Policija (12.02.21)
Lětnje wobruće kradnyli
Běła Woda. Najskerje hižo na přichodne lěćo myslili su paduši, kotřiž zadobychu so minjene dny do garaže w Běłej Wodźe. Z njeje pokradnychu štyri kompletne lětnje wobruče. Jich hódnotu trochuje wobsedźer na něhdźe 300 eurow. Nimo toho načinichu skućićeljo něhdźe 500 eurow wěcneje škody. Kriminalisća nětko za paduchami pytaja.
Policija (11.02.21)
Alarm na rewěrje
Budyšin. W normalnym padźe přismali policija k městnu njeskutka, njezboža abo tež wohenja. Wčera připołdnju bě tele městno Budyski policajski rewěr na Dwórnišćowej sam. Štwórć po dwanaćich přizjewi awtomatiska připrawa woheń na rewěrje a alarmowaše powołanskich wobornikow runje tak kaž dalšich dobrowólnych kameradow. Zastojnicy twarjenje bjezposrědnje na to wopušćichu a so na předpisanych městnach zhromadźichu. Wobornicy so na terenje a w twarjenjach rozhladowachu a přičinu alarma spěšnje wuslědźichu. Jednaše so wo techniski defekt tepjenskeje připrawy. Bórze na to móžachu policisća w swojej słužbje pokročować.
Policija (10.02.21)
Šoferaj do so šłoj
Kinspork. Na zwjazkowej dróze B 97 mjez Kinsporkom a Łužnicu staj so předwčerawšim wodźerjej čěskeho nakładneho awta a němskeho wosoboweho awta typa Mercedes mjez sobu wo zadźerženju we wobchadźe powučowałoj. Na kóncu situacija eskalěrowaše. Najprjedy spyta šofer Mercedesa Lkw přesćahnyć, štož pak so njeporadźi. Jako bě wón skónčnje nimo, awto před Lkw-jom wotpohladnje pomału jědźeše. We Łužnicy dyrbještaj wobaj před twarskej amplu zastać. Tam dóńdźe skónčnje k rozestajenju, při čimž šofer Pkw-ja tamnemu šmóratko z ruki dyri. Šofer Lkw-ja wotmołwi z dyrom mjezwoči a tamneho snadnje zrani. Wobaj změjetaj so nětko nuzowanja w nadróžnym wobchadźe a zranjenja ćěła dla zamołwić.
Policija (09.02.21)
Bjez rubizny ćeknyli
Budyšin. Kašćiki z prózdnymi blešemi běchu sej njeznaći předwčerawšim wječor w Budyskej Strowotnej studni jako rubiznu wupytali. Swědk jich wobkedźbowaše, kak sej kašćiki přez płót dawachu, a zazwoni policiju. Skućićelam pak so poradźi ćeknyć. Zastojnicy zličichu dwanaće kašćikow w hódnoće wjace hač 50 eurow, kotrež cuzy stejo wostajichu.
Policija (08.02.21)
W lěsu drjewo kradnyłoj
Biehla. Hdyž so wonka sněži a wětřik hwizda, kaž minjeny kónc tydźenja, je lědma něšto rjeńšeho hač so doma we stwě před kaminom zhrěć a płomjenjam přihladować. Po wšěm zdaću sej tole tež žonje wažitej, kotrejž je policija sobotu připołdnju w lěsu pola Běłeje blisko Kamjenca lepiła. 73lětna a 46lětna běštej mjenujcy runje při tym, drjewo do swojeho jězdźidła nakładować. Kaž policija zdźěli, mějachu kuluchi hódnotu něhdźe 50 eurow. Žonje smědźeštej je hnydom zaso wróćo na hromadu połožić.
Policija (05.02.21)
Při telefonje jara kedźbować
Habrachćicy. Policija warnuje dale doraznje před wobšudnikami, kotřiž spytaja ludźom po telefonje pjenjezy wulišćić. Při tym njejsu jeno starši wobydlerjo potrjecheni, kaž najnowši pad z Habrachćic pokazuje. Tam je so předwčerawšim 45lětna žona z woporom wobšudnikow stała a 7 500 eurow zhubiła. Pozdatny sobudźěłaćer lutowarnje pola njeje zazwoni a rěčeše wo problemach z jeje kontom. Wón žonu po telefonje napominaše, zo měła jemu tři TAN-čisła mjenować a tak wotknihowanja po 2 500 eurach awtorizować. Škodowana z toho wuchadźeše, zo so woprawdźe wo sobudźěłaćerja lutowarnje jedna, a měješe so po jeho słowach.
Policija (04.02.21)
Na zbožo trik dwójce zwrěšćił
Dubrawka. 83lětny muž w Dubrawce pola Malešec by so předwčerawšim bjezmała z woporom wobšudnika stał. Cuzy powědaše jemu po telefonje wo wobchadnym njezbožu, při kotrymž bě jedna wosoba žiwjenje přisadźiła. Zo njeby dźowka rentnarja do jastwa trjebała, měješe wón 25 000 eurow do Zhorjelca k namjeznemu přechodej přiwjezć. Hišće za čas telefonata pak přińdźe wnučk 83lětneho domoj, zazwoni policiju a tak hóršemu zadźěwa. Tež w Hbjelsku (Gebelzig) w gmejnje Wysoka Dubrawa bychu rentnarku nimale wobšudźili. 15 000 eurow měješe wona zapłaćić, dokelž je dźowka pječa při wobchadnym njezbožu někoho moriła. Staruška tuž na bance dźěl pjenjez wotzběhny. Jako chcyše wona sumu k awtu před domom donjesć, zakroči na zbožo susodka, kotraž to wobkedźbowaše. Awto wotjědźe.
Policija (03.02.21)
Přespěšnje a pod drogami jěł
Wojerecy. We wobłuku kontrole spěšnosće su policisća předwčerawšim na Kinajchtskej dróze we Wojerecach pod wliwom drogow stejaceho šofera lepili. Hdźež je tempo na 30 km/h wobmjezowane, zadźeržachu wodźerja transportera, kiž bě 16 km/h přespěšnje po puću. Zastojnicy přewjedźechu pola 32lětneho drogowy test, kotryž je pozitiwje na amfetaminy reagował. Tuž njezměje so muž nětko jeničce přespěšneho jězdźenja dla zamołwić, ale tež wodźenja awta pod wliwom wopojnych srědkow dla, kaž policija w swojej rozprawje pisa.
Policija (02.02.21)
Kupnicu wobšudźili
Wojerecy. Z woporom njeznatych telefonowych wobšudnikow je so minjenu sobotu kupnica na Wojerowskim Łužiskim naměsće stała. Něhdźe w 17.30 hodź. tam cuzy zazwoni a wudawaše, zo kupnica wěstu ličbu tak mjenowanych Google-Play-kartow hižo předawać njesmě. Njeznaty předawarku namołwi, zo měła jemu cody jednotliwych kartow mjenować. Pozdźišo so wukopa, zo běchu wobšudnicy karty bjezposrědnje po tym na pjenjezy zaměnili. Wojerowskej kupnicy nasta na te wašnje dohromady něhdźe 4 500 eurow škody.
Policija (01.02.21)
Strašny płun zawěsćili
Kamjenc. Rutinowe zasadźenje wuchowanskich mocow wjedźeše předwčerawšim wječor k wohnjowobornemu alarmej w Kamjencu. Krótko do 19 hodź. wołachu sanitetarjow do seniorskeho centruma na Wysokej wo pomoc. Tam měrjenske nastroje pomocnikow pokazachu, zo bě koncentracija wuhlikoweho monoksida w domje přewulka. Na to alarmowachu wohnjowych wobornikow. Kameradojo wšitke stwy ze sensibelnej techniku přepytachu, zo bychu zwěsćili, zwotkel strašny płun pochadźa. Po něhdźe dwěmaj hodźinomaj zasadźenje zakónčichu, dokelž ničo namakali njeběchu a dokelž bě so koncentracija płuna zaso normalizowała. Zranił so nichtó njeje. Dróha před starownju bě sčasami dospołnje zawrjena.
