×

Powěsć

Failed loading XML...

Krótkopowěsće (24.02.21)

srjeda, 24. februara 2021 spisane wot:

Harig za procesiony

Budyšin. Křižerske procesiony měli lětsa přewjesć. Za to wupraja so Budyski wo­krjesny zwjazk CDU. Kaž jeho předsyda, krajny rada Michael Harig, dźensa zdźěli, je „křesćanske poselstwo runje w tychle ćežkich časach přewšo wažne. Po tym zo dyrbjachu procesiony loni korony dla prěni raz wupadnyć, smy za to, je lětsa zmóžnić. Wuměnjenje pak je, zo so po­łoženje infekcijow dla dramatisce nje­pohubjeńši.“

Incidenca stupała

Budyšin. Najebać wjacore přepytowane podhlady njejsu dotal žane natyknjenje z britiskej mutantu koronawirusa w Budyskim wokrjesu zwěsćili. Wčera mějachu tam dźesać nowych infekcijow. Ličba smjertnych padow powjetši so ­wo jedyn na dohromady 634. Indicenca bě 85,66. W Zhorjelskim wokrjesu registrowachu wčera 53 dalšich natyknjenjow a stupacu incidencu 71,62.

Wosebite česćowanje

Krótkopowěsće (23.02.21)

wutora, 23. februara 2021 spisane wot:

Přirada załožby wuradźowała

Budyšin. Financne połoženje Załožby za serbski lud, serbske projekty we wobłuku strukturneje změny, digitalizacija a trěbny dorost wučerjow w serbskich šulach a kubłarjow w pěstowarnjach běchu hłowne temy wčerawšeho internetneho wuradźowanja parlamentariskeje załožboweje přirady, kaž jeje předsyda přirady Marko Šiman (CDU) informuje.

Hakle krótko do termina přińć

Budyšin. Zo bychu dlěšemu čakanju zadźěwali, prosy Budyski wokrjesny zwjazk DRK ludźi, kotřiž dadźa so w Kamjenskim šćěpjenskim centrumje pře koronu šćěpić, tam hakle krótko do swojeho termina přińć. Budyski wokrjes rozprawješe wčera wo šěsć nowonatyknjenjach a pjeć smjertnych padach, incidenca wučinješe 86. Zhorjelski wokrjes měješe jednoho ze­mrěteho a incidencu 63,31.

Delnjoserbski film myto dóstał

Krótkopowěsće (22.02.21)

póndźela, 22. februara 2021 spisane wot:

Ličbu zemrětych wudospołnili

Budyšin. Wčerawša incidenca w Budyskim wo­krjesu bě 88 a tuž tak wysoka kaž cyły minjeny tydźeń nic. Wot pjatka hač do njedźele informowaše krajnoradny zarjad wo 121 nowonatyknjenjach z koronawirusom a 44 smjertnych padach. 41 z nich njeje aktualneho, ale staršeho datuma. Wo­krjes Zhorjelc rozprawješe wčera wo dźewjeć nowych padach korony a wo incidency 63,71.

Wirtuelnje sej pohrajkali

Budyšin. Wirtuelnje wuhotowana hra „Tabu“ je předwčerawšim něhdźe 30 zajimcow na stronu schadźowanka.de wabiła. Za poskitk zamołwita Załožba za serbski lud kaž tež techniski nawoda Michał Cyž hódnoćitaj to jako wuspěch. Budźe-li wobdźělenje na přichodnych, na stronje wotměwacych so zarjadowanjach podobne, chcetej poskitk dale rozšěrić.

Přezmjezny „gšeft“ dale kćěje

Krótkopowěsće (19.02.21)

pjatk, 19. februara 2021 spisane wot:

Karantena podlěšena

Budyšin/Zhorjelc. Karantena za pozitiwnje na koronu testowanych podlěši so wot dźesać na 14 dnjow – runja telko kaž za tak mjenowane kontaktne wosoby. W Budyskim wokrjesu potrjechi to aktualnje 780 ludźi. Hač do wčerawšeho zwěsćichu tu 30 dalšich natyknjenych, incidenca wu­činješe 84,66. W Zhorjelskim wokrjesu běchu to 30 infekcijow a štyri smjertne pady, incidenca tam bě 76,76.

Planuja wulět ze swjedźenjom

Drježdźany. Na wulět srjedź awgusta do Čornochołmčanskeho Krabatoweho młyna su so wobdźělnicy njedawneho Serbskeho blida towarstwa Stup dale internetnje dorozumili. W Čornym Chołmcu chcedźa Drježdźanjenjo wuhotować za sebje a za zajimcow mały swjedźeń poezije, ze serbskimi awtorkami a awtorami kaž tež z rejkami Drježdźanskich dźěći w narodnej drasće.

Loni wjele mjenje hosći měli

Krótkopowěsće (18.02.21)

štwórtk, 18. februara 2021 spisane wot:

Incidenca spadnyła a wostała

Budyšin/Zhorjelc. We wokrjesu Budyšin je tuchwilu 270 z koronawirusom natyknjenych, 71 wjace hač wčera. Štyri schorjene wosoby su zemrěli. Incidenca tu je snadnje na 85 spadnyła. W Zhorjelskim wokrjesu bě 40 nowoinfekcijow a sydom smjertnych padow. Tamniša incidenca je dale 87,45. Dalše mutacije njejsu we woběmaj wokrjesomaj zwěsćili.

Znowa z wosebitej kategoriju

Budyšin. Towarstwo Serbska murja skići wšěm, kotřiž so rady w aplikaciji cyłka QuizSerb wubědźuja, lětsa znowa wosebitu kategoriju k jutram. Wot wčerawšeho móža zajimcy swoju wědu wokoło jutrow w Serbach přepruwować, rozšěrić a skrućić. Kategorija „Jutry w Serbach“ je najprjedy hač do njedźele po jutrowničce přistupna, kaž Serbska murja na Instagramje informuje.

Chorych do Němskeje wozyć

Krótkopowěsće (17.02.21)

srjeda, 17. februara 2021 spisane wot:

Wirus mutěrował

Budyšin. Budyski wokrjes je wčera w zwisku z koronawirusom wo jědnaće natyknjenjach a wo dalšich pjeć k cyłkownje 580 smjertnym padam rozprawjał. Z 263 schorjenych (-36) lěkuja 26 (+5) w chorowni. Incidenca tu wučinješe 85,66. Mjez 32 nowoinfekcijemi wčera w Zhorjelskim wokrjesu jedna so w jednym padźe wo dalšu mutaciju wirusa. 13 pacientow je zemrěło. Incidenca tam bě 87,45.

Žana politiska popjelna srjeda

Drježdźany/Budyšin. Tradicionalna politiska popjelna srjeda sakskeje CDU dźensa wječor w Budyšinje koronapandemije dla wupadnje. „Wotpowědujo kře­sćansko-židowskemu wodźacemu wo­brazej zasadźam so za solidarisku towaršnosć. To mje zawjazuje swojich blišich po wšěch móžnosćach škitać“, je serbski zapósłanc krajneho sejma Marko Šiman wčera wotprajenje wopodstatnił.

Dalša wirtuelna serbska bjesada

Krótkopowěsće (16.02.21)

wutora, 16. februara 2021 spisane wot:

Wobmjezowani zběhnjenej

Budyšin. Zakaz, bydlenje w nocy wopušćić, a pohibowanski radius 15 kilometrow stej w Budyskim wokrjesu wot dźensnišeho, w Zhorjelskim wokrjesu hižo wot wčerawšeho zběhnjenej. We wo­krjesu Budyšin zwěsćichu wčera dwanaće dalšich natyknjenjow z koronawirusom a dźesać smjertnych padow. Incidenca wučinješe 83,66. Jednu nowoinfek- ciju a třoch zemrětych mějachu we wo­krjesu Zhorjelc, hdźež bě incidenca 87,84.

Wjace tworow z Pólskeje

Waršawa. Podźěl z Pólskeje do Němskeje wuwožowanych tworow wučinješe loni 28,9 procentow cyłkownych eksportow, to stej 1,2 procentaj wjace hač lěto do toho, kaž pólski statistiski zarjad zdźěli. Hódnota eksportow z Pólskeje je loni wo 3,9 proc. na 68,3 miliardy eurow přiběrała, importy z Němskeje woteběrachu tam wo pjeć procentow na 49,3 mrd. eurow.

Žně aronije chětro ćerpjeli

Krótkopowěsće (15.02.21)

póndźela, 15. februara 2021 spisane wot:

Hišće žane mutacije njezwěsćili

Budyšin. W Budyskim wokrjesu dotal žane mutacije koronawirusa dopokazali njejsu. Kaž strowotniski zarjad wčera zdźěli, su za dźesać podhladnych padow ze wšelakich laborow sekwenciju genoma do nadawka dali, wuslědki hišće njepředleža. Nowych natyknjenjow bě wot minjeneho pjatka 111. Wčerawša incidenca wuči­nješe 81. Zhorjelski wokrjes mjenowaše wčera incidencu 88,63.

Kubicec złoži intendancu SLA

Budyšin. Judith Kubicec swoje dźěło jako intendantka Serbskeho ludoweho ansambla wotpowědnje dźěłowemu zrěčenju 31. julija zakónči. Podlěšenju zrěčenja njeje wona přihłosowała. Minjeny pjatk je sobudźěłaćerstwo wo tym informowała, kaž w zdźělence SLA rěka. Mjezynarodnje připóznata dirigentka bě zastojnstwo w awgusće 2018 přewzała.

Znajachu Słowjenjo runy?

Krótkopowěsće (12.02.21)

pjatk, 12. februara 2021 spisane wot:

Ličba zemrětych dale přiběra

Budyšin. W Budyskim wokrjesu zwěsćichu wčera w zwisku z koronawirusom 50 nowonatyknjenjow a sydom smjertnych padow. 467 wosobow (+31) je schorjenych. Incidenca je 106. Zhorjelski wo­krjes informowaše wčera wo 43 nowych infekcijach a dalšich 13 zemrětych pacientach za dobu wot 28.11. 2020 hač do 4. februara. Incidenca tam je 95,36.

Wabja digitalnje wo šulerjow

Worklecy. Worklečanska wyša šula „Michał Hórnik“ wabi nětko digitalnje wo nowych šulerjow. Pod hesłom „zetkawanski dźeń za 4. lětnik“ předstajitej šulerce Lea a Pia w njecyłych dźewjeć minutach swoju šulu. Mjez druhim rěčitej ze šulskej socialnej dźěłaćerku a z nawodu kubłanišća. Tež nowa sportowa hala, kabinet za wučbu chemije a šulerska kuchnja hraja rólu.

Nowy poskitk Serbskeho muzeja

Krótkopowěsće (11.02.21)

štwórtk, 11. februara 2021 spisane wot:

Incidenca pod 100 padnyła

Budyšin. Wokrjesny strowotniski zarjad je wčera wo 73 zwěsćenych nowonatyknjenjach z koronawirusom a pjeć smjertnych padach w zwisku z nim w Budyskim wokrjesu informował. Wot 436 schorjenych (-6) lěkuja 99 (+9) w chorowni. Incidenca je tu 114,6. Zhorjelski wo­krjes je wčera wo 54 nowoinfekcijach a 19 zemrětych pacientach rozprawjał. Incidenca tam je ze 96,94 pod sto padnyła.

Nowe Płomjo online

Budyšin. Februarske čisło serbskeho dźěćaceho časopisa Płomjo je w interneće přistupne. Zamołwity redaktor Pětr Šołta je jón pod https://www.yumpu.com/xx/document/read/65287595/plomjo online stajił. Wudaće chowa w sebi mjez druhim dožiwjenske rozprawy dźěći wo dowolowym času. Na čitarjow čakaja trysk z Feliksom a Florianom, powědančka, hódančka a rozprawy.

Dźěćom bjezpłatny ćopły wobjed

Serbska debata

nowostki LND