Krótkopowěsće (17.08.20)
W dowolu so natyknyli
Budyšin/Zhorjelc. Porno pjatkej žanu změnu nastupajo koronawirus w Budyskim wokrjesu njezwěsća. Aktualnje štyrjo inficěrowani su wšitcy tak mjenowani dowolowi nawrótnicy. W Zhorjelskim wokrjesu zwyši so ličba natyknjenych wo dalšu wosobu na dohromady 66. Wosom wobydlerjam wukazachu karantenu, tak zo je tuchwilu cyłkownje 200 ludźi izolowanych.
Serbske zynki w Korutanskej
Pliberk. We wobłuku třikrajoweho wuměłskeho projekta „Přechod 03 – Wobrazy krajiny“ wuhotuja w muzeju Wernera Berga w korutanskim Pliberku čitanje a koncert. 21. awgusta zahudźa Walburga Wałdźic, Heidemarja Wiesnerec a Gerold Gnausch kaž tež kwartet modernsax Berlin. Swójsku kaž tež lyriku Kita Lorenca recituja Cvetka Lipuš, Anja Golob a Źilka.
Hosćenc ma wotnajerku
Krótkopowěsće (14.08.20)
Snadny rozrost infekcijow
Budyšin/Zhorjelc. Kaž strowotniski zarjad wokrjesa Budyšin zdźěli, je dalšej natyknjeni z koronawirusom registrował. Tak su aktualnje štyri pady znate. Wokomiknje je 35 wobydlerjow w karantenje (- 6). W Zhorjelskim wokrjesu zwěsćichu štyri nowe infekcije. Z tuchwilu dohromady 63 natyknjenych wosobow stej dwě w chorowni. Cyłkownje 192 kontaktnych wosobow (+1) je w karantenje.
Pokaza wuměłsku instalaciju
Budyšin. Serbski wuměłc Jan Bělk pokaza za dwaj tydźenjej, 28. a 29. awgusta, na Budyskim torhošću we wobłuku Staroměšćanskeho swjedźenja swoju wobchodźomnu instalaciju „Pohlady diferency“. Bělkowy, wot Załožby za serbski lud spěchowany multimedialny projekt tworješe loni zazběh festiwala šesćiměstow „Přinć a woteńć“.
Chipy přećiwo paducham
Krótkopowěsće (13.08.20)
Policija reagowała
Drježdźany. W zwisku z protestami na dalnodróze B 96 w Hornjej Łužicy je policija mjeztym wjace hač 40 chłostanskich jednanjow zahajiła. Při tym dźe po słowach sakskeho nutřkowneho ministra Rolanda Wöllera (CDU) mjez druhim wo zapřimnjenje do nadróžneho wobchada, wo nuzowanje a wo zranjenje ćěła.
Wo podpěru so požadać
Budyšin. Předewzaća z hač do 249 sobudźěłaćerjemi móža so wotnětka wo wukubłansku premiju abo dalše spěchowanja ze zwjazkoweho programa „wukubłanske městna zawěsćić“ na agenturach za dźěło požadać, kaž Budyski zarjad informuje. Próstwu zapodać je móžno přez telefon-hotline 0800/455520 abo internetnje pod www.arbeitsagentur.de/sachsen >> Ausbildungsprämie.
Parkowanišća ze sensorami
Krótkopowěsće (12.08.20)
Směrnicy wobzamknyli
Drježdźany. Sakske knježerstwo je wčera na swojim posedźenju dojednanju mjez Zwjazkom a krajemi přihłosowało, zwoprawdźić strukturnu změnu kaž tež spěchowanske směrnicy. Regiony maja prawo dóstać sobu rěčeć. We Łužicy chcedźa Domowinu zapřijeć. Komuny resp. jich předewzaća móža próstwy wo spěchowanje stajeć, wučinjace zasadnje 90, zdźěla tež 97,5 procentow.
Zesylnja team
Budyšin. Producent mašinow za pjekarnje Budyska DEBAG, zesylnja swój team za rozšěrjenje w Němskej. Wot 1. awgusta je 31lětny Erik Adler, kiž hižo wot lěta 2016 za DEBAG skutkuje, předawanski nawoda za region wuchod. Tež w Bayerskej maja nětko noweho šefa za předań. Tradicionalne předewzaće chce swoju prezencu po cyłym kraju dale sylnić.
Internaty w hotelach
Praha/Brno. W zwisku z koronawirusowej epidemiju bědźa so čěske hotele z njedostatkom hosći. Wěsty wupuć móhło hižo wot nazymy wužiwanje njewobsadźenych stwow jako narunanka hewak njedosahacych městnow w studentskich internatach być. Wosebje w Praze a Brnje móhła so ideja za hoteljejow kaž tež studentow wudanić.
Krótkopowěsće (11.08.20)
Nahubnik zwonka rjadownje
Podstupim. Po zahajenju noweho šulskeho lěta chcyše braniborski kabinet na swojim dźensnišim posedźenju na kóždy pad wobzamknyć, zo je škitny nahubnik w šulach zwonka wuwučowanskich rumnosćow a dworow za přestawki winowatostny. Wo dalšim přiměrjenju krajneho postajenja nastupajo wobmjezowanja koronapandemije dla chcychu dźensa popołdnju informować.
Danielu Krien mytuja
Drježdźany. Sakske literarne myto 2020 dóstanje Daniela Krien. W Lipsku bydlaca awtorka budźe za swoje dotalne prozowe twórby wuznamjenjena. Loni je 55lětna awtorka roman „Die Liebe im Ernstfall“ předpołožiła. Wot lěta 2012 spožča sakske ministerstwo za wědomosć, kulturu a turizm hromadźe ze Sakskej literarnej radu kóžde druhe lěto myto w hódnoće 10 000 eurow.
Třećina Saksow mało zasłuža
Krótkopowěsće (10.08.20)
Pytaja wirusa dla pomocnikow
Budyšin/Zhorjelc. Přez kónc tydźenja su w Zhorjelskim wokrjesu pjeć dalšich nowoinfekcijow z koronawirusom zwěsćili. Wjetšina z aktualnje 57 natyknjenych bydli abo dźěła w Bjernadźičanskim (Bernstadt) domje za zbrašenych. W tym zwisku wokrjes wobydlerjow namołwja so dobrowólnje na polu hladanja angažować. W Budyskim wokrjesu stej dale dwě wosobje inficěrowanej.
Liča ze srědkom kónc lěta
Brüssel. Strowotniska komisarka EU Stella Kyriakides liči kónc lěta z prěnim šćěpjenskim srědkom přećiwo koronje. „Byrnjež wěšćenja hišće riskantne byli, su dobre pokazki, zo srědk kónc abo spočatk noweho lěta předleži“, rjekny komisarka časopisej Handelsblatt. Wona pak skedźbnja na to, zo njemóže šćěpjenski srědk zrazom wšě ćeže rozrisać. Dowola pak krok po kroku nawrót k normaliće.
Scholz kanclerski kandidat SPD
Krótkopowěsće (07.08.20)
Ličba infekcijow přiběrała
Budyšin/Zhorjelc. W Budyskim wokrjesu je so dalša wosoba z koronawirusom natyknyła, z čimž stej aktualnje dwaj padaj znatej. W Zhorjelskim wokrjesu zwěsćeja tuchwilu dohromady 43 inficěrowanych, 33 wjace hač wčera. Tamniši krajny rada Bernd Lange (CDU) w tym zwisku namołwja, předpisy hygieny bóle wobkedźbować.
Lěsnym wohenjam wobarać
Offenbach/Podstupim. Horce lětnje wjedro Němska wjedrowa słužba za Saksku připowědźa, wočakujo přichodne dny temperatury hač do 36 stopnjow. Strach lěsnych wohenjow tu kaž tež w Braniborskej dale přiběra. Po słowach tamnišeho krajneho społnomócnjeneho za škit před lěsnymi wohenjemi Raimunda Engela njeje dešć minjeny kónc tydźenja ničo změnił, bě to „kapka na wupar“.
