Krótkopowěsće (03.01.20)
Loni dwójce dwójnikaj
Kamjenc. W Kamjenskej chorowni swj. Jana bě so loni 546 dźěći narodźiło – 277 holcow a 269 hólcow, dwójce dwójnikaj. Rata wurězanja dźěsća wučinja 15,8 procentow. Najwoblubowaniše holče mjena w chorowni Lessingoweho města 2019 běchu Frieda, Mathilda a Emma. Pola hólcow běchu so starši najčasćišo za Emila, Antona a Kurta rozsudźili.
Mjenje bjezdźěłnych hač loni
Budyšin. Ličba bjezdźěłnych w Budyskim wokrjesu je so w decembru porno nowembrej wo 3,9 procentow powjetšiła. Cyłkownje bě něhdźe 17 000 dźěłokmanych bjeze zaběry. Přirunujo z decembrom 2018 je to nimale dźesać procentow mjenje, kaž Budyska wotnožka agentury za dźěło zdźěla. Kwota bjezdźěłnosće we wokrjesu wučinja šěsć procentow.
LMBV z nowym jednaćelom
Krótkopowěsće (02.01.20)
Strony zwěsćeja wjace namocy
Drježdźany. CDU, SPD, Zwjazk 90/Zeleni, Lěwica a AfD su zdźělili, zo wjace namocy přećiwo stronam zwěsćeja. Hroženja, hida a nadběhi na politikarjow su z jich wida přiběrali. Statistika sakskeho nutřkowneho ministerstwa pak to cyle tak njewotbłyšćuje. Krajny kriminalny zarjad naliči 218 padow mjenje politisce motiwowanych chłostajomnych njeskutkow přećiwo politikarjam a stronam za lěto 2018 hač w předchadźacym lěće.
Karikaturist Bach zemrěł
Kamjenica. Po dołhej chorosći je Kamjeničanski karikaturist Rainer Bach silwester 73lětny zemrěł. Jako swobodnje skutkowacy wozjewi wón karikatury mjez druhim w satiriskim magacinje „Eulenspiegel“. Kosmonawt Gennadij Padalka bě w lěće 2015 rysowanku Rainera Bacha sobu na mjezynarodnu swětnišćowu staciju ISS wzał.
Industrijna kultura w srjedźišću
Krótkopowěsće (30.12.19)
Serbska murja so schadźowała
Njechorń. Towarstwo Serbska murja je sobotu w Domje Měrćina Nowaka-Njechorńskeho swoju hłownu zhromadźiznu přewjedło. Wosebje zhladowali su na aplikaciju QuizSerb, serbski digitalny kwis, kiž běchu zdźěłali a kotryž wobstajnje z nowymi prašenjemi pjelnja. Na čoło předsydstwa wuzwolichu Pětra Dźisławka a Kiru Hrjehorjec.
Na škodu šulerjow
Berlin. Po cyłej Němskej na šulach mjeztym přidružnicy skutkuja. Prezident cyłozwjazkoweho zjednoćenstwa wučerjow Heinz-Peter Meidinger ma jich wukubłanje w rozmołwje z nowinu Die Welt za njedosahace a za „njeskutk na dźěćoch“, rěčo w tym prašenju wo „dospołnym zaprajenju“ zwjazkowych krajow. Často njejsu přidružnicy kwalifikowani dosć, hdyž šulsku słužbu nastupja.
Lěki jednotnje wotstronjeć
Krótkopowěsće (27.12.19)
K 250. narodninam Beethovena
Budyšin. W rjedźe „Wosebity koncert na prozy do noweho lěta“ 2020 steja 250. narodniny Ludwiga van Beethovena w srjedźišću. Kaž organizatorka a sobuskutkowaca pianistka Heidemarie Wiesnerec informuje, wuhotujetej klawěrne trio a tenor hudźbny wječor. Wot 18. januara budu koncerty w Budyšinje, Wojerecach, Berlinje, Lipsku kaž tež w Lubinje.
Tenor Peter Schreier wumrěł
Drježdźany. Wuznamny operowy spěwar Peter Schreier je mortwy. Wón je 84lětny po dołhej chorosći prěni dźeń hód w Drježdźanach zemrěł. Schreiera mějachu za jednoho z wodźacych lyriskich tenorow 20. lětstotka. „Sława swěta a lubosć k domiznje – woboje k njemu słuša“, piše sakski ministerski prezident Michael Kretschmer (CDU) k smjerći wuměłca z wulkim wobdźiwanjom.
Přidatnej ćahaj do Kamjenca
Krótkopowěsće (23.12.19)
Zběrnik k reformaciji wušoł
Budyšin. Jako 67. zwjazk Spisow Serbskeho instituta předleži w Ludowym nakładnistwje Domowina konferencny zběrnik „Reformation und Ethnizität“, wudaty wot Susanny Hozyneje, Madleny Malinkec a Friedricha Pollacka. Cyłkownje 16 přinoškow ze stawizniskich, kulturnych, literarnych a rěčnych wědomosćow přepytuje łamki a dołhodobne wuwića w zwisku z reformaciju.
Rjemjesło ćežišća pomjenowało
Drježdźany/Budyšin. Wuchodosakske rjemjesło wočakuje wot noweje sakskeje knježerstwoweje koalicije srjedźnemu stawej přichilenu politiku. Kaž prezident Drježdźanskeje rjemjeslniskeje komory dr. Jörg Dittrich rjekny, je wažny nadawk, skrućić dualne wukubłanje kaž tež dualne a akademiske wukubłanje jenak wobjednać, zo bychu fachowcy w rjemjesle dale zaručeni byli.
Wjace wěriwych w Čěskej
Krótkopowěsće (20.12.19)
Kretschmer wuzwoleny
Drježdźany. Michael Kretschmer (CDU) je dotalny a nowy ministerski prezident Swobodneho stata Sakskeje. Krajny sejm je jeho na spočatku swojeho dźensnišeho posedźenja wuzwolił. Za Kretschmera hłosowaše 61 zapósłancow, šěsć mjenje, hač ma nowa koalicija CDU, Zwjazka 90/Zelenych a SPD, při 57 „ně“-hłosach. Po wuzwolenju je prezident sakskeho sejma dr. Matthias Rößler (CDU) je Michaela Kretschmera spřisahał.
Dalše spěchowanje přilubił
Berlin. Nowe zrěčenje wo financowanju Załožby za serbski lud steješe wčera w srjedźišću rozmołwy čłonow jeje parlamentariskeje přirady Marka Šimana (CDU) a Klaus-Petera Schulzy (SPD) ze statnym sekretarom zwjazkoweho nutřkowneho ministerstwa Stephanom Mayerom. Kaž Šiman zdźěli, njeje Mayer žane konkretne ličby mjenował, přilubi pak serbske naležnosće dale sylnje spěchować.
Zeleni z wulkim přihłosowanjom
Krótkopowěsće (19.12.19)
Čakaja na wuslědk Zelenych
Drježdźany. Prěnjej sakskej knježerstwje koaliciji CDU, Zwjazka 90/Zelenych a SPD dyrbja jenož hišće Zeleni přihłosować. Wuslědk woprašowanja sobustawow chcyše strona dźensa popołdnju w Drježdźanach wozjewić. Přihłosuje-li Zwjazk 90/Zeleni zastupej do knježerstwa, by to třeća tak mjenowana keniaska koalicija w Němskej była. Sakski krajny sejm chce jutře wot 11 hodź. ministerskeho prezidenta wuzwolić. Hnydom po tym jeho w plenumje spřisahaja.
