Krótkopowěsće (30.01.24)
Kompetency přepruwuja
Drježdźany. Na zakładźe wuslědkow kubłanskich přepytowanjow přewjedu so lětsa 28. a 29. meje přepytowanja kompetencow šulerjow 2. lětnika na wšitkich zjawnych zakładnych a spěchowanskich šulach w Sakskej. W předmjetomaj němčinje a matematice chcedźa tak rozdźěle w dale a heterogenišim šulerstwje zwěsćić.
Rjemjesło nadal woblubowane
Drježdźany. Zajim za rjemjeslniske wukubłanje bě tež loni w Sakskej wulki. Kaž zdźěli rjemjeslniski zwjazk Sakskeje póndźelu, podpisa 2023 5558 wučomnikow swoje wukubłanske zrěčenje. Tole běchu jeno dźewjeć mjenje hač hišće 2022. Přirunujo z předlońšim běchu wosebje městna jako muler a rybar prašane.
Městnosće UNESCO we Łužicy
Mužakow. Na dźensnišim wuradźowanju zastupjerjow městnosćow UNESCO we Łužicy wo lětušich projektach wobdźělitaj so tež referentaj Domowiny Clemens Škoda a Pětr Brězan. Do zwjazka „UNESCO5“ słušeja nimo Błótow, hornjołužiskeje hole a hatow, Mužakowskeho parka a zahorka tež nałožki serbskeho ludu. Tema dźensa budźe mjez druhim lěpša zhromadna prezentacija w přichodźe.
Krótkopowěsće (29.01.24)
Serbski wosadny zwjazk so zešoł
Hodźij. Na hłownej zhromadźiznje Serbskeho wosadneho zwjazka předwčerawšim w Hodźiju wuradźowachu zastupjerjo a zastupjerki dwurěčnych ewangelskich wosadow cyrkwinskeho wobwoda Budyšin-Kamjenc wo swojim dźěle. Serbski superintendent Krystof Rummel poda přehlad wo wobšěrnych aktiwitach. Lětsa wočakuje Serbski wosadny zwjazk wopyt biskopa Tobiasa Bilza a organizuje nahrawanje serbskich kěrlušow.
Richter na zwjazkowej lisćinje
Berlin. Kubšiski pjekarski mišter a načolny kandidat FDP Sakskeje Stefan Richter nastupi na městnje 14 zwjazkoweje lisćiny liberalnych za wólby Europskeho parlamenta. Rjemjeslnik je na nominowanskim zjězdźe wčera w Berlinje w dźěłowej drasće wustupił. Swoju kandidaturu mjenowaše „wosebitosć a runje tak samozrozumliwosć“. Delegaća wuzwolichu 44lětneho z 90 procentami hłosow.
Edding inwestuje w Budyšinje
Krótkopowěsće (26.01.24)
Skóržbu zapodali
Wulke Rědorjecy. Zhorjelske statne rěčnistwo je na Budyskim krajnym sudnistwje skóržbu přećiwo 41lětnemu skućićelej zapodało, policija wčera wozjewi. Rěčnistwo jemu wumjetuje, zo je wón cyrkej we Wulkich Rědorjecach zapalił. Sudniski proces zahaji so 5. februara w Budyšinje. Mjeztym dźěłaja fachowcy na nuzowej třěše, kotraž ma wotpalenu cyrkej škitać.
Angažement kóždeho trěbny
Drježdźany. Składnostnje wopomnjenskeho dnja za wopory nacionalsocializma jutře, je sakska ministerka za kulturu a předsydka załožboweje rady Załožby Sakske wopomnišća Barbara Klepsch (CDU) wuzběhnyła, zo trjebamy bóle hač hdy prjedy angažement kóždeho jednotliwca. „Demokratiju, swobodu měnjenja, tolerancu dyrbimy zakitować. Tole smy woporam nacionalsocializma winowaći.“
Inspiracija z Łužicy
Krótkopowěsće (25.01.24)
Budyšin na pjatym městnje
Drježdźany. Sakska je po wuslědkach naprašowanja portala Booking.com na druhim městnje lisćiny najhospodliwišich zwjazkowych krajow. A tež mjez najpřijomnišimi městami w Němskej, smě so Sakska wjeselić: Na pjatym městnje tuteje lisćiny steji město Budyšin. Zamołwići z politiki a hospodarstwa su z tutym wuslědkom jara spokojom.
