Policija (04.06.19)

wutora, 04. junija 2019 spisane wot:

Njeprošeny wopyt I

Rachlow. W hosćencu w Rachlowje pola Kulowa mějachu minjeny kónc tydźenja njeprošenych hosći. Paduši běchu so tam w nocy na njedźelu namócnje zadobyli. Pokradnyli su cigarety a pjenjezy w cyłkownej hódnoće něhdźe 50 eurow. Načinjena wěcna škoda je wšak po informa­cijach Zhorjelskeje policajskeje direkcije dźesać króć tak wulka.

Njeprošeny wopyt II

Kulow. Samsnu nóc pobychu paduši w Kulowskim towarstwowym domje na Koćinskej dróze. Woni spakosćichu laptop w hódnoće něhdźe 300 eurow a so zhubichu, bjeztoho zo by něchtó něšto widźał. Wěcnu škodu trochuja na něhdźe 100 eurow.

Policija (03.06.19)

póndźela, 03. junija 2019 spisane wot:

Štyri wosoby so zranili

Bórk. Dokelž bě předwčerawšim popoł­dnju na zwjazkowej dróze B 156 w Bórku wojerska kolona do směra na awtodróhu A 4 po puću, dyrbjachu na napřećiwnej jězdni wjacore awta zastać. 68lětna wodźerka Audija pak to přepozdźe pytny a zrazy­ do awta před njej, kotrež storči do dalšeju jězdźidłow. Při tym so štyri wosoby zranichu. Škoda wučinja 30 000 eurow.

Policija (31.05.19)

pjatk, 31. meje 2019 spisane wot:

Sam so přizjewił

Budyšin. Njewšědny wopyt mějachu zastojnicy Budyskeho policajskeho rewěra na Tuchorskej zawčerawšim wječor. Jako so hižo něchtóžkuli na dźeń muži přihotowaše, přizjewi so tam 28lětny muž, za kotrymž policija hižo dlěši čas pytaše. Přećiwo njemu předležachu mjenujcy wjacore přikazy zajeća, dokelž njebě pjenježne pokuty dotal zapłaćił. Po wšěm zdaću začuwaše na sebje mjeztym tak wulki ćišć, zo wón wšitke napołožene pokuty naraz zapłaći. Dohromady jednaše so wo 380 eurow, kaž Zhorjelska policajska direkcija informuje. Na to smědźeše 28lětny policajski rewěr jako swobodny čłowjek wopušćić.

Policija (29.05.19)

srjeda, 29. meje 2019 spisane wot:

Ćeknyć ničo njepomhało

Běła Woda. Kedźbliwy wobydler je za­wčerawšim w Běłej Wodźe pomhał, ćeknjeneho zawinowarja wobchadneho njezboža lepić. Wón bě wobkedźbował, kak wodźer Opela do parkowaceho Renaulta zajědźe, skrótka wulěze a so na to zaso wotsali. Swědk pak awtowe čisło zawinowarja policiji zdźěli. Zastojnicy jeho tež spěšnje lepichu a zwěsćichu na jeho awće škody, kotrež wopisanju wobydlerja wotpowědowachu.

Policija (28.05.19)

wutora, 28. meje 2019 spisane wot:

Pokradnjene koleso namakali

Běła Woda. Srjedź meje w Kamjencu pokradnjene koleso je policija zawčerawšim w Běłej Wodźe namakała. Tam chcychu w rańšich hodźinach kolesowarja kontrolować. Jako tón policistow wuhlada, ćekny přez zelenišća a płoty, koleso w hódnoće 900 eurow pak ležo wostaji. Wobsedźer je nětko zaso dóstanje.

Policija (27.05.19)

póndźela, 27. meje 2019 spisane wot:

W lěsu so awto paliło

Běła Woda. K njewšědnemu zasadźenju wołachu minjeny pjatk wječor wobornikow w Běłej Wodźe. Tam bě 24lětny z Renaultom po lěsnym pućiku jěł. Jako zawěra dalšu jězbu po pućiku znjemóžni, chcyše ju młody muž wobjěć, wosta pak z awtom na pjenku wisajo. Při pospyće so wuswobodźić, so wupuch wottorhny, tak zo so lěsna póda palić započa a płomjenja na Renault přeskočichu. Prjedy hač alarmowani wobornicy přijědźechu, so tón hižo dospołnje paleše a so skónčnje wupali. Wěcnu škodźe na awće trochuja na něhdźe 7 000 eurow. Škoda w lěsu je porno tomu ze sto eurami snadna.

Policija (24.05.19)

pjatk, 24. meje 2019 spisane wot:
Niska. Na křižowanišću Mužakowska dróha Pestalozzijowa w Niskej je wčera k ćežkemu njezbožu dóšło. Po informacijach swědkow bě motorske z wulkej spěšnosću na lěwej jězdni dlěšu kolonu wosobowych awtow přesćahnyło. Jako chcyše prědku Renault nalěwo wotbočić, prasny motorske do njeho. Wulkeje mocy,­ nastateje při zražce dla, zleća wodźer motorskeho ze swojeje mašiny. Přiwołani sa­nitetarjo a nuzowy lěkar so wo znjezboženeho starachu a dowjezechu jeho do bliskeje chorownje. Dokelž je policija městnosć njezboža zaraćiła, dóńdźe tam wěsty čas k wobmjezowanjam wobchada.

Policija (23.05.19)

štwórtk, 23. meje 2019 spisane wot:

Dwě njezboži na jednym městnje

Budyšin. Policija dyrbješe wutoru awtodróhu mjez wotjězdomaj Budyšin-wuchod a Wóspork dlěje zašlahać. Tam bě so BMW na mokrej jězdni suwał, do betonoweho wobłoženja prasnył a wo­srjedź jězdnje stejo wostał. 40lětny šofer so při tym zrani. Njezboža dla so wobchad kopješe, a tak dóńdźe k dalšemu njezbožu. 27lětny wodźer Renaulta bě rynk čakacych awtow přepozdźe widźał, zrazy do nakładneho awta a so zatłusny. Wohnjowa wobora dyrbješe jeho z jězdźidła wuswobodźić. Z helikopterom dowjezechu muža do chorownje. Techniski pomocny skutk je městnosć nje­zboža sobu zawěsćił.

Policija (22.05.19)

srjeda, 22. meje 2019 spisane wot:

Motorskeho přewidźał

Janecy. Jako chcyše so wodźer Suzukija wčera popołdnju za Haslowom do směra na Słonu Boršć zawróćić, přewidźa wón z pódlanskeje dróhi přijěduceho motorskeho. Tón njezamó hižo spinać, zajědźe do zadnjeho kolesa awta a padny. Jeho dyrbjachu do chorownje dowjezć.

Wólbne plakaty pomórane

Kulow. Na Dwórnišćowej dróze w Kulowje je swědk w nocy na wutoru podhladnej maskěrowanej wosobje wobkedźbował a policiju zawołał. Zastojnicy drje nikoho wot njeho wopisowaneho njewuhladachu, za to pak wosom pomóranych wólbnych plakatow. Pozdatnaj wuměłcaj běštaj z čornej barbu wšelake napisy popryskałoj a na to ćeknyłoj.

Policija (21.05.19)

wutora, 21. meje 2019 spisane wot:

Peugeot so wupalił

Budyšin. W Budyskej Strowotnej studni je so wčera něhdźe w 23 hodź. awto paliło. Na parkowanišću blisko kupnicy steješe Peugeot z dotal njeznatych přičin w płomjenjach. Najebać spěšne hašenje měšćanskeje wohnjoweje wobory so awto dospołnje wupali.

Žona w awće zatłusnjena

Kamjenej. Na B 96 je wčera popołdnju wodźer VWja T-Roca w Kamjenej pola Rakec blisko wotbóčki K měznikej do napřećo přijěduceho nakładneho awta zajěł. Při tym zatłusny so we wosobowym awće sobujěduca, kotruž móžachu hakle wohnjowi wobornicy wuswobodźić. Žonu su z helikopterom do chorownje dowjezli. Šofer awta so lochko zrani, wodźer Lkw-ja wosta njezranjeny.

Ćežko zranjenaj

Chróstawa. 22lětny šofer Audija zrazy wčera připołdnju pola Chróstawy frontalnje do napřećo přijěduceho Citroëna 74lětneho. Wobaj so tak ćežko zraništaj, zo dyrbjachu jeju wuchowanske mocy do chorownje dowjezć. Sobujěduca Citroëna so lochko zrani.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND