Krótkopowěsće (09.03.20)

póndźela, 09. měrca 2020 spisane wot:

Dalši rjad mólbow wudała

Budyšin. Wuměłča Ulrika Mětškowa dalši rjad mólbow na zakładźe Franza Schuberta zhudźbnjenych basnjow Johanna Ludwiga Wilhelma Müllera stworiła. Brošurka „Die schöne Müllerin“ wopřiji­ma 20 reprodukcijow twórbow Budyšanki. W samonakładźe wudatu brošurku dóstanu zajimcy pola Ulriki Mětškoweje, wobmjezowanu ličbu ma Budyska Smolerjec kniharnja na předań.

Kontrole na mjezach

Praha/Waršawa. Čěska chce na swojich mjezach pućowacych kontrolować, zo by rozšěrjenju chorosće płucow corona-wirusa dla zadźěwała. Wot dźens­nišeho policija na dźesać namjeznych přecho­dach do Bayerskeje, Awstriskeje a Słowakskeje kontroluje. Pólska chce pućowacych z Němskeje na A 4 w Jędrzy­cho­wicach pola Zhorjelca kontrolować.

Płaćiznu maskow regulowali

Krótkopowěsće (06.03.20)

pjatk, 06. měrca 2020 spisane wot:

53. Zeszyty Łużyckie wušli

Waršawa. W Instituće za zapadnu a južnu slawistiku Waršawskeje uniwersity su 53. Zeszyty Łużyckie z ćežišćom „Małe rěče pytaja za identitu“ wušli. Mjez druhim pisaja tam Nicole Dołowy-Rybińska a Cordula Ratajczakowa wo rěčnej praksy na Serbskim gymnaziju, Dietrich Šołta wo knize „Świtanie“ Haliny Barań a Zdzisław Kłos wo biografiji Benedikta Dyrlicha „Doma we wućekach 1“.

Kretschmer podpěruje ratarjow

Drježdźany. Sakski ministerski prezident Michael Kretschmer (CDU) wostaja wotewrjene, hač Sakska w Zwjazkowej radźe­ nowelěrowanju hnojenskich po­stajenjow přihłosuje. „Widźu to jara, jara kritisce“, rjekny wón stam ratarjow, kotřiž su wčera w Drježdźanach demonstrowali. Kretschmer chce tomu zadźěwać, zo „činja na škodu přistojnych ratarjow politiku, kotraž prawa njeje“.

Tež Hilse wotpokazany

Krótkopowěsće (05.03.20)

štwórtk, 05. měrca 2020 spisane wot:

Přizjewjenski čas podlěšeny

Drježdźany. Zajimowane towarstwa móža so dale za lětuši Dźeń Saksow přizjewić. Online zapodate namjety za „najwjetši wobydlerski a domizniski swjedźeń w swobodnym staće“, wotměwacy so wot 4. do. 6. septembra, přijimuja hišće hač do 31. měrca, kaž statna kenclija wčera na nowinarskej konferency w Sakskim krajnym sejmje informowaše.

Dobre demografiske wuwiće

Chrósćicy. Negatiwne demografiske prognozy njejsu so za serbske wsy dopjelnili. To praji Katharina Jurkowa, regionalna rěčnica za Kamjensku župu „Michał Hórnik“, wčera w Chrósćicach. Problem njeje hižo, zo maja přemało maćer­norěčnych serbskich dźěći, ličba skerje přiběra. Wužadanje nětko je, dosć rumnosćow w dźěćacych dnjowych zarjadnišćach a šulach kaž tež dosć kubłarjow a wučerjow namakać.

Hwězda nad Błótami

Krótkopowěsće (04.03.20)

srjeda, 04. měrca 2020 spisane wot:

Budyšan w Choćebuzu wustaja

Choćebuz. „1990 – fotografiske pozicije z jednoho lěta, wo jednym lěće“ – tak rěka nowa wustajeńca w Choćebuskej Dieselowej milinarni. Wona słuša Braniborskemu krajnemu muzejej za moderne wuměłstwo a zmóžnja wosebje načasnym wuměłcam, swoje twórby wustajeć. Tak su tam tež wobrazy Budyskeho fotografikarja Jürgena Maćija widźeć. Wustajeńca je hač do 17. meje přistupna.

Předawanski šlager

Kinspork. Nowy parfim z kamelijowych kćenjow poskića wot minjeneje njedźele Domizniske towarstwo Kins­pork. Nowy wudźěłk je mjez kupcami tak požadany, zo bě w běhu jenož dweju hodźin­ wupředaty. Dalša produkcija wosebiteje wonjaceje wodźički je hižo zaběžała, kaž domizniske towarstwo zdźěla. Přichodny kónc tydźenja budu flakony zaso na předań.

Čěska pomoc Grjekskej

Krótkopowěsće (03.03.20)

wutora, 03. měrca 2020 spisane wot:

Z nowym předsydstwom

Ralbicy. Cornelia Hempelowa je nowa předsydka Ralbičanskeho cyrkwinskeho chóra Lilija. Wčera su ju na Radlubinje jednohłósnje do za­stojnstwa wuzwolili. Konječanka naslěduje Hrańčana Józefa Jurka, kiž je towarstwo dlěje hač 20 lět nawjedował. Dalši čłonojo předsydstwa su Chrystina Pašcyna, Bettina Lipičowa, Diana Mati­kowa, Bernadet Šołćina, Michał Matješk a Frank Hejduška.

Wuspěšnu bilancu předstajił

Picnjo. Čłonojo towarstwa Serbski kulturny turizm (SKT) su so wčera w Picnju schadźowali. Předsyda SKT Pětr Brězan předstaji lońšu wuspěšnu bilancu. Tak je ličba čłonow w běhu lěta wot 15 na 33 rozrostła. Dale skedźbni wón na stronu SKT w socialnej syći Facebook, hdźež tohorunja dobry wothłós wužiwarjow žněja.

Netflix-seriji wuznamjenjenej

Krótkopowěsće (02.03.20)

póndźela, 02. měrca 2020 spisane wot:

Literarna dźěłarnička wo basni

Budyšin. W małym kole pjeć wobdźělnikow wotmě so sobotu w Budyskim Serbskim domje cyłodnjowska literarna dźěłarnička z Lubinu a Dušanom Hajduk-Veljković. Druhi raz stej Załožba za serbski lud a Ludowe nakładnistwo Domo­wina spěchowanske zarjadowanje za serbski pisacy dorost wuhotowałoj. W srjedźišću stejachu tónraz basnje.

Tobials Bilz nowy krajny biskop

Drježdźany. Teologa Tobias Bilz je nowy­ biskop Ewangelskeje krajneje cyr­kwje Sakskeje. 55lětny móžeše so sobotu w Drježdźanach w třećim wólbnym kole jasnje přesadźić. Bywši krajny młodźinski farar zdoby sej 48 hłosow. Sobupožadarjej Andreas Beuchel (56) a Ulrike Weyer (46) dóstaštaj 15 a 16 hłosow. Bilza chcedźa 25. apryla oficialnje zapokazać.

Jung wostanje měšćanosta

Krótkopowěsće (28.02.20)

pjatk, 28. februara 2020 spisane wot:

Dale mjenje bjezdźěłnych

Budyšin. Ličba bjezdźěłnych we wobłuku Budyskeje agentury za dźěło je w februaru dale spadowała. Kaž jeje jednaćelka Ilona Winge-Paul dźensa dopoł­dnja zdźěli, bě mały róžk z cyłkownje 17 996 ludźimi 415 mjenje bjez dźěła hač w januaru. Jako přičinu mje­nu­je wona tuchwilne chětro miłe wjedro. Bjezdźěłnostna kwota zniži so tuž wo 0,2 dypkaj na 6,4 procenty.

Wustajeńca wo starym nałožku

Janšojce. Wosebita wustajeńca „Ak słyńco górjej stupašo – 10 lět jutrowne spěwanje w Janšojcach“ je wotnětka přistupna. W Janšojskim Serbsko-němskim domizniskim muzeju pokazuja wobra­zowu přehladku, wobswětlacu stawizny stareho, dołho zhubjeneho nałožka. Před dźesać lětami bě jón skupina aktiwistkow wozrodźiła.

Naměsto ma nowe mjeno

Krótkopowěsće (27.02.20)

štwórtk, 27. februara 2020 spisane wot:

Přeprošatej do parlamenta

Flensburg/Budyšin. Federalistiska uni­ja europskich narodnych mjeńšin (FUEN) a třěšny zwjazk serbskich towarstwow Domowina přeprošatej na zjawne słyšenje wo iniciatiwje Minority SafePack (MSPI). Wone budźe 23. měrca w Europskim parlamenće w Brüsselu. Zajimcy měli so hač do kónca februara pola FUEN pod přizjewić, kaž w aktualnej zdźělence Domowiny rěka.

Wotewru mólbowu galeriju

Drježdźany. Po sydom lět trajacym wobnowjenju chcedźa sobotu Drjež­dźansku galeriju mólbow Stari mištrojo a zběrku skulpturow do 1800 znowa wotewrěć. Mjez druhim budu twórby kaž „Sixtinska madona“ Raffaela zjawnosći znowa přistupne. Z něhdźe 50 milionami eurow je Sakska saněrowanje Semperoweho twarjenja a restawraciju něhdźe 200 mólbow podpěrała.

Wo fondsu a filmach wuradźowali

Krótkopowěsće (26.02.20)

srjeda, 26. februara 2020 spisane wot:

Wustajeja dźěła Jana Hanskeho

Eisenhüttenstadt. Składnostnje lětušich 95. posmjertnych narodnin Jana Hanskeho pokazuje měšćanski muzej w Eisenhüttenstadće hač do 15. měrca dźěła wot njeho ze swojeje wuměłstwoweje zběrki. Z Njebjelčic pochadźacy a 2004 w Eisenhüttenstadće zemrěty moler je kulturne stawizny města nad Wódru wot lěta 1955 sobu wobwliwował. Tak je Jan Hanski tež wopon města stworił.

„Moped z 15“ přińdźe

Drježdźany. W Sakskej smědźa młodostni přichodnje z 15 lětami jězbnu dowol­nosć za moped złožić. To je wčera sakski kabinet wobzamknył. Wotpo­wědny zakoń wo nowym rjadowanju ma 1. meje płaćiwosće nabyć. Sakski statny minister za wobchad Martin Dulig (SPD) ma rozsud za „moped z 15“ předewšěm za młodostnych na wsach za jara dobry. Wšako su tak wo wjele mobilniši.

Organizowana pomoc móžna

Karlsruhe. Wot lěta 2015 płaćiwy za­koń­, zakazowacy aktiwnu pomoc k wu­mrěću, so Zakładnemu zakonjej spřećiwja. To je Zwjazkowe wustawowe sud­nistwo dźensa w Karlsruhe rozsudźiło a tak skóržbam ćežko chorych ludźi, lěkarjow a přewodnikow do smjerće wotpowědowało.

Krótkopowěsće (25.02.20)

wutora, 25. februara 2020 spisane wot:

Countdown za Dźeń Saksow

Drježdźany. Hač do 1. měrca hišće móža­ so kulturne a dalše towarstwa, zwjazki a institucije za lětuši 29. dźeń Saksow přizjewić. Swjedźeń­ wotměje so wot 4. do 6. septembra w Aue-Bad Schlema. Z dohromady 120 000 eurami sakska statna kenclija towarstwa za to spěchuje. Domowina namołwja­ tež serbske cyłki, na najwjetšim sakskim swjedźenju so před­stajić.

Wopomnjensku taflu wotkryli

Gołkojce. Z wosebitymi dwurěčnymi kemšemi su předwčerawšim w Gołkojcach na fararja Karla-Eduarda Haußiga spominali. Wón bě farar w Bórkowach a Gołkojcach a je 1868 wudaće serbskeje biblije zamołwił. Po kemšach su w cyrkwi jemu wěnowanu wopomnjensku taflu wotkryli. Wo žiwjenju a skutkowanju Haußiga přednošowaše předsyda Spěchowanskeho towarstwa za serbsku rěč w cyrkwi dr. Hartmut Leipner.

Wulki dundak so nawróćił

Serbska debata

nowostki LND