Krótkopowěsće (08.09.22)

štwórtk, 08. septembera 2022 spisane wot:

„Hłowna“ w Delnjej Łužicy

Budyšin. Po wuradźowanju prezidija Domowiny namjetuje třěšny zwjazk serbskich towarstwow, swoju přichodnu hłownu zhromadźiznu klětu po jutrach w Delnjej Łužicy wuhotować. Nimo toho postajichu mjez druhim delegatow za kónc septembra wotměwacy so kongres Federalistiskeje unije europskich narodnych mjeńšin FUEN.

Pyta rozmołwu z wobydlerjemi

Drježdźany. Sakski ministerski prezident Michael Kretschmer (CDU) pyta dialog z wobydlerjemi. Kaž sakska statna kenclija zdźěli, ma być dźensniša rozmołwa z Riesaskim wyšim měšćanostu zazběh do rjada „MK direkt“ w lěće 2022. Kretschmer běše do pandemije na rozmołwne formaty pod hesłomaj „Sakska rozmołwa“ abo „Ministerski prezident direktny“ přeprosył.

Powjaznica změni mějićela

Krótkopowěsće (07.09.22)

srjeda, 07. septembera 2022 spisane wot:

Emmy za Olivera Lattu

Koćina/Los Angeles. Z Koćiny pochadźacy Oliver Latta je wčera w Los Angelesu zhromadnje z Teddyjom Banksom myto „Emmy“ přijał. Wuměłc z pseudonymom „extraweg“ bu wuznamjenjeny w kategoriji „Outstanding Main Title Design“ (někak: wusahowace wuhotowanje hłowneho titula) w ameriskej sciencefiction- seriji „Severance“, přistupnej na Apple TV.

Jubilej Serbskeho gymnazija

Budyšin. Serbski gymnazij Budyšin woswjeći jutře 75. róčnicu załoženja. Předwidźane je swjatočne zarjadowanje z čestnymi hosćemi, něhdyšimi šulerjemi prěnjeho maturitneho lětnika kaž tež z něhdyšimi wučerkami a wučerjemi. Aktualni šulerjo na ekskursiji po Budyšinje stejnišća zeznaja, hdźež je gymnazij něhdy zaměstnjeny był.

Dźesać miliardow za kredity

Krótkopowěsće (06.09.22)

wutora, 06. septembera 2022 spisane wot:

Wyši měšćanosta chce wurunać

Wojerecy. Wojerowski wyši měšćanosta Torsten Ruban-Zeh (SPD) je wčera wječor do tamnišeje Łužiskeje hale witał na lětne přijeće. W swojej narěči wón wuzběhny, zo serbstwo do Wojerec słuša. Kaž Serbski rozhłós informuje, je wón připowědźił, zo chce Domowinu a Serbski sejm na zhromadnu rozmołwu přeprosyć, w kotrejž chce jako „wurunowacy element“ skutkować.

Pjenjezy za ćěkancow

Drježdźany. Próstwa wo pjenježne dary za ukrainskich ćěkancow je wuspěšna. To zdźěli dźensa Zwjazk Carity Drježdźansko-Mišnjanskeho biskopstwa, kotryž bě před šěsć měsacami zhromadnje z partnerami namołwjał pjenjezy darować. Srědki maja wuhotowanju bydlenjow ćěkancow z meblemi słužić. Nazběrali su dotal 13 600 eurow, kaž direktor Carity Matthias Mitzscherlich zdźěla.

Planuja wobkružnu metro

Krótkopowěsće (05.09.22)

póndźela, 05. septembera 2022 spisane wot:

Udo Wićaz wuzwoleny

Połčnica. Na zjězd Budyskeho wokrjesneho zwjazka CDU je wjace hač 90 čłonow minjeny pjatk do Połčnicy přichwatało. Woni wuzwolichu za noweho předsydu Uda Wićaza, kotremuž zastojnstwo ze 94,25 procentami hłosow dowěrjachu, a nowe wokrjesne předsydstwo. Dotalny předsyda Michael Harig rozžohnowaše so z rozprawu dźěławosće zwjazka, kotryž bě 13 lět dołho nawjedował.