Z nahubnikom do šule
Krótkopowěsće (06.08.20)
Dalše wosoby natyknjene
Budyšin/Zhorjelc. Strowotniski zarjad wokrjesa Budyšin zdźěli, zo je dalšu infekciju z koronawirusom registrował. W tym zwisku wukaza štyrjom kontaktnym wosobam karantenu. W Zhorjelskim wokrjesu zwěsćichu wčera dźewjeć natyknjenjow, za dohromady 63 wosobow su karantenu postajili.
Fibla w delnjoněmčinje wušła
Podstupim. „Brannenborch Plattfibel“ rěka prěnja wučbnica w delnjoněmčinje za braniborskich šulerjow wot 3. lětnika. Kniha ma pomhać, wohroženu regionalnu rěč wožiwić. Na wčerawšej zjawnej prezentaciji publikacije w Braniborskim krajnym sejmje wuzběhny ministerka za kubłanje Britta Ernst (SPD), zo „pak šule same rěč wuchować njezamóža. Trjebamy aktiwnych rěčnikow.“
Peticija „jara wuspěšna“
Krótkopowěsće (05.08.20)
Dworowy swjedźeń njebudźe
Hrubjelčicy. Serbske ewangelske towarstwo je swój lětuši dworowy swjedźeń wotprajiło. Chcychu jón 5. septembra, a to prěni króć w Hrubjelčicach, přewjesć. Dotal su jón ewangelscy a mnozy katolscy Serbja zhromadnje wjacore lěta we Wuježku pod Čornobohom swjećili. Přičina postupowanja, tak piše časopis ewangelskich Serbow Pomhaj Bóh, su trěbne naprawy škita před koronu.
Wuměnja stare mězniki
Mužakow. W Parku hrabje Pücklera w Mužakowje je jenož hišće hač do kónca septembra widźeć wosom nimale 60 lět starych měznikow. Wone steja na kupje a podłu Nysy. Chcedźa tam wosom nowych nastajić. Wšitke podłu němsko-pólskeje mjezy we wobłuku Sakskeje stejace 370 měznikow budźe wuměnjenych.
Wo pjenjezach rozsudźili
Budyšin. Financny wuběrk města Budyšina je wo rozdawanju pjenjez z wobydlerskeho etata rozsudźił. Za projekty planuje město 10 700 eurow. Lětsa dyrbjachu wo 57 namjetach rozsudźić. Spěchowane budu hodowna dekoracija za Hrodowu, Serbsku a Seminarsku hasu, apotekarska zahroda při Michałskej cyrkwi a zazelenjenje Serbskeje hasy.
Krótkopowěsće (04.08.20)
97 274 kilometrow kolesowali
Budyšin. We wobłuku akcije „Města kolesuja“ je 389 ludźi w 26 mustwach Budyskeho wokrjesa w třoch tydźenjach dohromady 97 274 po puću było a tak 14 tonow wuhlikoweho dioksida wobešło. Najwuspěšniši bě ze 37 058 kilometrami team Ewangelskeho młodźinskeho dźěła. Wubědźowanje je akcija Zwjazkarstwa za klimu europskich komunow.
Pan Tau so nawróći
Mnichow. Dźěćacu seriju z 1970 lět Pan Tau je telewizija ARD z britiskej firmu Caligari Film znowa natočiła. Hłownu rólu hraje Jendźelčan Matt Edwards. 14dźělnu seriju, kotruž su z britiskimi a němskimi dźiwadźelnikami w Němskej produkowali, chcedźa nazymu pokazać. Pan Tau ze swojim předešćnikom, z melonu a ze zwonkazemskimi mocami tójšto spodźiwneho zdokonja.
Čěska Šwica swjeći