Nowa serbska sobudźěłaćerka
Praha. Josefina Ofnerowa, nawodnica běrowa Sakskeho zastupnistwa w Praze, je wčera něhdźe 100 hosći na nowolětne přijeće witała, mjez nimi tež jednaćelku Domowiny Judit Šołćinu. Po wotewrjenju wustajeńcy sakskeho tekstilneho wuměłstwa je Ofnerowa hosćom tež nowu koleginu, Serbowku Katrin Nowakowu předstajiła. Wona pochadźa z Mosta w Delnjej Łužicy.
Swjeći swoje stoćiny
Krótkopowěsće (24.01.24)
Elke Erb njeboha
Berlin. Wuznamna spisowaćelka Elke Erb je njeboha. 85lětna zemrě minjenu póndźelu w Berlinje. Lawreatka mjez druhim Georga Büchneroweho myta a čłonka Sakskeje akademije wědomosćow je tež we wysokej starobje přewšo produktiwnje lyriku a prozu tworiła kaž tež rusku poeziju přebasniła, za čož w lěću prawidłownje we Wuježku přebywaše.
Přihotuja wulku demonstraciju
Budyšin. Na Budyskim Hłownym torhošću wotměwa so tutu sobotu, 27. januara, w 14 hodź. demonstracija. Pod hesłom „Zhromadnje za čłowjeskosć, demokratiju a našu swobodu w Budyšinje. Nětko!“ namołwja zwjazk mnohich iniciatiwow w němskej a serbskej rěči za wobdźělenje. Rěčeć ma mj. dr. sakski statny ministra za nutřkowne Armin Schuster (CDU).
Swětło jako spominanje
Krótkopowěsće (23.01.24)
Wiziju za hrodźišćo předstajił
Wětošow. Wiziju Załožby Slavonic Europe z Brüssela za Radušanske słowjanske hrodźišćo je jeje prezident David Chmelík wčera na posedźenju hospodarskeho wuběrka Wětošowskeje zhromadźizny měšćanskich zapósłancow předstajił. Areal móhł wuchadźišćo za słowjansku syć być, a to ze Załožbu Slavonic Europe Deutschland jako wobhospodarku, kotruž chcyli za to wutworić.
Bena Hojerja a Jana Rjedu wolili
Smjerdźaca. Předsydstwo Serbskeho šulskeho towarstwa (SŠT) je so po hłownej zhromadźiznje na konstituowace posedźenje zetkało. Kaž předsydka Katharina Jurkowa na naprašowanje informowaše, su Bena Hojerja a Jana Rjedu za městopředsydow wuzwolili. Přichodne wjerški SŠT su ptačokwasne programy w pěstowarnjach we Wotrowje, Šunowje, Chrósćicach, Malešecach a Němcach.
Nowe nawodnistwo wosady
Krótkopowěsće (22.01.24)
Kandidaća za wólby w Sakskej
Drježdźany. CDU, SPD a FDP su sobotu kandidatow za lětuše wólby do sakskeho krajneho sejma nastajili. CDU je nimo toho Olivera Schenka jako kandidata za europske wólby nominowała. Dotalny šef statneje kenclije Schenk, kiž je njedawno w Chrósćicach składnostnje spěchowanja kongresa Europasiona pobył, ma z tym wuhlady na nowy nadawk. Čitajće prošu wjac na 2. stronje!
Z ličbu zajimcow su spokojom
Drježdźany. Wjace hač 36 000 zajimcow je minjeny kónc tydźenja wiki „KarriereStart“ w Drježdźanach wopytało. Předewšěm młodostni wobhonichu so wo powołanskich móžnosćach, zdźěli wčera zarjadowar wikow Ortec. Cyłkownje su wjace hač 560 wustajerjow na přehladce prezentowali.
Kozel zaso kandiduje
Krótkopowěsće (19.01.24)
Přihotuja jutrowny seminar
Budyšin. Serbske młodźinske towarstwo Pawk hotuje so na lětuši jutrowny seminar Młodźiny europskich narodnych skupin (MENS) w Budyšinje. W martrownym tydźeńju wočakuja někak 60 młodostnych z cyłeje Europy. Z jednaćelku MENS zetkachu so štwórtk zo bychu program a financowanje seminara wothłosowali.
Organizatorojo NFF přeprošuja
Großhennersdorf. Filmowy festiwal Nysa (NFF) wotměje so lětsa wot 14. do 19. meje a to hižo 21. raz. Wjace hač 900 filmowych přinoškow w kategorijach hrajny a dokumentarny film kaž tež krótkofilm je lětsa dóšło – wjace hač hdy prjedy. Na 21 městnosćach podłu Nysy w Čěskej, Pólskej a Němskej njeposkićuje festiwal publikumej jeno filmowe předstajenja, ale tež koncerty, čitanja, wustajeńcy a partyje.
Busy zaso po planje po puću
Budyšin. Hładkich dróhow a wjele sněha dla njejsu wot wčerawšeho popołdnja w Budyskim wokrjesu busy jěli. Informaciju rozšěrichu zamołwići za bliskowobchad mjez druhim po socialnych medijach. Wot dźensnišeho ranja busy zaso po planje jědu, přiwšěm móhło k zapozdźenjam dóńć.
Krótkopowěsće (18.01.24)
Zeleny tydźeń dźensa zahaja
Berlin. Wudźeržliwosć, zawěsćenje cyroby a přichod ratarskeje branše steja w srjedźišću 88. mjezynarodneho zeleneho tydźenja, kotryž dźensa wječor w Berlinje zahaja. Zastupjenych je 1 400 wustajerjow ze 60 krajow. Mjez nimi je prěni raz wokrjes Dubja-Błóta, kotryž kulinarisku mnohotu mjez Berlinom a Błótami w swojej prezentaciji tematizuje.
Chaos njezachadźał
Budyšin. Wulce připowědźeny wjedrowy chaos we Łužicy zachadźał njeje. Kaž zdźěli sakska policija, njeregistrowachu hižo žane wjetše problemy, kotrež su z sćěhom wjedra. Na zwjazkowej dróze 6 blisko Bukec pak wostachu někotre nakładne awta poboku dróhi ležo. Hišće wčera běštej Budyski a Zhorjelski wokrjes na warnowanje před zalodźenymi dróhami a sněhom skedźbniłoj.
Sokołam měr popřeć
Krótkopowěsće (17.01.24)
Chór Lipa bilancował
Pančicy-Kukow. Na hłownej zhromadźiznje chóra Lipa, wčera wutoru, zhladowaše předsydstwo na minjene lěto skutkowanja. Chór měješe loni dohromady dźewjeć zjawnych wustupow. Z najwjetšeho dźěla w Hornjej Łužicy. Tohorunja zmóžni so chórej pjeć nowych spěwow na chórowu sadźbu wobdźěłać.
Dr. Magdalene Kemlein njeboh
Drježdźany. W kruhu swójbnych zemrě sobotu w starobje 93 lět hudźbna pedagogowka a terapeutka Magadalene Kemlein, kotraž běše znata za swoje mnohe wobdźěłanja němskich, serbskich a mjezynarodnych ludowych a dźěćacych spěwow. Zdobom wukubła jako wučerka serbske hudźbno-šulske dźěći w duchu Jurja Winarja a wukmanješe jich w powołanjach na serbsko-kulturnym a pedagogiskim polu.
Zwěrjo lěta 2024 wohrožene