Bahno znowa wožiwić

Ćisk. W Ćiskowskim holanskim bahnje zahaja dźensa rewitalizaciju. Do hrjebjow připrawja fachowcy pochowe plomby z bahnowych płoninow. Je to dźěl projekta krajneho zarjada za wobswět, ratarstwo a geologiju (LfULG) a statneho zawoda Sakski lěs. Z projektom areal po wjacorych krokach sensibilizować a znowa powłóžnjeć.

Žurnalistow nadběhowali

Krótkopowěsće (02.09.22)

pjatk, 02. septembera 2022 spisane wot:

Zwjazkowy kancler we Łužicy

Sprjewiny Doł. Na přeprošenje zwjazkoweho kanclera Olafa Scholza (SPD) chcychu so ministerscy prezidenća wuchodoněmskich brunicowych krajow dźensa k rozmołwje wo strukturnej změnje w Sprjewinym Dole schadźować. Tak měli so prěnje naprawy w zwisku ze strukturnej změnu bilancować. Wuchodoněmske kraje přeja sej za strukturnu změnu wjace dynamiki a zawjazliwosće.

Čoło zarjada zaso dospołne

Budyšin. Nowy Budyski krajny rada Udo Wićaz (CDU) a nowa přirjadnica dr. Romy Reinisch staj wčera swoje zastojnstwo nastupiłoj. Wićaz witaše na swojim prěnim terminje 22 nowych wučomnikow a na dalšim dr. Reinisch, kotraž měješe na to termin w Kamjencu. Udo Wićaz naslěduje Michaela Hariga (CDU) a Romy Reinisch Birgit Weber.

„Covidowy stołp“ z prašakami

Krótkopowěsće (01.09.22)

štwórtk, 01. septembera 2022 spisane wot:

Inowaciske myto dóstali

Choćebuz. Za wuwiće a konstrukciju wosebiteho 3D-ćišćaka je předewzaće MCR Engineering Łužyca, kotrež přisłuša koncernej Łužiska energija a milinarnje (LEAG), inowaciske myto wobłuka metal Braniborskeje dóstało. Wčera su wuznamjenjenje na Hrodźe Neuhardenberg přepodali. Z inowaciskim mytom hódnoći Braniborska kreatiwne ideje a produkty.

Graffiti sej wotnjesć móc

Praha. Festiwal twórcow graffiti „Off the Wall“ zarjadowachu minjeny kónc tydźenja w čěskej stolicy. 160 metrow dołha barokowa murja w historiskej štwórći Malá Strana bu wot sprayerow pomolowana. Tež pasanća móžachu ideje přidać. Škoda pak žana njenasta, dokelž bě murja do toho z wosebitymi zejmowacymi platami nakładźena. Tute chcedźa w septembrje přesadźować.

Serbowka w Americe

Krótkopowěsće (31.08.22)

srjeda, 31. awgusta 2022 spisane wot:

Bjezdźěłnosć přiběrała

Budyšin. We wuchodnej Sakskej bě w awgusće 16 933 bjezdźěłnych, 588 wjace hač w juliju. Tele wuwiće su w Budyskej wotnožce Zwjazkoweje agentury za dźěło wočakowali, je předsydka jednaćelstwa Kathrin Groschwald w nowinskej informaciji citowana. Jedna z přičinow je, zo přeńdźechu připućowani ukrainscy ćěkancy ze zamołwitosće zarjada za wukrajnikow do wobłuka jobcentera.

Stipendij do Radworja

Radwor. Sakski minister za kultus Christian Piwarz (CDU) přepoda jutře 35 młodostnym stipendij za přebytk we wukraju. Woni pojědu kónc septembra do Francoskeje, Wulkeje Britaniskeje, Malty a Italskeje, zo bychu tamnišu rěč nawuknyli. Mjez stipendiatami, kotřiž budu w hóstnych swójbach přebywać, su šulerjo z Radworskeje wyšeje šule a ze swobodneje šule Rěčicy.

Dialog tež nazymu zmóžnić

Krótkopowěsće (30.08.22)

wutora, 30. awgusta 2022 spisane wot:

Protokole digitalnje přistupne

Budyšin. Dalšich 243 aktow Budyskeho měšćanskeho archiwa je digitalizowanych. Jedna so wo protokole zhromadźi­znow Budyskich měšćanskich zapósłancow wot 1832 hač do 1945. Wone dokumentuja nastaće a dźěło w měrcu 1831 prěni raz woleneho wobydlerskeho zastupnistwa. Do toho bě jenož wosobam z priwilegowanych kruhow přistup k měšćanskim gremijam móžny. Protokole su nětko online přistupne.

Najsłónčniše lěćo scyła

Offenbach. Lětuše lěćo je po dotalnych ličbach Němskeje wjedroweje słužby najsłónčniše zašłych 70 lět. Dohromady su inkluziwnje prognozy hač do kónca měsaca 817 słónčnych hodźin naměrili. Dotalny rekord bě lěćo 2003 ze 793 hodźinami słónca w Němskej. 1951 su započeli zapisować, kak dołho słónco swjeći.

Nowinka při „wuchodźowanju“

Krótkopowěsće (29.08.22)

póndźela, 29. awgusta 2022 spisane wot:

Mytuja projekty digitalizacije

Drježdźany. Sakske ministerstwo za hospodarstwo, dźěło a wobchad spožči lětsa prěni raz „Sakske digitalne myto“ za „inowacije na polu digitalizacije“. Hač do 2. septembra móža w swobodnym staće bydlacy namjety we wobłukach „towaršnosć“, „hospodarstwo“ a „open source“ zapodać, a to pod https://buergerbeteiligung.sachsen.de. Dobyćerjam kiwaja myta w hódnoće cyłkownje 165 000 eurow.

Sezona hribow so hišće dliji

Lipsk. Hribowa sezona so lětsa w Sakskej jenož pomału zahaji. Lěto bě dotal jara suche a tež dešća njeje so minjene dny wšudźe dosć našło. Zo bychu hriby rostli, trjebaja wone spadki, rjekny Heike Bunk, kotraž je w Lipsku jako poradźowarka za hriby zasadźena. Njezmějemy-li temperatury wyše 30 stopnjow celsiusa a změjemy-li dalše spadki, móhła w přichodnych tydźenjach prěnja prawa žołma hribow być.

Wětrnikowy megapark

Krótkopowěsće (26.08.22)

pjatk, 26. awgusta 2022 spisane wot:

„Sorbisch? Na klar.“ z podcastom

Drježdźany. Pod hesłom „Tu móžeće sej něšto naposkać!“ poskići imagowa kampanja „Sorbisch? Na klar.“ nětko tež podcast. W nim maja připosłucharjo móžnosć, serbske wosoby zeznać. W premjernej epizodźe je Delnjoserbowka Hella Stoletzki z hosćom. Jako jingle přewodźa podcast spěw „Dwaj Hrodaj“ skupiny Astronawt. (Čitajće tež w Předźenaku.)

Smjerdźečenjo w Strakonicach

Strakonice. Na 24. mjezynarodnym festiwalu dudakow w čěskich Strakonicach wobdźěli so wot wčerawšeho hač do njedźele Serbska rejwanska skupina Smjerdźaca. Nimo 20 rejwarkow a rejwarjow, dweju dudakow a dalšich hudźbnikow z Łužicy předstaja tam 16 dalšich skupin ze Słowakskeje, Chorwatskeje, Běłoruskeje a Pólskeje swój program.

Z łódźu po Berzdorfskim jězorje

Serbska debata

nowostki LND