Ćežko zranjeni po njezbožach
Čorny Chołmc/Nowa Łuka. Hnydom dwě njezboži z chětro wulkej wěcnej škodu zregistrowa policija njedźelu w Čornym Chołmcu a mjez Nowej Łuku a Horami pola Wojerec. 69lětny wodźer VWja chcyše so pola Čorneho Chołmca zawróćić a přewidźa so bližacy Audi. 55lětny šofer njemóžeše zražce hižo zadźěwać. Wěcnu škodu na woběmaj awtomaj trochuje policija na něhdźe 40 000 eurow.
Njewobkedźbowanje předjězby je přičina njezboža w Nowej Łuce. 64lětna šoferka Renaulta přewidźa na křižowanišću z Wojerowskeho směra přijěducy Golf a zrazy do njeho. Jeho 39lětny wodźer so ćežko zrani. Tež tu wučinja wěcna škoda něhdźe 40 000 eurow.
Mopedist ćežko znjezbožił
Worklecy. Při wobchadnym njezbožu je so pjatk wječor we Worklecach wodźer Łastojčki ćežko zranił. Šoferka Toyoty njebě při wotbočenju wobkedźbowała, zo měješe muž předjězbu, a do njeho zrazy. Zo móhli mopedista do chorownje dowjezć, dyrbješe helikopter na sportnišću přizemić.
Žonje tobołku pokradnył
Brětnja-Michałki. Njeznaty muž je 81lětnej kolesowarce předwčerawšim w Brětni-Michałkach tobołku pokradnył, jako ju naprawo přesćahny. Nimo handyja a dalšich wosobinskich wěcow bě w tobołce móšnja ze sto eurami.
W bydlenju pjenjezy kradnyła
Budyšin. Njeznata žona chcyše předwčerawšim, wutoru, na Budyskej Lotzowej hasy 90lětnej rentnarce při chěžnych durjach pulower předać. Bjez napominanja zastupi wona do bydlenja a połoži swoje twory na blido. Jako rentnarka do spanskeje stwy po pjenjezy dźěše, ju cuza do rozmołwy zapleće. Jako bě njeznata wosoba bydlenje zaso wopušćiła, 90lětna zwěsći, zo bě so jeje móšnja z 200 eurami a EC-kartku zhubiła.
Zawrjenu dróhu wobkedźbowali
Kamjenej. Z trochu njewšědnym nadawkom je so předwčerawšim popołdnju wobchadna wobstražowanska słužba policije zaběrała. Wona wobkedźbowaše zwjazkowu dróhu B 96 blisko Kamjeneje pola Rakec. Tam je mjenujcy nadróžne twarnišćo, čehoždla je dróha dospołnje zawrjena. Po wšěm zdaću pak so wšitcy po tym nimaja. W běhu dweju hodźin zadźeržachu tam dohromady 35 jězdźidłow, kotrež po zaraćenym dźělu dróhi jědźechu. 15 wodźerjow bě wobchadne znamjenja prosće ignorowało. Za to dyrbja pokutu płaćić. Tamni smědźachu po twarnišću jěć, kaž při dróze bydlacy, taksije a šulski bus.
Tafle a zastanišća pomórali
Čorny Chołmc. Swoje „wuměłske“ slědy su njeznaći minjeny kónc tydźenja w Čornym Chołmcu zawostajili. Kaž policija zdźěla, napryskachu woni na elektriske kašćiki, busowe zastanišća a wabjenske tafle z ćmowej barbu wšelake pismiki a znamjenja, kotrež móhli politiski pozadk měć. Wěcnu škodu trochuja na něhdźe 500 eurow.
Tobołku předawarki pokradnył
Wojerecy. Njeznaty wuži předwčerawšim njewobkedźbowany wokomik a pokradny we Wojerowskej kupnicy tobołku předawarki. W njej běchu nimo handyja móšnja, wupokazy a kluče. Tobołku su pozdźišo w bliskosći namakali. Paduch bě sej z njeje 30 eurow wzał.
Njewobydlenej domaj so paliłoj
Kamjenc. Na Połčničanskej dróze w Kamjencu je so wčera rano prózdny bydlenskim dom palił. Płomjenja rozpřestrěchu so na susodny, tohorunja njewobydleny dom. Wobornikam so na zbožo poradźi tomu zadźěwać, zo woheń na třeću, ale wobydlenu chěžu přeskoči. Dokelž hrožeše so prěni dom sypnyć, dyrbješe jón Techniski pomocny skutk podeprěć. Hač jedna so wo zapalerstwo, policija nětko přepytuje.
Medikamenty kradnyli
Wjazońca. Z farmaceutiskim předewzaćom we Wjazońcy su sej njeznaći w nocy na póndźelu chětro njewšědny cil za swój njeskutk wupytali. Na Hłownej dróze zadobychu so paduši do rumnosćow firmy a wočinichu w nim pjenježny kamor. Z njeho wzachu wjetšu sumu pjenjez. Nimo toho zebrachu najwšelakoriše medikamenty w cyłkownej hódnoće něhdźe 3 200 eurow. Dale načinichu pakostnicy něhdźe 1 000 eurow wěcneje škody. Zastojnicy kriminalneje policije su slědy zawěsćili a pytaja nětko za skućićelemi.
Darmotnje tankować chcył
Słona Boršć. Dosć wysoke płaćizny bencina chcyše zawčerawšim muž na awtodróhowym wotpočnišću pola Słoneje Boršće wobeńć a darmotnje tankować. Tónle pospyt pak na zbožo zwrěšći. Wodźer Citroëna drje swoje awto najprjedy za 60 eurow natankowa a z nim bjez płaćenja tež do směra na Zhorjelc wotjědźe. Alarmowani zastojnicy awtodróhoweje policije pak jeho na jednym z parkowanišćow zadźeržachu. 24lětny pólski staćan steješe pod wliwom drogow. Dalšu jězbu jemu policisća wězo zakazachu. Za swój njeskutk wšak změje so młody muž nětko na sudnistwje zamołwić.