Policija (08.04.19)

póndźela, 08. apryla 2019 spisane wot:

Do nakładneho awta zrazył

Trjebjeńca. Ćežke wobchadne njezbožo sta so dźensa rano na zwjazkowej dróze B 6 w Trjebjeńcy (Steindörfel) pola Bukec. Tam chcyše wodźer motorskeho před nim jěduce nakładne awto přesćahnyć, jako wón z dotal njeznateje přičiny wotzady do njeho zajědźe. Na to zrazy z połnym wotmachom do napřećo přijěduceho LKWja. Při zražce so motorske dospołnje skóncowa, jeho wodźer wosta z ćežkimi zranjenjemi na puću ležo. Přiwołany nuzowy lěkar jeho na městnje zastara, pozdźišo dowjezechu muža do chorownje. Zwjazkowa dróha bě wjacore hodźiny dospołnje zawrjena, tak zo dóńdźe w rańšim powołanskim wobchadźe k dołhim rynkam čakacych awtow.

Policija (05.04.19)

pjatk, 05. apryla 2019 spisane wot:

Papjery falšowane byli

Běła Woda. Překwapjenku dožiwichu policisća zawčerawšim w Běłej Wodźe, jako wodźerja VWja kontrolowachu. Wón pokaza pólsku jězbnu dowolnosć. Zastojnicy pak zwěsćichu, zo muž poprawom žanu pólsku jězbnu dowolnosć njewobsedźi. Nimo toho bě wón hižo w februaru w zwisku z dźiwinowym njezbožom wopačne papjery předpołožił. Po wšěm zdaću běchu wone tak derje falšowane, zo to tehdy njenapadny.

Policija (04.04.19)

štwórtk, 04. apryla 2019 spisane wot:

Granaće we wjerchu namakali

Delni Wujězd. Zo při torhanju stareho twarjenja tu abo tamnu překwapjenku dožiwiš, njeje ničo njewšědneho. Před­wčerawšim, wutoru, pak so w Delnim Wujězdźe tola chětro dźiwachu, jako ­běchu sobudźěłaćerjo twarskeje firmy w dodźeržanym domje při dźěle. W mjezywjerchu pod špundowanjom wuhladachu woni popołdnju dwě granaće, štož wobydler wězo policiji přizjewi. Rozbuchlinu wotstronjowaca słužba je namakance wotwjezła. Kaž Zhorjelska policajska direkcije rozprawja, běštej wonej wonkownje w dosć dobrym stawje. Nutřka w nimaj pak hižo žane rozbuchadło njebě. Na prašenje, štó bě granaće w Delnjowujězdźanskim domje něhdy schował a čehodla, pak najskerje hižo nichtó wotmołwić njemóže.

Policija (03.04.19)

srjeda, 03. apryla 2019 spisane wot:

Bróžnja so dospołnje wotpaliła

Demjany. K hotowemu infernu wołachu wohnjowu woboru dźensa něhdźe w 4.30 hodź. do Demjan (Diehmen) pola Huski. Tam bě woheń w 50 króć 15 metrow wulkej bróžni wudyrił a twarjenje nimale dospołnje zničił. W bróžni bě nimo ratarskich mašinow něhdźe dwaceći swini, kotrež wobornicy před płomjenjemi wuchowachu. Sčasami wobornicy dosć hašenskeje wody njemějachu. Při­čina wohenja njeje znata.

Policija (02.04.19)

wutora, 02. apryla 2019 spisane wot:

Firmje tójšto škody načinili

Brězyna. Bližace so nalětnje dźěła w zahrodkach běchu snano přičina, zo su so njeznaći­ w nocy na minjenu njedźelu do firmy w Brězynje (Brösa) pola Malešec zadobyli. Tam pokradnychu woni wjacore poměrnje drohe motorske piły, motorske kosy a wšelke z akuwom ćěrjene zahrodkarske graty w hódnoće 15 000 eurow. Nimo toho načinichu skućićeljo tójšto dalšeje wěcneje škody, kotruž trochuja na ně­hdźe 4 000 eurow.

Policija (01.04.19)

póndźela, 01. apryla 2019 spisane wot:

Koleso sam přetwarił

Budyšin. Žane přetwarjene awto abo moped, ale technisce změnjene koleso sta so minjeny pjatk w Budyšinje z padom za policiju. Na Stieberowej kontrolowachu zastojnicy kolesowarja, kiž bě bjez swěcy po puću. Při kontroli zwěsćichu, zo bě koleso tak přetwarjene, zo móhło wone bjeze wšeho hač do 50 km/h spěšnje jěć. Mjez druhim je wobsedźer wjacore sylne akuwy do swojeho jězdźidła zatwarił a tohorunja elektriske kable sam składł. Z tymle kolesom njesmědźeše wobsedźer najprjedy raz dale jěć.

Policija (29.03.19)

pjatk, 29. měrca 2019 spisane wot:

Wopitaj randalěrowałoj

Budyšin. W předawanišću zakuskow na Budyskej Róžowej staj zawčerawšim mužej w starobje 27 lět hosći wobćežowałoj. Po tym zo přistajeni jeju namołwichu předawanišćo wopušćić, dóńdźe wonka k tomu, zo młodaj mužej tam stejace awta wobškodźi­štaj. Jako policija přijědźe, poča jedyn ze skućićelow do policajskeho awta kopać. Nimo toho wón zastojnikow biješe. To sej woni lubić nje­dachu a jeho sputachu. Pola muža na­měrichu 3,14 promilow alkohola w kreji. Wón smědźeše so na policajskim rewěrje wuspać. Tamneho z 1,74 promilemi domoj­ pósłachu.

Policija (28.03.19)

štwórtk, 28. měrca 2019 spisane wot:

Młodostny smjertnje znjezbožił

Drěwcy. Tragiske wobchadne njezbožo sta so zawčerawšim rano na statnej dróze S 108 mjez Łazom a Delnim Wujězdom. Pola Drěwcow chcyše 18lětna wodźerka wosoboweho awta nalěwo na hłownu dróhu wotbočić, njewobkedźbowaše pak předjězbu na statnej dróze přijěduceho 17lětneho motorskeho a zrazy do njeho. Młody muž tak ćežko znjezboži, zo hišće na městnje njezboža wudycha. 18lětna šoferka awta so ćežko zrani.

Policija (27.03.19)

srjeda, 27. měrca 2019 spisane wot:

Paduchaj w kupnicy

Budyšin. Twory w hódnoće něhdźe 1 100 eurow chcyštaj mužej w starobje 32 a 34 lět zawčerawšim w Budyskej kupnicy na Delnjokinjanskej pokradnyć. Widejohry, parfum a črije běštaj sej hižo do nachribjetnika stykałoj. Sobudźěłaćer pak to wobkedźbowaše a jeju zadźerža, doniž policija skućićelow njezaja.

Policija (26.03.19)

wutora, 26. měrca 2019 spisane wot:

Dwaj deliktaj naraz

Smochćicy/Chelno. 39lětny muž je so zawčerawšim dopołdnja na teren firmy w Smochćicach zadobył a tam z transportera a ze zhusćenskeje mašiny diesel wotklumpał. Na to wón přez polo ćekny. Zastojnicy Budyskeho policajskeho rewěra pak jeho lepichu. Kaž so wukopa, 39lětny ze swojim awtom w Chelnje hižo dale jěć njemóžeše, dokelž bě tank prózdny. Nimo toho bě VW Caddy z falšowanymaj přizjewjenskimaj plaketomaj po puću był. W awće čakaše 80lětny muž. Policija dyrbi nětko zwěsćić, štó je za kotry delikt zamołwity.

nawěšk

nowostki LND