Krótkopowěsće (22.07.20)

srjeda, 22. julija 2020 spisane wot:

Nowe myto wupisane

Choćebuz. Město Choćebuz je prěni króć „Integraciske myto Leimöl“ wupisało. Z nim chce čestnohamtski angažement wo migracisku towaršnosć hódnoćić. Myto přewostaji jednotliwcam, skupinam a towarstwam kaž tež projektam w třoch kategorijach. Hač do 6. septembra móža Choćebuženjo namjety měšćanskemu zarjadnistwu zapodać. 26. septembra chcedźa myto spožčić.

Měsće dóstanjetej pjenjezy

Drježdźany. Sakske knježerstwo přewostaji městomaj Drježdźanam a Žitawje 200 000 eurow, zo móhli swoje kulturne projekty z požadanja kulturneje stolicy 2025 zwoprawdźić. Wobě měsće stej wulkotne ideje wuwiłoj ze zaměrom europsku zakładnu mysl a měšćanske zhromadźenstwa skrućić. Druhe koło wubědźowanja pak njejstej bohužel docpěłoj.

Čěsko-słowakske kwasy

Krótkopowěsće (21.07.20)

wutora, 21. julija 2020 spisane wot:

Turistiska branša ćerpi

Kamjenc. Turistiska branša w Sakskej ćerpi pod koronapandemiju. Kaž krajny statistiski zarjad w Kamjencu wčera zdźěli, bě w meji 76 procentow mjenje ludźi Saksku wopytało. Wosebje wukrajni turisća njemóžachu zawrjeneje mjezy dla do regiona přińć. Wot 15. meje wšak móža hotele, pensije a dalše přebywa­nišća hosći zaso witać. Ličby so tuž po­něčim pozitiwnje wuwiwaja.

Čestny hamt měsaca

Kumwałd. Šefredaktora Domizniskeje nowiny Czorneboh-Bieleboh Matthiasa Hempela je Budyski krajny rada Michael Harig (CDU) nětko za „čestny hamt měsaca“ wuznamjenił. Wot lěta 1990 wuchadźa nowina jako hamtske łopjeno gmejny Kumwałd w zamołwitosći na­wody hłowneho zarjada Hempela. Lěta 2007 poda so Hempel na předwuměnk, wěnujo pak so dale gmejnskej nowinje, kotraž hač do 24 stron wopřijima.

Knihownja přećehnje

Krótkopowěsće (20.07.20)

póndźela, 20. julija 2020 spisane wot:

Astronawt widejo wozjewił

Budyšin. Jako zazběh noweho hudźbneho projekta je skupina Astronawt wčera prěni hudźbny widejo za spěw „Dwaj hrodaj“ na YouTube a Instagramje wo­zjewiła. Z dalšimi widejemi chcedźa młodźi hudźbnicy serbski poskitk w inter­neće wobstajnje rozšěrjeć. Podpěru maja wot Załožby za serbski lud a wot kam­panje „So geht sächsisch“.

Lions-klub ma nowu prezidentku

Budyšin. Rěčespytnica Serbskeho instituta dr. Jana Šołćina je nowa prezidentka Budyskeho Lions-kluba. Jedne lěto­ chce wona jón nětko nawjedować. Za swój wosebity nadawk ma Šołćina nowych­ čłonow wabić. Zdobom chce wědo­mje za serbšćinu a zajim za druhe rěče budźić, kotrež w kóždym padźe k wulkim rěčam swěta njesłušeja.

Schultze Serbow wopytał

Krótkopowěsće (17.07.20)

pjatk, 17. julija 2020 spisane wot:

Wutwar wětrnikow so dliji

Lipsk. Sakska ma so ćežko z wutwarom wětroweje energije. Dohromady su lětsa w prěnim połlěće jeničce pjeć nowych wětrnikow z wukonom 20,7 megawattow přizwolili. To wuchadźa z dotalnych ličbow fachoweje agentury za wětrowu energiju, kotrež powěsćerni dpa před­leža. Dźěłać započeli su jeničce tři při­prawy z wukonom 8,2 megawattow. Po cyłym Zwjazku bě to w samsnym času 116 wětrnikow z 587 megawattami.

Wulka kulturna strata

Grodk. Město Grodk wobhladuje wotprajeny domizniski swjedźeń koronapandemije a z njej zwisowacych wěstotnych postajenjow dla jako wulku kulturu stratu, kaž dźensa z tamnišeje radnicy rěkaše. Dokelž wot toho potrjecheni partnerojo podawka hospodarsce wosebje ćerpja, je jim kulturny wobłuk měšćanskeho zarjadnistwa hižo poskitk za domizniski swjedźeń 2021 sposrědkował.

Posledni sněh wottał

Krótkopowěsće (16.07.20)

štwórtk, 16. julija 2020 spisane wot:

Wo prawicarstwje debatowali

Drježdźany. Sakski krajny sejm je na swojim dźensnišim poslednim posedźenju do lětnjeje přestawki tež wo prawicarskim ekstremizmje diskutował. Temu běchu na próstwu CDU, SPD a Zelenych na dnjowy porjad stajili. Knježerstwo je namołwjene, hač do kónca lěta cyłkowny koncept přećiwo prawicarskemu ekstremizmej w kraju zdźěłać.

Z komisariskim prezidentom

Berlin. Koncern Bombardier Transportation je dźensa wozjewił, zo skutkuje Marco Michel wotnětka komisarisce jako prezident regiona srjedźa, wuchodna Europa a Israel. Wón naslěduje Michaela Fohrera, kiž je Bombardier Transportation z wosobinskich přičin wopušćił. Hišće­ kónc junija bě Fohrer ze sakskim knježerstwom wo stejnišćomaj Bombardier w Budyšinje a Zhorjelcu rěčał.

Projekty za jězorinu zapodać

Krótkopowěsće (15.07.20)

srjeda, 15. julija 2020 spisane wot:

Nadawk za wustawoškit

Drježdźany. Sakski minister nutřkowneho Roland Wöller (CDU) ma protesty přećiwo korona-naprawam z wobdźělenjom prawicarskich ekstremistow za nadawk wustawoškita. Tajke wuwiće njesmě so prosće ćerpjeć. Minister poćahuje so při tym wosebje na protesty při zwjazkowej dróze B 96 w Hornjej Łužicy.

Z nowym předsydstwom

Kulow. Wyšej měšćanostaj Biskopic a Kamjenca prof. dr. Holm Große a Roland Dantz hromadźe z Ronaldom Homolu z Kulowa, Sandrom Fiebigom z Wojerec a Veitom Großmannom z Großröhrsdorfa chcetaj wobsahowe dźěło Swobodnych wolerjow Budyšin z.t. w přichodnych pjeć lětach dale wuwiwać. Čłonska zhromadźina bě jich njedawno do noweho předsydstwa wuzwoliła.

Worjoł zaso na hrodźe

Krótkopowěsće (14.07.20)

wutora, 14. julija 2020 spisane wot:

Šulerka na koronu schorjeła

Budyšin. We wokrjesu Budyšin je nowy koronapad. Tudyši krajnoradny zarjad wčera informowaše, zo běše test pola šulerki Kamjenskeho Lessingoweho gymnazija pozitiwny. Kontaktne wosoby su spěšnje zwěsćili a do karanteny pósłali. Wuslědki jich testow hišće njepředleža. Šulski wotběh njeje wohroženy, kaž z krajnoradneho zarjada rěka.

Halowu kupjel dale planuja

Budyšin. Přetorhnjene planowanja za narunanski nowotwar Kamjenskeje haloweje kupjele móža dale wjesć. Budyski wokrjesny sejmik je na swojim wčera­wšim posedźenju zarjadnistwu nadawk dał, dwě warianće přepytować dać. Prěnja je basenk z pjeć čarami, druha ze šesć čarami a ze sawnu. Inwesticija njesměła 15 milionow eurow překročić. Wo doskónčnej warianće sejmik klětu rozsudźi.

Nowy terminal za spěšnoćahi

Krótkopowěsće (13.07.20)

póndźela, 13. julija 2020 spisane wot:

Rěčne rumy nadal najwažniše

Budyšin. Serbscy čłonojo rady Załožby za serbski lud su minjenej pjatk a sobotu w sprjewinym měsće klawsuru wotměli. Mjez druhim rozmyslowachu wo tym, kak spěchowanje sylnišo na priority wu­směrić. Ćežišći běštej regionalizacija a skrućenje serbskich rěčnych rumow. Nazymu ma wothłosowanje zakónčene być, zo móhli přiměrjene naprawy w klětušim hospodarskim planje wobkedźbować.

Wuspěšna wabjenska akcija

Budyšin. Wabjenska akcija Marketingoweje towaršnosće Hornja Łužica-Delnja Šleska (MGO) „Ekstaza čućow Hornja Łužica“ bě minjene tři tydźenja jara wuspěšna. Něhdźe dwanaće milionow ludźi je z akciju docpěła, kaž MGO zašły pjatk zdźěli. Wabili su w bliskowobchadnych srědkach w Drježdźanach a Kamjenicy, w socialnych syćach kaž tež w radiju.

Schüle so Mundej dźakowała

Krótkopowěsće (10.07.20)

pjatk, 10. julija 2020 spisane wot:

Serbski swjedźeń wupadnje

Serbin. Lětuši „Wendish fest“, swjedźeń potomnikow něhdy do Texasa wupu­ćowanych Serbow, koronapandemije dla wupadnje. 27. septembra planowane zeńdźenje by so 32. raz wotměło. Kaž zarja­dowanje wuhotowace towarstwo Texas­ Wendish Society na swojej homepage pisa, „organizatorojo rozsud jara wobžaruja. Wjeselimy pak so na klětu!“

Jězdźenki płaća tež w awgusće

Budyšin. Dobru powěsć za čas lětušich wulkich prózdnin maja wobchadne předewzaća pod třěchu ZVON za šulerjow z měsačnej abojězdźenku. Hódnotna znamka (Wertmarke) za julij płaći tež w awgusće. To rěka, zo móža ći šulerjo we wobłuku ZVON wšitke busowe a železniske linije wužiwać. Julijsku znamku njeměli preč ćisnyć, warnuje ZVON, wona je zdobom w awgusće připóznata.

Dóstanu připłatk za přebytk

Krótkopowěsće (09.07.20)

štwórtk, 09. julija 2020 spisane wot:

Kawsu Prožym prawje rjadować

Choćebuz. Zelena liga namołwja knježerstwo Braniborskeje, „planowanja kołowokoło jamy Wjelcej-juh hišće lětsa w lěću zahajić. Wuchowanje Prožyma měło ručež móžno prawniskeje zawjazliwosće nabyć“, w zdźělence towarstwa rěka. Nimo toho měli so zamołwići intensiwnišo rekultiwowanju wěnować.

Wo wuskutkach wuradźowali

Slepo. Regionalni rěčnicy a referenća Domowiny su wčera w Slepom wura­dźowali. Ćežišćo bě strukturna změna w brunicowym regionje. „Po zakónčenju hórnistwa so lětdźesatki trajace rozestajenja wo přesydlenju skónča. Nadawk wostanje, serbsku rěč wozrodźić a kulturu pod měnjacymi wuměnjenjemi wu­wiwać“, Domowina informuje.

Suchota wobwliwuje kulturu

Serbska debata

nowostki LND