SLA připóznaće žnjał
Biskopicy/Budyšin. Wjele připóznaća zdobyli su sej chórisća Serbskeho ludoweho ansambla z chórowymaj koncertomaj kónc tydźenja w Biskopicach a w Budyskim Serbskim muzeju. Pod hudźbnym nawodom Gabriele Donà a z klawěrnym přewodom Liany Bertók zanjesechu woni serbske kaž tež němske twórby romantiki a pózdnjeje romantiki.
List wjesneju předstejićerjow
Gósćeraz. Wjesna předstejićerjej Gósćeraza (Groß Gastrose) a Dubojc (Taubendorf) staj Zwjazkowy zličbowanski zarjad prosyłoj, naslědne kóšty přepołoženja zwjazkoweje dróhi B 112 za Janšojsku brunicowu jamu Vattenfalla pruwować. W lisće zličbowanskemu zarjadej wobaj dwělujetaj, zo wobhospodarjer jamy wšitke naslědne kóšty přewozmje.
Nowy sport blisko Łužicy
Rumburk. Prěnje certifikowane hrajnišćo „kopańcogolfa“ (jendźelsce „footballgolf“) je na horje Dymník pola Rumburka w Šluknovskim wuběžku. Tónle sport zwjazuje prawidła kopańcy a golfa – kopaja bul přez zadźěwki do jamkow. W awgusće su tam samo kopańcogolfowe mišterstwa Europy přewjedli.