Policija (05.12.18)

srjeda, 05. decembera 2018 spisane wot:

Bjez dowolnosće z awtom po puću

Budyšin. Dokelž při wotbočenju z Wo­jerowskeje na Schliebenowu swoje jěz­dźi­dło wokomik w horšći njeměješe, je 20lětny wodźer BMWja póndźelu w Budyšinje policiji napadnył. Jako zastojnikaj za nim jědźeštaj, stupi młody muž na płun a spyta do směra na Židow a Ćemjercy ćeknyć. Na Ćemjerčanskim puću jeho skónčnje zadźeržeštaj. Tam so wukopa, zo 20lětny scyła žanu jězbnu dowolnosć njeměješe. Nimo toho namakachu w jeho awće titku z běłej maćiznu. Dro­gowy test pola njeho pak bě negatiwny.

Policija (04.12.18)

wutora, 04. decembera 2018 spisane wot:

Awta a sćěny pomórali

Běła Woda. Swoju „wuměłsku žiłku“ na polu grafitow su njeznaći minjeny kónc tydźenja na wjacorych městnach w Běłej Wodźe zjawnosći předstajili. Žadyn dobry wothłós pak móranja cuzych našli njejsu. Woni měrjachu so na štyri wosobowe awta a zawostajichu na nich njedefinujomne znamjenja. Tajke wuhladachu wobydlerjo tež na sćěnach wjacorych bydlenskich domow. Cyłkowna škoda njeje hišće zwěsćena.

Policija (03.12.18)

póndźela, 03. decembera 2018 spisane wot:

Hospodliwosć znjewužiwał

Budyšin. Trochu hinaše měnjenje wo hospodliwosći měješe w nocy na sobotu 47lětny muž w Budyšinje, kiž bě pola 28lětneho na wopyće. Wosrjedź nocy je wón hosćićelej 80 eurow z móšnje kaž tež jeho kluče za chěžne, bydlenske a pinčne durje pokradnył. Nimo toho přiswoji sej awtowy kluč a bórze na tež šěry Seat Leon. Dohromady načini hósć něhdźe 3 600 eurow škody.

Policija (30.11.18)

pjatk, 30. nowembera 2018 spisane wot:

Smě dwaj měsacaj nóžkować

Njebjelčicy. Hač šoferojo maksimalnu spěšnosć 70 km/h dodźerža, je policija srjedu na statnej dróze S 94 pola Njebjelčic kontrolowała. Wot 2 000 jězdźidłow bě 134 přespěšnych. Najnuznišo měješe VW z Budyskim čisłom, pola kotrehož naměrichu 135 km/h. Za šofera woznamjenja to pokuta 440 eurow, dwaj měsacaj nóžkować a dwaj dypkaj.

Policija (29.11.18)

štwórtk, 29. nowembera 2018 spisane wot:

Hodowna nakup fuk

Wojerecy. Swojimaj wočomaj wěrić nochcyše wobydler wjaceswójbneho domu na Wojerowskej Hufelandowej wutoru připołdnju, jako w swojej pincy za prawym hladaše. Tam dyrbješe 63lětny zwěsćić, zo běchu so njeznaći zadobyli a so z jeho składow posłužowali. Kaž wón policiji zdźěli, pobrachowaše w mróžaku jeho hodowna nakup, mjez druhim kače nóžki, butra a hromak. Škodu trochuje na něhdźe 200 eurow.

67 km/h přespěšnje jěł

Budyšin. W Hodźiju, na awtodróze A 4 a w Hornjej Kinje je policija zawčerawšim spěšnosć měriła a dohromady 8 200 jězdźidłow kontrolowała. Njesławny rekord docpě na awtodróze VW z Drježdźanskim čisłom, kotryž bě město dowolenych 120 ze 187 km/h po puću.

Policija (28.11.18)

srjeda, 28. nowembera 2018 spisane wot:

Žonam pjenjezy wulišćić spytali

Běła Woda. Njeznaći wobšudnicy su zawčerawšim popołdnju w Běłej Wodźe spytali, třom staršim žonam přez telefon pjenjezy wulišćić. W jednym padźe cuza žona rentnarce něšto wo strowotniskej nuzowej situaciji powědaše, w tamnymaj padomaj wudawaše so wona jako po­zdatna wnučka, kotraž chcyła „wowku“ wo pjenjezy prosyć. Wšitke tři rentnarki w starobje 82 do 88 lět su pak prawje reagowali, telefonat přetorhnyli a policiju zazwonili.

Policija (27.11.18)

wutora, 27. nowembera 2018 spisane wot:

Młodemu mužej pomhali

Wojerecy. Dokelž bě zawčerawšim wječor krótko do połnocy blisko zahrodnišća při zwjazkowej dróze B 96 we Wojerecach wołanje wo pomoc słyšała, informowaše žona policiju. Ta tam za prawym pohladny a namaka zymu mrějaceho 28lětneho muža. Wón zastojnikomaj powědaše, zo bě w swojim zahrodowym domčku spał, jako so njeznaći tam zadobychu a jemu něšto mjezwoči pryskachu. 28lětneho dowjezechu na to do chorownje. Nětko pyta policija swědkow, kotřiž su njedźelu wječor něšto podhladneho wobkedźbowali. Pokiwy přijimuje pod telefonowym čisłom 03571/ 46 50.

Policija (26.11.18)

póndźela, 26. nowembera 2018 spisane wot:

Elektrokolesy pokradnyli

Wojerecy. Dokelž su z elektromotorom podpěrane kolesa jara woblubowane, so tež paduši často na tajke měrja. We Wojerecach su nětko njeznaći hnydom dwě elektrokolesy z pincy wjaceswójbneho domu pokradnyli a so z nimaj zhubili. Škoda wučinja něhdźe 4 000 eurow.

Policija (23.11.18)

pjatk, 23. nowembera 2018 spisane wot:

Wobruče rozkłóli

Ćichońca. Při kontroli na ležownosći firmy w Ćichońcy pola Budyšina dyrbješe sobudźěłaćer wěstotneje słužby zawčerawšim njeskutk zwěsćić. Njeznaći běchu wobruče šěsć transporterow paketoweje słužby rozkłóli. Dohromady skóncowachu woni 19 kolesow. Ryzy wěcna škoda wučinja wjace hač 3 000 eurow. Nimo toho drje je nazajtra tójšto ludźi w Budyšinje a wokolinje podarmo na skazany paket čakało.

Policija (22.11.18)

štwórtk, 22. nowembera 2018 spisane wot:

Dom so dospołnje wupalił

Chróst. Wulku wěcnu škodu načinił je woheń, kiž bě w nocy na srjedu w jednoswójbnym domje w Chrósće pola Wulkeje Dubrawy wudyrił. Jako 38lětny krótko do połnocy domoj přińdźe, jemu płomjenja hižo napřećo sapachu. Najebać prócowanja wjace hač 70 wobornikow z dwanaće jězdźidłami so dom dospołnje wupali. 38lětny so snadnje zrani.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND