Krótkopowěsće (14.04.23)

pjatk, 14. apryla 2023 spisane wot:

Festiwal z nowej strukturu

Zhorjelc. Wot 1. apryla tutoho lěta je Festiwal Łužica powšitkownosći wužitna towaršnosć z wobmjezowanym rukowanjom. Jeje nowa jednaćelka je Zhorjelčanka Maria Schulz. Dohladowanskej radźe přisłušeja zastupjerjo Zwjazka, Braniborskeje a Sakskeje kaž tež městow Zhorjelc a Choćebuz. Łužiski festiwal wotměje so lětsa wot 25. awgusta do 10. septembra.

Spomnjeće na Waršawski zběžk

Zhorjelc/Zgorzelec. Składnostnje 80. róčnicy zběžka we Waršawskim geće 1943 wobdźělitej so towarstwo Meetingpoint Memory Messiaen a załožba Pamięć, edukacja a kultura na 11. socialno-kubłanskej akciji „Nartuše“. 19. apryla chcedźa z pólskimi a němskimi młodostnymi papjerjane narcisy „jako symbol kolektiwneho spomnjeća“ mjez wobydlerjemi a hosćemi europskeho města rozdźělić.

Njepřećelski pozadk

Krótkopowěsće (13.04.23)

štwórtk, 13. apryla 2023 spisane wot:

Insolwenca hrozy

Zhorjelc. Gerharta Hauptmannowe dźiwadło Zhorjelc-Žitawa wojuje z masiw­nymi financnymi problemami. „Zwyšenja tarifow kaž tež inflacije dla pobrachuje našemu domej lětsa 1,3 miliony eurow“, rjekny intendant Daniel Morgenroth w interviewje ze sćelakom MDR. Hišće wjace lutować njemóža. Bjez přidatneje financneje pomocy „je insolwenca k štwórtemu kwartalej prawdźepodobna“.

Chcetej na „hłownej“ porěčeć

Budyšin. Połdra tydźenja do hłowneje zhromadźizny Domowiny předležitej zarjadej dwě přizjewjeni za diskusiju. Kaž třěšny zwjazk wčera zdźěla, chce so Maćica Serbska k temje „Serbska hymna“ wuprajić. Dale planuje kubłanski wuběrk Domowiny přinošk, wěnowacy so falowacym móžnosćam nałožowanja serbšćiny zwonka kubłanišćow.

80 000 eurow za wuměłcow

Krótkopowěsće (12.04.23)

srjeda, 12. apryla 2023 spisane wot:

Dana Němcová zemrěła

Praha. Čěska wojowarka za wobydlerske prawa a prjedawša disidentka Dana Němcová je 89lětna zemrěła. Wo tym je Załožba Olgi Havloveje wčera w Praze informowała, kotrejež zarjadnisku radu běše njeboćička dołhi čas nawjedowała. Němcová bě podpisarka a nachwilnje tež rěčnica hibanja Charty 77, kotrež bě so za dodźerženje čłowjeskich prawow w by­w­šej socialistiskej Čěskosłowakskej za­sadźiło.

Kritizuja „Poslednju generaciju“

Berlin. Zjednoćenstwo Fridays for future kritizuje nětko wotewrjene aktiwistow tak mjenowaneje „Poslednjeje generacije“. Nowinska rěčnica zdźěli: „Klimowa kriza trjeba cyłotowaršnostne rozrisanja a te namakamy jenož zhromadnje a nic w tym, zo ludźi we wšědnym dnju přećiwo sebi rozzłobimy.“ Přičina wote­wrjeneje kritiki běchu akcije „Poslednjeje generacije“ k jutram w Hamburgu.

Dwanata sezona z čołmom

Krótkopowěsće (11.04.23)

wutora, 11. apryla 2023 spisane wot:

Serbski přinošk na festiwalu

Lipsk. Na w srjedźnej Němskej produkowane krótkofilmy wusměrjeny festiwal „Kurzsüchtig“ bu dźensa w Lipsku zahajeny. Wosebity hóstny kraj je lětsa Čěska. Mjez paskami, kotrež so w cyłkownje šěsć segmentach wo wuznamjenjenje wubědźuja, je tež dokumentacija „Hinterberg“ režisera Erika Šyški.

Nowa Doba single wozjewiła

Budyšin. Skupina „Nowa Doba“ je wozjewiła nowu single. Hudźbna produkcija z titulom „nalěćo“ je mjeztym druha pokazka na album skupiny „stara šula“, kotryž ma w lěću wuńć. Za nowy spěw móžachu sebi Gretu Čórlichec jako interpretku zdobyć, kaž band na Instagramje piše. Spěw je wot wčerawšeho na wšěch streamingowych platformach přistupny.

300 póstow zběhnu

Krótkopowěsće (06.04.23)

štwórtk, 06. apryla 2023 spisane wot:

Jednanja bjez chłostanja

Kamjenc. Jednanja přećiwo Serbam-křižerjam, kotřiž běchu 2020 najebać zakaz procesionow wobrjad pěstowali, su nětko ze stron Kamjenskeho hamtskeho sudnistwa bjez chłostanja zakónčene. Sudnicy su paragraf 47 wotstawk 2 Zakonja wo přeńdźenjach přećiwo porjadej (OWiG) nałožowali. Tam rěka: „Sudnistwo chłostanje za přiměrjene nima“, kaž prawiznik Hajko Kozel informuje.

Serbska pěstowarnja dobyćerka

Kamjenc. Serbska pěstowarnja „Jan Radyserb-Wjela“ Budyšin je najbóle sportowska po cyłym wokrjesu. Jeje mustwo je wčera w Kamjencu prěnje městno „olympiady pěstowarnjow we wokrjesu“ dobyło. Kaž wokrjesny sportowy zwjazk informowaše, je so najlěpšich 22 wot 164 wobdźělenych pěstowarnjow na finalu wubědźowało. Druhe městno je „Kraj palčikow“ z Rakec docpěł.

Naše jutrowne jejka w Estiskej

Krótkopowěsće (05.04.23)

srjeda, 05. apryla 2023 spisane wot:

Milan Hrabal swoje basnje čitał

Drježdźany. Basnik Milan Hrabal z Varnsdorfa bě hósć čitanskeho rjadu „Literarne alfabety“ wčera w Drježdźanskim Měšćanskim muzeju. Wón přednjese před něhdźe 40 připosłucharjemi, mjez nimi wjacori Serbja, mnohe swoje basnje. Basnikaj Patrick Beck a Benedikt Dyrlich je němsce a zdźěla tež serbsce recitowaštaj. W zasadnje dwurěčnej – serbsce a němsce – bjesadźe po čitanju so Hrabal wo swojim tworjenju wupraji.

Z awdijoturu po Bórkowach

Bórkowy. Z „Awdijoturu Bórkowski duch časa“ móža sej hosćo błótowsku wjes wotkrywać. „Na pjeć wšelakich stacijach budźe šmóratko z powědarjom stawizničkow – bjezpłatne a w kóždym času“, rozprawja Jessica Ziebe, nawodnica wěcneho wobłuka turizm w hamće Bórkowy/Błóta. Woni zanurja so do swěta bajow a tradicijow, do stawiznow regiona z jeho wosebitosćemi.

Čěski prezident zaso w senaće

Krótkopowěsće (04.04.23)

wutora, 04. apryla 2023 spisane wot:

Syričan wjesnjanosta

Ostelsheim. W šwabskim Ostelsheimje su wobydlerjo 29lětneho Ryyana Alshebla za hłowu swojeje gmejny wu­zwolili. 2015 dyrbješe wón ze Syriskeje ćeknyć, nětko doby wón wólby ze 55,41 procentami wšěch wotedatych hłosow. Z tym zamó so wón přećiwo dwěmaj kandidatomaj přesadźić. Po swojim dobyću žněješe přewšo pozitiwny wothłós, ale tež někotre njelubozne komentary.

CDU podpěra hatarjow

Drježdźany. CDU w sakskim krajnym sejmje chce hatarjow w swobodnym staće bóle podpěrać. Hižo lěta bědźa so woni z přirodnymi njepřećelemi kaž bobrami abo wudrami, kiž wulku škodu načinja. Wčera je strona pozicisku papjeru předstajiła, w kotrejž su naprawy wopisane, kak móhli družiny zwěrjatow škitać.

Woheń na Vlčej horje

Krótkopowěsće (03.04.23)

póndźela, 03. apryla 2023 spisane wot:

Pawkojo w Awstriskej

Budyšin. Wčera podachu so štyrjo zastupjerjo Serbskeho młodźinskeho towarstwa Pawk na jutrowny seminar Młodźiny europskich narodnych skupinow (MENS) do Awstriskeje. Pod temu tradicije zaběra so tam cyłkownje 45 młodostnych z cyłeje Europy hač do Wulkeho pjatka ze swójskimi tradicijemi a pyta za móž­nymi nowymi pućemi, je přesadźić.

Sezonu ze swjedźenjom zahajili

Slopišća. W Błótach su čołmikarjo minjeny kónc tydźenja lěćnu sezonu zahajili. Zawčerawšim su prěnje čołmy w Slopišćach startowali, k čemuž su zamołwići tež wopytowarjow witali. Na swjedźenju je tež Lubnjowski žónski chór w serbskej swjedźenskej drasće wustupił. Tež na tamnych znatych blakach, kaž w Lubnjowje, zaso čołmy po groblach jězdźa.

Přihłosowanje je signal

Krótkopowěsće (31.03.23)

pjatk, 31. měrca 2023 spisane wot:

Serbske nałožki online

Budyšin. Towarstwo Serbski kulturny turizm informuje, zo je wotnětka „prěnje z dohromady sydom widejow wo serbskich nałožkach a cyrkwinskich swjedźenjach, nastatych loni we wobłuku wubědźowanja Simul+, pod https://sorben-tourismus.de kaž tež na Facebooku, Instagramje a Youtube“ přistupne. Klip wotbłyšćuje jutrowne tradicije w Serbach. W meji maja přinoški wo mejemjetanju a Božim ćěle slědować.

Do radneje žurle so tłóčili

Žitawa. Po swojim protesće přećiwo planowanemu kwartěrej za požadarjow azyla w měšćanskim dźělu Hirschfelde su so rozhorjeni wobdźělnicy wčera do radnicy w Žitawje tłóčili. Tam bě so paralelnje měšćanska rada schadźowała. Po słowach Žitawskeho wyšeho měšćanosty Thomasa Zenkera (Žitawa móže wjace) je „jasnje pře wjele a zdźěla jara agresiwnych wosobow do žurle“ přišło. Hłowa města je policiju wo pomoc wołał.

Madźarsku w „klubje“ powitał

Krótkopowěsće (30.03.23)

štwórtk, 30. měrca 2023 spisane wot:

Nowa społnomócnjena

Zhorjelc. Kati Struckowa je nowa hłownohamtska społnomócnjena za serbske naležnosće Zhorjelskeho wokrjesa. Wo­krjesny sejmik je jej zastojnstwo na swojim posedźenju wčera dowěrił. Wuzwolena dźěła dotal jako projektowa managerka Domowiny za Slepjanski region. Kaž radźićelam wčera připowědźi, chce wona serbsku rěč we wokrjesu skrućić.

Mjezynarodnej přinoškaj SI

Praha/Lwiw. Wědomostnikaj Serbskeho instituta wobdźělitaj so na slědźenskimaj konferencomaj w Ukrainje resp. Čěskej. Dźensa je dr. Fabian Kaulfürst na zarjadowanju Instituta za slawistiku Lwiskeje uniwersity digitalny němsko-delnjoserbski słownik předstajił. Dr. Friedrich Pollack přednošuje jutře w Praskim Masarykowym instituće wo „institucionalizowanju serbskeho stawiznopisa w Němskej demokratiskej republice“.

Dwělomny křiž skóncowali

Serbska debata

nowostki LND