Prezentuja so hromadźe
Lipsk. Pod hesłom „Common Ground“ (zhromadnosć), chce klětu dźesać krajow juhowuchodneje Europy prěni raz hromadźe swoju literaturu a swojich awtorow na Lipšćanskich knižnych wikach předstajić. Na třilětnym projekće wobdźěla so Albanska, Bosniska-Hercegowina, Bołharska, Kosowo, Chorwatska, Rumunska, Sewjerna Makedonska, Montenegro, Serbiska a Słowjenska.
„Z Lipicy do hole“ zaso na předań
Krótkopowěsće (18.12.19)
Nowa šefredaktorka Rozhlada
Budyšin. Katrin Čornakec budźe wot 1. apryla 2020 nowa šefredaktorka kulturneho časopisa Rozhlada. Wjelelětna lektorka Ludoweho nakładnistwa Domowina je w Lipsku a Halle stawizny, historiske pomocne wědomosće a sorabistiku studowała a studij z magistrom artium wotzamknyła. Dotalna šefredaktorka Sara Mičkec wěnuje so połnje disertaciskemu studijej wo sociolinguistiskich prašenjach daledawanja serbskeje rěče.
Dweju ministrow namjetowali
Drježdźany. Sakska SPD je dotalneju ministrow za hospodarstwo Martina Duliga a za integraciju Petru Köpping za nowe čorno-zeleno-čerwjene statne knježerstwo namjetowała, strona wčera zdźěli. Dotalny financny minister Matthias Hass (CDU) njeje porno tomu za knježerstwowe zastojnstwo dale k dispoziciji, kaž to sakske ministerstwo financow dźensa wobkrući.
Chcedźa Žitawu zapřijeć
Krótkopowěsće (17.12.19)
Tež sakska SPD za koaliciju
Drježdźany. Po CDU je so tež krajna SPD za zhromadne sakske knježerstwo z CDU a Zelenymi wuprajiła. Po wčera wozjewjenym wuslědku sobustawskeho naprašowanja hłosowaše 74 procentow wobdźělnikow za koaliciju. Něhdźe 64 procentow přibližnje 5 000 hłosakmanych čłonow SPD je sobu wothłosowało, kaž strona wčera informowaše. Zeleni wozjewja swój rozsud štwórtk.
Měsćenki online rezerwować
Waršawa. Ze změnu jězbneho plana minjenu njedźelu poskića pólske železniske předewzaće „PKP Intercity“ nimo online-jězdźenkow, sej tež měsćenki w interneće rezerwować. Nimo toho je w mnohich spěšnikach darmotny WLAN k dispoziciji. Hač do lěta 2023 chce předewzaće 80 procentow swojich ćahow z internetnym přistupom wuhotować. https://www.intercity.pl/de/
Bal za bjezdomnych wotměli
Krótkopowěsće (16.12.19)
Z plusbusom po puću być
Budyšin/Kamjenc. Z nowym jězbnym planom jězdźa w Budyskim wokrjesu tak mjenowane plusbusy. Mjez prěnimi štyrjomi zwiskami je linija 102 Budyšin–Kamjenc. Plusbusy posłužuja zastanišća hodźinsce přeco w samsnej mjeńšinje. Na te wašnje chcedźa wjesny rum lěpje ze srjedźnymi a hornimi centrami zwjazać. Tak jězdźi bus wšědnje nimo njedźele hač do pózdnjeho wječora.
Nimale 4 000 ludźi wupućowało
Kamjenc. Nimale 4 000 wobydlerjow Sakskeje je w minjenym lěće wupućowało, zdźěla krajny statistiski zarjad w Kamjencu. Najwjac ludźi přesydli so do Šwicarskeje, Awstriskeje a USA. Přerězna staroba wupućowacych bě 33 lět, a wjac hač połojca z nich běchu mužojo. Cyłkownje ćehnjechu Saksojo do 127 krajow, najwjetši dźěl pak wosta w Europje.
Kak na „wusydlenje“ zhladuja
