Krótkopowěsće (26.02.19)

wutora, 26. februara 2019 spisane wot:

Pojědu na 4. kongres maćicow

Budyšin. Maćica Serbska sćěhuje přeprošenje Maticy Słowakskeje na 4. kongres maćicow słowjanskich narodow w juniju w Martinje. To je předsydstwo serbskeho wědomostneho towarstwa wčera wobzamknyło. Do hłowneje zhromadźizny 9. měrca skedźbnja Maćica na spominanje w 13 hodź. při rowje swojeho bywšeho předsydy Michała Hórnika składnostnje jeho 125. posmjertnin.

Čłowjek wjelka njemorił

Waldhufen. Wjelka, kotrehož su minjeny štwórtk mortweho na ležownosći we Waldhufenje (wokrjes Zhorjelc) namakali, njeje čłowjek morił, kaž krajny kriminalny zarjad informuje. Po zdaću je jeho dalši wjelk zranił. Mortwe skoćo přepytuja nětko w Berlinskim Leibnizowym instituće za slědźenje coowowych a dźiwich zwěrjatow.

Zwěrjenc starši hač wočakowany

Krótkopowěsće (25.02.19)

póndźela, 25. februara 2019 spisane wot:

Spalene knihi w atlasu

Budyšin. Iniciator projekta „Spalene městna“ Jan Schenk přebywaše kónc tydźenja w Budyšinje. Sobotu sfotografowa wón skału na Lubijskej, hdźež běchu nacionalsocialisća 1933 knihi spalili. Wobrazy wozjewi w digitalnym atlasu, dokumentowacym dotal něhdźe 70 tajkich městnosćow „Akcije přećiwo njeněmskemu duchej“ w Němskej a Awstriskej.

Serbaj mjez kandidatami

Budyšin/Kamjenc. Z načolnymaj kandidatomaj Steffenom Grundmannom w Budyšinje a Marion Junge w Kamjencu nastupi Lěwica k wólbam měšćanskeju radow 26. meje. Pod hesłom „Město Budyšin wuhotować – socialnych problemow so jimać – prawicarskemu popu­­lizmej so spřećiwjeć“ staj mjez dźesać kandidatami Měrćin Bałcar a Handrij Nowak. W Kamjencu je 13 kandidatow.

Burski zwjazk so wobara

Krótkopowěsće (22.02.19)

pjatk, 22. februara 2019 spisane wot:

Přinošk Europy k škitej mjeńšin

Berlin. Społnomócnjeny Němskeje za narodne­ mjeńšiny prof. dr. Bernd Fabritius­ je wčera ekspertowu komisiju Europskeje­ rady k škitej Sintow a Romow Ad hoc Comitee of Experts on Roma and Traveller Issues (CAHROM) přijał. Na dźěłowej rozmołwje chwaleše Fabritius prócowanja­ Europskeje rady a wuzbě­hny wuznam ramikoweho dojednanja wo škiće narodnych mjeńšin.

Spěchuja wutwar Sakskeho koła

Drježdźany. Swobodny stat Sakska spěchuje wutwar wubědźowanišća motorskich Sakske koło. Kaž financne ministerstwo wčera zdźěli, móža přizwolene 900 000 eurow za přetwar znateje wubědźowanskeje čary motorskich nałožić. Ze spěchowanja profituje tež tamniši centrum za wobchadnu wěstotu. Modernizacija ma k přichodnym mišterstwam spočatk julija wotzamknjena być.

Přezmjezna inspiracija

Krótkopowěsće (21.02.19)

štwórtk, 21. februara 2019 spisane wot:

Digitalny pakt přińdźe

Drježdźany. Sakski kultusowy minister Christian Piwarz (CDU) wita dojednanje mjez Zwjazkom a krajemi, tak mjenowany digitalny pakt. „Je to dobra powěsć našim šulam“, Piwarz dźensa rjekny. Sakska ma za wutwar IT-infrastruktury na kubłanišćach něhdźe 250 milionow eurow dóstać. We wadźeńcy wo spěchowanje wu­twara su so Zwjazk a kraje wčera na změnu Zakładneho zakonja a na wurjadne rjadowanja dojednali.

Wusud wo wólbnym prawje

Karlsruhe. Zwjazkowe wustawowe sudnistwo je dźensa wusud wozjewiło, w kotrymž wobmjezowanje wólbneho prawa za zbrašenych jako wustawje njewotpowědowace wotpokazuje. Tež po sudniskim wukazu psychiatrisce zastarani jeći njesmědźa so „z demokratiskeho procesa wuzamknyć“, w spisu dale rěka.

Chinsku medicinu zběhnu

Krótkopowěsće (20.02.19)

srjeda, 20. februara 2019 spisane wot:

Miliony za wokrjesne dróhi

Kamjenc. Za wuporjedźenje zymskich škodow na dróhach přewostaji Sakska wokrjesej Budyšin 2,8 milionow eurow. To zdźěli dźensa zapósłanc krajneho sejma Alojs Mikławšk (CDU). Tež serbske komuny­ z toho profituja. Tak dóstanu Pančicy-Kukow 35 300 eurow, Chrósćicy 30 600, Njebjelčicy nimale 30 000 eurow, Ralbicy-Róžant 25 000 a Worklecy ně­hdźe 18 000 eurow, kaž z Kamjenskeho běrowa zapósłanca rěka.

Nowa spěchowanska směrnica

Drježdźany. Sakske knježerstwo je na swojim póndźelnym posedźenju wobzamknyło, směrnicu za spěchowanje sporta w swobodnym staće ponowić. Hladajo na „demografisku změnu, globalizaciju a hinaše žiwjenske wobstejnosće“ chcedźa zjawny sport přichodnje „fleksibelnišo a mjenje běrokratisce“ podpěrać. Lětsa inwestuja dohromady 60,3 miliony a klětu 59 milionow eurow.

Statysacy galaksisow wotkryli

Krótkopowěsće (19.02.19)

wutora, 19. februara 2019 spisane wot:

Za zhromadny kubłanski wjeršk

Ćisk. Serbski sejm je Zwjazkowe předsydstwo Domowiny, županki a županow na kubłanski wjeršk přeprosył. Zaměr je wuhódnoćić studiju wo serbskich kubłanskich poskitkach na braniborskich šulach, w přeprošenju rěka. Předsydka wuběrka za kulturu a kubłanje Serbskeho sejma Aneta Zahrodnikowa namołwja, wobsahowe a strukturne prašenja rozjimać a trěbne naprawy zhromadnje zwoprawdźić.

Přidatna podpěra muzejam

Drježdźany. Sakska podpěruje muzeje, kotrež njejsu w statnym nošerstwje, přidatnje z něšto wjace hač milionom eurow. To zdźěli dźensa statna ministerska za wědomosć a wuměłstwo dr. Eva-Maria Stange (SPD). Lětsa předwidźi swobodny stat za to wjac 700 000 eurow. Prěni raz spěchuje Sakska tež předewzaća digitalizacije a inkluzije, za čož je lětsa a klětu 250 000 eurow k dispoziciji.

Powjetša jadrowu milinarnju

Krótkopowěsće (18.02.19)

póndźela, 18. februara 2019 spisane wot:

Zazběh do projektoweho lěta

Donja Stubica. Něhdźe 30 młodostnych přebywaše hač do wčerawšeho na seminarje Młodźiny europskich narodnych mjeńšin „Kick Off“ w chorwatskej Donjej Stubicy, mjez nimi tež zastupnicy Pawka. Srjedźišćo tworješe diskusija wo zachowanju rěče a kultury. Seminarny tydźeń, wuhotowany wot młodostnych serbiskeje mjeńšiny w Chorwatskej, bě zazběh do projektoweho lěta 2019.

Ma kulturne srjedźišćo wostać

Budyšin. Serbski dom ma tež přichodnje kulturne srjedźišćo serbskich towarstwow wostać, informuje direktor Załožby za serbski lud Jan Budar w nowinskej zdźělence. Je to konsens rozmołwy ze zastupnikami Budyskeje župy, kulturneho wuběrka Domowiny a běrowa třěšneho zwjazka pjatk w Budyšinje. Kaž Budar dale zdźěla, su so na prěnje konkretne namjety dojednali, kotrež pak njemjenuje.

Nowe wubědźowanje zahajene

Krótkopowěsće (15.02.19)

pjatk, 15. februara 2019 spisane wot:

Prěnjej lawreataj z Ruskeje

Berlin/Choćebuz. We wobłuku filmoweho festiwala Berlinala wuhotowaneho rjadu East European Brunch su organizatorojo Choćebuskeho filmoweho festiwala prěnjeju lětušeju lawreatow swojeho zarjadowanja wozjewili. Wobaj staj z Ruskeje. Spěchowanske myto přiznaja producentce Larisy Gljebowej; myto Global Pitch Award dóstanje loni z „Lubinu“ počesćeny režiser Sergej Dworcewoj.

Klěšćow dla rizikowa kónčina

Drježdźany. Roberta Kochowy institut je wokrjes Saksku Šwicu-wuchodne Rudne horiny jako dalšu rizikowu kónčinu schorjenja na FSME zastopnjował. To zdźěla dźensa sakske ministerstwo za socialne a škit přetrjebarjow. Klěšće su so tež tam tak rozšěrili, zo móža strašne za strowotu­ ludźi być. Dotal su wokrjesy Budyšin, Zwickau, Vogtland a Rudne horiny jako rizikowe kónčiny postajene.

Maćerny dowol kontra karjerje

Krótkopowěsće (14.02.19)

štwórtk, 14. februara 2019 spisane wot:

Na bazy sej jednotu žadaja

Drježdźany. Rozestajenje wo tym, štó Serbow zastupuje, ma so zakónčić. Swoje wuprajenje jako hósć na njedawnym posedźenju Serbskeho sejma „zjawnosć za ćahańcu mjez sejmom a Domowinu žane zrozumjenje nima“, je Wojerowski župan Marcel Brauman napřećo powěsćerni dpa wčera wospjetował. Nadawk Domowiny je, wšěch za serbstwo angažowacych so zjednoćić.

Kandidaća za literarne myto

Lipsk. Wjeršk Lipšćanskich knižnych wikow je spožčenje literarneho myta. Dźensa bu lisćina nominowanych wozjewjena. Mjez druhim mataj tež němsce pisacy čěski awtor Jaroslav Rudiš a Feridun Zaimoğlu wuhlady na wuznamjenjenje w kategoriji beletrija. Jasny je hižo dobyćer spěchowanskeho myta nakładnistwow, kotrež přiznachu towarstwu Lesewelt Berlin za spěchowanje čitanja.

Rusojo Čěskej božemje praja

Krótkopowěsće (13.02.19)

srjeda, 13. februara 2019 spisane wot:

Tarifowe jednanja

Zhorjelc. Tuchwilne stawki wučerjow potrjechja posrědnje tež Zhorjelsku wo­krjesnu hudźbnu šulu. Tamniši kubłarjo žadaja sej domjacy tarif, kiž so na tym zjawneje słužby orientuje. Dołhož jednanja mjez krajnoradnym zarjadom a dźě­łarnistwom­ ver.di běža, stej so wobě stronje na to dojednałoj, zo stawk njebudźe.

Dźiwadło serbsce wita

Drježdźany. Do Dźiwadła młodeje generacije w Drježdźanach při zachodźe nětko tež w serbskej rěči witaja. Wo tym informuje dźensa Serbski rozhłós. Připrawjene je witanje za předwidźanu swójbnu njedźelu spočatk měrca, kotruž Budyske NSLDź a Drježdźanske towarstwo Stup dale zhromadnje wuhotujetej. NSLDź předstaji klankohru „Kito husličkar“ a AG serbšćina w krajnej stolicy hru „Módry banćik“.

Pjenjezy za sakske komuny

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND