane wot:

Rekordna ličba infekcijow

Budyšin. Dotal najwjetšu ličbu 300 natyknjenjow z koronawirusom w běhu jednoho dnja wozjewichu wčera w Budyskim wokrjesu. Štyrjo dalši pacienća su w zwisku z koronu zemrěli. Aktualnje schorjenych je 2 133 (+57), w chorowni lěkuja 88 z nich (+11). Wot wčerawšeho płaći wudospołnjene powšitkowne korona-postajenje. Tak maš sej w zachodnym wobłuku wobchodow a na jich parkowanišćach nós a hubu zakryć.

Hotuja so na wulki jubilej

Slepo. Za dwě lěće zhladuja Slepjenjo na 750 lět wobstaća swojeje wsy. Hižo nětko tam towarstwa jubilejne lěto planuja. Swjedźenje chcedźa na wjacorych dnjach w běhu lěta přewjedować. Planowane je mjez druhim tohorunja wotměć tradicionalny mjezynarodny festiwal dudakow. K róčnicy chcedźa wudać wosebitu knihu wo stawiznach gmejny z fotami serbskich kwasow we wosadźe.

NDRska tramwajka dale jězdźi

Krótkopowěsće (17.11.20)

wutora, 17. nowembera 2020 spisane wot:

Ličba nowoinfekcijow woteběra

Budyšin. Wo dalšej zemrětej pacientce a 59 nowych natyknjenych z korona­wirusom w Budyskim wokrjesu je kraj­noradny zarjad wčera informował. 2 031 ludźi je schorjenych, z nich 63 (+3) stacionarnje lěkuja. Wot štwórtka budu wojacy Zwjazkoweje wobory w Budyskej chorowni zasadźeni. W Zhorjelskim wokrjesu zwěsćichu wčera dalšej infekciji a dwaj smjertnej padaj.

SŠT zhromadźiznu přesunje

Budyšin. Płaćacych wukazow knježerstwa dla přesunje Serbske šulske towarstwo swoju hłownu a wólbnu zhromadźiznu. Předsydstwo towarstwa je rozsudźiło, přewjesć 23. januara 2021 listowe wólby. Tuchwilu zběraja woni mjez čłonami namjety za nowe předsydstwo. Wjelelětna předsydka Ludmila Budarjowa runje tak kaž někotři dalši čłonojo k wólbam hižo njenastupja.

Nakupy za mjezu wusadźene

Krótkopowěsće (16.11.20)

póndźela, 16. nowembera 2020 spisane wot:

Tysacy w karantenje

Budyšin. Ličba zwěsćenych natyknjenjow z koronawirusom je přez kónc tydźenja we wokrjesu Budyšin wo 449 na cyłkownje 4 012 rozrostła. Schorjenych bě wčera 2 006, šěsćdźesaćoch w klinice lěkuja. 4 784 ludźi je w karantenje. W Kamjenskej chorowni maltezow su pomocnicy Zwjazkoweje wobory dźěłać započeli. Mjeztym sej Budyski měšćanski zwjazk SPD žada šulske rjadownje dźělić, zo njebychu kubłanišća znowa zasadnje zawrěć trjebali.

Reportaža mytowana

Praha. W čěskej kategoriji tekst mytowachu we wobłuku lětušeho Němsko-Čěskeho žurnalistiskeho myta reportažu Vladimíra Ševele „Kohout? Spadl ze schodů ...“ (Kokot? Je po schodźe dele padnył ...), wozjewjenu w Hospodářskich novinach loni 30. awgusta. Awtor poda so tam do Delnjeje Łužicy a wobswětla kulturu ­a identitu Serbow kaž tež jich prócowanja, stare tradicije wobchować.

Minister so starosći

Krótkopowěsće (13.11.20)

pjatk, 13. nowembera 2020 spisane wot:

Štyri nowe smjertne pady

Budyšin. Po pozitiwnych testach rozprawješe Budyski krajnoradny zarjad wčera wo 211 nowych koronainfekcijach we wokrjesu, dalši pacient je zemrěł. Aktualnje schorjena je 2 001 wosoba (+153), 45 ludźi je w chorowni. W Zhorjelskim wokrjesu zwěsćichu wčera 129 nowo­natyknjenjow a dalše tři smjertne pady. 116 (+11) ludźi stacionarnje lěkuja, z nich 24 na intensiwnej staciji.

Špatniši posudk

Drježdźany. Sakscy dźěłopřijimarjo po­hódnoćeja lońše powšitkowne wu­měnjenja za swoje dźěło cyłkownje jako lěpše hač w lěće 2018. Jich posudki pak su dale bóle kritiske hač te woprašanych w Němskej w cyłku a we wuchodnej Němskej. Wjace hač štwórćina (26 procentow) sakskich dźěławych ma wuměnjenja za „špatne“ (Němska: 20 proc., wuchodna Němska: 19 proc.), kaž sakske ministerstwo za dźěło wčera zdźěli.

Prěni zaryw na nowu připrawu

Krótkopowěsće (12.11.20)

štwórtk, 12. nowembera 2020 spisane wot:

Natyknjenja přeco hišće přiběraja

Budyšin. W Budyskim wokrjesu zwěsćichu wčera 186 dalšich infekcijow z koronawirusom. Ličba smjertnych padow je wo dwaj na 42 přiběrała. Aktualnje schorjenych je 1 848 (+84), z toho 45 (+1) stacionarnje lěkuja. Inficěrowanych bě w Kulowje 160 wosobow, w Pančicach-Kukowje 53 a w Ralbicach-Róžeńće 49. W Zhorjelskim wokrjesu wujewichu testy wčera 179 natyknjenjow. Šěsć pacientow je w zwisku z koronu zemrěło.

Skóržba Vattenfalla wuspěšna

Karlsruhe. Financne zarunanje wěstym wobhospodarjerjam milinarnjow pospěšeneho kónca wužiwanja atomoweje mocy dla po reaktorowej katastrofje w Fukushimje ma so hišće raz dospołnje noworjadować. Změna zakonja z lěta 2018 je njedospołna a njeje ženje płaćiwosće nabyła. To rozsudźi dźensa Zwjazkowe wustawowe sudnistwo po skóržbje energijoweho koncerna Vattenfall.

Unikat so nawróćił

Serbska debata

nowostki LND