Policija (17.07.23)
W sportowni kóncowali
Budyšin. We wčerawšich rańšich hodźinach wołachu policiju na Budysku Ebertowu. Po wuprajenju swědkow bě z tamnišeje sportownje wótře wołanje słyšeć a kak něchtó škleńcu rozbiła. Zastojnicy zwěsćichu při swojej kontroli w twarjenju dohromady sydom skóncowanych woknow. Byrnjež policisća we wokolinje hale intensiwnje pytali, njemóžachu skućićelow namakać. Wěcnu škodu trochuja na něhdźe 7 000 eurow.
Zadobywanje zwrěšćiło
Wojerecy. W nocy na sobotu chcychu so njeznaći do Wojerowskeho mebloweho domu zadobyć. To pak so jim njeporadźi. Přiwšěm nasta tysac eurow škody.
Policija (14.07.23)
Při wohenju zemrěł
Rěčicy. Z dotal njeznateje přičiny je w nocy na štwórtk w Rěčicach woheń w bydlenskim domje wudyrił. Płomjenja wuchadźachu ze stwy w přizemju. 72 wobornikow bě při hašenju zasadźenych. Při tym namakachu w bydlenju mortweho muža.
Policija (13.07.23)
Paducha wuhnał
Kulow. Wobsedźer jednoswójbneho domu w Kulowje je wutoru paducha wuhnał. Kaž policija zdźěli, je njeznaty krótko po 9 hodź. wokno namócnje wočinił a so tak do domu dóstał. Tole słyšeše wobsedźer na hornim poschodźe, dźěše dele za prawym hladać a tak paducha překwapi. Tón hnydom zaso z woknom won zalěze a ćekny. Wot njeho načinjena wěcna škoda wučinja něhdźe 500 eurow. Skućićel je po wopisanju Kulowčana něhdźe 1,60 metrow wulki a šwižneje postawy. Wón bě ćmowe joggingowe cholowy z běłymi smuhami woblěkany. Swědkojo njech přizjewja so pod 03571/ 46 50.
Policija (12.07.23)
Spinadło přićahnyć zabył
Ćichońca. 52lětny parkowaše swój Toyota předwčerawšim na Wojerowskej dróze w Ćichońcy, zaby pak spinadło přićahnyć. Wosobowe awto kuleše so přez dróhu a zrazy na priwatnu ležownosć. Při tym skóncowa wone wjacore rostliny, listowy kašćik a fasadu dwójneho domu. Škodu trochuja na něhdźe 7 000 eurow.
Policija (10.07.23)
Awtomat rozbuchnyli
Biskopicy. Njeměrnu nóc drje mějachu wobydlerjo Biskopičanskeje Cyrkwinskeje hasy w nocy na njedźelu. Krótko do 4 hodź. jich mócny wrjeskot ze spara wutorhny. Njeznaći běchu w tym wokomiku cigaretowy awtomat rozbuchnyli. Kaž policija zdźěli, je detonacija awtomat dospołnje skóncowała. Tohodla tež njeje jasne, hač móžachu skućićeljo cigarety spakosćić abo nic. Tohorunja znate njeje, hač móžachu njeznaći pjenjezy z awtomata sobu wzać. Dźěle awtomata su terasu a kwětkace sudobja bliskeho hosćenca wobškodźili. Dohromady nasta něhdźe 8 000 eurow wěcneje škody.
Policija (07.07.23)
Trezor kradnyć zwrěšćiło
Budyšin. Sprjewinu kupjel w Budyšinje su sej njeznaći předwčerawšim rano za padustwo wupytali. Po wšěm zdaću pak su alarma dla ćeknyli. Kaž policija pozdźišo zwěsći, běchu so skućićeljo na předawanišćo zakuskow měrili. W nim drje chcychu trezor pokradnyć, štož pak so jim njeporadźi. Přiwšěm nasta nimale 3 500 eurow wěcneje škody.
Policija (06.07.23)
Solarne platy pokradnyli
Wojerecy. Njeznaći paduši běchu w nocy na wutoru na Wojerowskej Semmelweisowej po puću. Z wjacorych ležownosćow pokradnychu woni solarne platy, wobstražowanske kamery a elektriske nastroje, z kotrymiž hodźi so lisćo na hromady duć. Po wšěm zdaću běchu skućićeljo lačni, přetož woni wzachu tež wjacore bleše cola sobu. Kelko škody su cyłkownje načinili, z policajskeje rozprawy bohužel njewuchadźa.
Policija (05.07.23)
Bydlenja wopušćić dyrbjeli
Mały Wjelkow. Woheń je wčera rano w bydlenju w Małym Wjelkowje wudyrił. Wobydler w přizemju je płomjenja w swojej bydlenskej stwě pytnył. Najprjedy spyta sam hašeć. Dokelž so to njeporadźi, alarmowaše wón policiju a wubudźi swojich susodow. Dźakowano tutomu spěšnemu jednanju běchu wšitcy wobydlerjo dom hižo wopušćili, jako wobornicy přijědźechu. Kameradojo woheń spěšnje zhašachu, tak zo płomjenja na dalše rumnosće a susodne bydlenja njepřeskočichu. 28lětneho wobydlerja přizemja dyrbjachu do chorownje dowjezć. Tamni podružnicy dyrbjachu swoje bydlenja najprjedy raz wopušćić, dokelž běchu sazow a kura dla zanjerodźene.
Policija (04.07.23)
Alarma dla ćeknyli
Słónkecy. Alarmowa připrawa je w Słónkecach (Schlungwitz) w gmejnje Dobruša-Huska tomu zadźěwała, zo je firmje wjetša škoda nastała. W nocy na póndźelu su so tam njeznaći na teren firmy zadobyli. Runje jako chcychu za hódnotnymi wěcami pytać započeć, alarmowa připrawa zaskoči. Njeznaći na to ćeknychu, kaž Zhorjelska policajska direkcija rozprawja. Přiwšěm načinichu skućićeljo něhdźe 200 eurow wěcneje škody. Dalše přepytowanja je kriminalna słužba policije přewzała.
Policija (03.07.23)
Wopity z kolesom jěł
Kulow. Zo płaća tež za jězdźenje z kolesom předpisy, wě nětko młody muž, kotrehož je policija w njedźelnych rańšich hodźinach w Kulowje kontrolowała. 25lětny bě zastojnikam napadnył, dokelž na Budyskej dróze swoje koleso prawje w horšći njeměješe. Pola njeho naměrichu 1,72 promilow alkohola w kreji. Wón změje so nětko wopiłstwa w nadróžnym wobchadźe dla zamołwić.
