Nowa móc na čole frakcije
Drježdźany. Hornjołužičanka Franziska Schubert zesylnja nawod frakcije Zelenych w Sakskim krajnym sejmje. Wčera su ju w druhim wólbnym přeběhu za nowu městopředsydku wuzwolili, rěka z frakcije. 33lětna z Habrachćic-Neugersdorfa bě hakle loni nazymu do krajneho sejma jako naslědna kandidatka přišła.
Wo přichodźe brunicoweje jamy
Choćebuz. Braniborski brunicowy wuběrk je dopołdnja w Choćebuzu planowane rozšěrjenje dweju wuhloweju jamow w Delnjej Łužicy rozjimował. Mjez druhim jedna so tež wo Janšojsku jamu. Čłonojo gremija chcychu sej zdobyć přehlad wo aktualnym stawje. Planowaneje předanje brunicoweje sparty koncerna Vattenfalla dla njeje wěste, hač budźetej jamje dale rozšěrjenej.
Dalši ćěkancy přińdu
Drježdźany. Hač do kónca lěta maja wokrjesy w Sakskej po informaciji krajneje direkcije hišće 37 000 ćěkancow přiwzać. To je 3 700 mjenje hač planowane. Dokelž pak dotal hišće wšitcy dóšli njejsu, wočakuja wokrjesy nětko w sylnišej měrje ćěkancow. Budyski wokrjes ma hišće něhdźe 1 400 ćěkancow přiwzać, Zhorjelski 1 100.