Policija (16.10.23)

póndźela, 16. oktobera 2023 spisane wot:

Awto rozdrapali

Kamjenc. Tójšto škody načinili su nje­znaći minjene dny w Kamjencu. Tam bě wobsedźer Mercedesa swoje awto hižo 8. oktobra na bebelowej parkował. Sobotu rano dyrbješe zwěsćić, zo bě něchtó prawy bok noweho SUV rozdrapał. Škodu trochuje policija na něhdźe 3 000 eurow. Kriminalna słužba pad přepytuje.

Policija (12.10.23)

štwórtk, 12. oktobera 2023 spisane wot:

Wandalojo zachadźeli

Njeswačidło. Po wšěm zdaću bjez rozuma su wandalojo minjene dny w parku Njeswačanskeho hrodu zachadźeli a kóncowali. Tam powalichu woni pěskowcowu figuru z jedneje ze studnjow. Při tym so figura chětro wobškodźi. To pak nje­znatym njedosahaše, přetož woni tež hišće škleńcu durjow bliskeho hrodu rozbichu. Dohromady nasta tak něhdźe 5 200 eurow škody.

Policija (11.10.23)

srjeda, 11. oktobera 2023 spisane wot:

Drohe awto pokradnyli

Budyšin. Před Šulerskimi wrotami w Budyšinje su njeznaći w nocy na póndźelu chětro drohe awto pokradnyli. Tam je so Audi RS3 zhubił. Dwaj měsacaj stare jězdźidło bě w Pólskej přizjewjene a něhdźe 72 000 eurow hódne. Za awtom nětko mjezynarodnje pytaja.

Policija (10.10.23)

wutora, 10. oktobera 2023 spisane wot:

Při njezbožu so zraniłoj

Pančicy-Kukow. Dwě zranjenej wosobje a tójšto wěcneje škody je wuslědk wobchadneho njezboža njedźelu popołdnju pola Pančic-Kukowa. Tam jědźeše wodźer Renaulta z Chróšćanskeho směra, po wšěm zdaću wosrjedź dróhi, kaž policija zdźěli. Jemu napřećo přijědźe wodźerka VWja. Wona drje spyta so hišće wuwinyć, njemóžeše pak zražce zadźěwać. Při tym so 42lětna šoferka VWja a jeje dźěćo zraništej. Jeju dowjezechu do chorownje. Na jězdźidłomaj nasta něhdźe 30 000 eurow škody. Wobě awće dyrbjachu wotwlec. 26lětny wodźer Renaulta změje so lochkomyslneho zranjenja ćěła dla zamołwić.

Policija (06.10.23)

pjatk, 06. oktobera 2023 spisane wot:

Pjenjezy pokradnyli

Worklecy. Z njewšědnym padustwom zaběra so policija nětko we Worklecach. W nocy na srjedu zadobychu so tam paduši do twarjenja na Šulskej. Kaž policija dale zdźěli, pokradnychu paduši škleńčane sudobjo, w kotrymž běchu wjacore sta eurow hotowych pjenjez. Nimo toho nasta něhdźe 300 eurow wěcneje škody.

Plesternaki mjetali

Wojerecy. Plesternaki su njeznaći minjene dny we Wojerecach do woknow twarjenja na Rybarskej mjetali. Njedočinkam pak so njeporadźi, škleńcu woknow rozbić. Přiwšěm nasta 2 000 eurow škody.

Policija (05.10.23)

štwórtk, 05. oktobera 2023 spisane wot:

Zawinowar so přizjewił

Wojerecy. Hižo minjeny pjatk je so na parkowanišću Wojerowskeje kupnicy wobchadne njezbožo stało. Zawinowar pak so zminy. Předwčerawšim so muž na policajskim rewěrje přizjewi a njezbožo přizna. Při tym so wukopa, zo 65lětny ­hižo wot julija žanu jězbnu dowolnosć njewobsedźi a tuž awto scyła wodźić směł njeby.

Policija (04.10.23)

srjeda, 04. oktobera 2023 spisane wot:

Zbožo w njezbožu měł

Kamjenc. Wichor je wčera wječor w Hornjej Łužicy wjacore štomy powalił a tak škodu načinił. Kedźbliweho jandźela pěstona měješe po wšěm zdaću šofer w Kamjencu. Wosrjedź jězby padny štom na jeho wosobowe awto. Kaž z dźiwom so muž njezrani. Zhorjelska policajska direkcija zliči w běhu dweju hodźin 13 zasadźenjow. Zwjetša dyrbjachu wohnjowi wobornicy štomy rumować.

Policija (02.10.23)

póndźela, 02. oktobera 2023 spisane wot:

Keramiku pokradnyłoj

Wjazońca. Hornčerske wiki minjeny kónc tydźenja we Wjazońcy njejsu jenož lubowarjow keramiki přiwabili, ale tež paduchow. W nocy na njedźelu staj tam mužej ze zamknjeneho předawanišća ­keramiske wudźěłki w hódnoće 85 eurow spakosćiłoj. Sobudźěłaćer wěstot­neje słužby je jednoho z njeju dosahnył a policiji přepodał. Tamny najprjedy ćekny. Policisća pak jeho pozdźišo tohorunja wuslědźichu.

Policija (29.09.23)

pjatk, 29. septembera 2023 spisane wot:

Wopačni třěchikryjerjo

Wojerecy. Při kromje puća stejacy transporter je policija srjedu we Wojerecach kontrolowała. W awće běchu wjacore wosoby. Při kontroli zjewi so dalša wosoba, kotraž runje ze susodneje ležownosće přichadźeše. Kaž policija rozprawja, bě muž tam po wšěm zdaću podarmo spytał, třěchikryjerske dźěła poskićeć. Štyrjo rumunscy staćenjo dóstachu přizjewjenje dla podhlada, zo su so přećiwo přemysłowemu porjadej přešli, dokelž ani přemysłowe přizjewjenje ani dalše trěbne podłožki njemějachu. Najskerje su mužojo w starobje 14 do 58 lět za po­dobne delikty w druhich zwjazkowych krajach zamołwići.

Policija (28.09.23)

štwórtk, 28. septembera 2023 spisane wot:

Plantažu konopje namakali

Hermsdorf. Pódla awtodróhi A 4 pola Hermsdorfa su wobydlerjo póndźelu plantažu konopje namakali a policiju informowali. Zastojnicy zwěsćichu na to 250 tajkich rostlin na kromje pola ze słónčnymi róžemi. Kriminalna policija pad přepytuje.

Serbska debata

nowostki LND