Kontrola wuspěšna była
Wojerecy. Dobry čuch mějachu policajscy zastojnicy, jako su předwčerawšim wječor na Wojerowskim Lipjecskim naměsće dwě wosobje kontrolowali. Pola 24lětneho muža a 20lětneje žony namakachu kristaline wopojne srědki. Nimo toho měješe młoda žona nastroje za konsum drogow, tak mjenowany jednoručny nóž a koleso z pobrachowacym ramikowym čisłom při sebi. Uniformowani wšitko sćazachu. Nimo toho přizjewichu tři delikty, z kotrymiž so nětko kriminalna policija bliže zaběra, mjenujcy podhlad na njedowolene wobsydstwo wopojnych srědkow, přeńdźenje přećiwo zakonjej wo brónjach a podhlad potajerstwa (Hehlerei).
Jebakaj po puću byłoj
Wojerecy. Njeznaty porik je předwčerawšim we Wojerecach wjacorych wobchodnikow zjebał. Tak chcyštaj muž a žona we wobchodźe na Złokomorowskej někajku maličkosć z wulkej bankowku zapłaćić. Jako chcyše předawarka pjenjezy měnjeć, ju porik do rozmołwy zapleće. Pozdźišo předawarka pytny, zo w kasy pjenjezy pobrachuja. Podobne sta so we wobchodźe při Staroměšćanskim torhošću a w bliskim hosćencu.
Municija we wusaknjenym rěčnišću
Hory. Kedźbliwy wobydler je so předwčerawšim pola policije přizjewił, dokelž bě municiju namakał. Wona ležeše we wusaknjenym rěčnišću Čorneho Halštrowa pod mostom mjez Wojerecami a Horami. Zastojnicy policajskeho rewěra zezběrachu tam na to dohromady 107 małokalibrowych patronow.
Jastwu hišće raz zadźěwał
Kulow. Njepřipowědźeny wopyt měješe předwčerawšim připołdnju 56lětny muž w Kulowje. Při jeho bydlenskich durjach klinkachu zastojnicy Wojerowskeho policajskeho rewěra. Přičina bě, zo wón pokuty płaćił njebě, a tak předležeštej přikazaj zajeća přećiwo njemu. Jako jemu uniformowanaj rozłožištaj, što móhło to w najhóršim padźe woznamjenjeć, bě muž dowidny a je dohromady 480 eurow zapłaćił. Tak móžeše wón wjacednjowskemu přebytkej w jastwje zadźěwać.
Bager wolij zhubił
Serbske Pazlicy. Jako jědźeše ze Serbskich Pazlic do směra na Pěskecy 68lětny minjeny pjatk wječor ze swojim bagrom je so hydrawlikowa rołka skóncowała, tak zo je jězdźidło na połdra kilometrje wolij zhubił. Mějićel tuž swoju mašinu na lěsnym puću wotstaji, zo by ju nazajtra reparował. W běhu nocy pak bager wšón wolij zhubi, štož bě po wšěm zdaću něhdźe 200 litrow. Specialna firma dyrbješe sobotu puć wurjedźić a z wolijom zanjerodźenu lěsnu pódu wotnosyć.
Smjertne njezbožo při jězoru
Slepo. Tragiski wukónc měješe předwčerawšim připołdnju wólnočasna zaběra při Brězowskim jězoru. Tam je 48lětny muž wodosportowu připrawu wužiwał. Při tym pak wón padny a so po wšěm zdaću ćežko zrani. Kaž Zhorjelska policajska direkcija rozprawja, wućahnychu muža na kraj. Wopytowarjo jězora starachu so wo prěnju pomoc, přiwołana wuchowanska słužba spyta znjezboženeho reaniměrować, bohužel bjez wuspěcha. Muž na městnje njezboža wudycha.
Bager do awta zrazył
Stróža. K njewšědnej zražce je předwčerawšim popołdnju w Stróži pola Hućiny dóšło. Na kromje tamnišeje hłowneje dróhi dźěłaše wodźer bagra. Runje jako so 43lětny ze swojej dźěłowej mašinu zwjertny a łžica bagra nad pućom steješe, přijědźe BMW a do njeje zrazy. 45lětny wodźer a pjećlětne dźěćo so snadnje zraništaj. Zranjenu 34lětnu sobujěducu dyrbjachu do chorownje dowjezć. Škoda na awće wučinja 3 500 eurow.
Wopiteho lepili
Kamjenc. Na pózdnim njedźelnym popołdnju je wodźer awta při tankowni na Macherowej w Kamjencu do wabjenskeje tafle zajěł, ale so wo nastatu škodu njestarał. Swědcy tuž za nim jědźechu a informowachu policiju. Zastojnicy 62lětneho krótko na to lepichu a pytnychu, zo bě wón alkohol pił. Při kontroli naměrichu pola njeho 1,66 promilow. Jězbnu dowolnosć a awtowy klučik dyrbješe šofer wotedać a změje so nětko wohroženja nadróžneho wobchada dla zamołwić.
Randalěrarja lepili
Wojerecy. Na Starej Berlinskej dróze we Wojerecach je we wčerawšich rańšich hodźinach wobydler wobkedźbował, kak něchtó busowe zastanišćo kóncuje. Njeznaty ze wšej mocu do škleńcy kopaše a ju skónčnje rozbi. Alarmowana policija muža na to w bliskosći dosahny. Při přepytowanju blišich wobstejnosćow so wukopa, zo bě 20lětny nimo toho zachodne durje wjaceswójbneho domu wobškodźił. Načinjena wěcna škoda wučinja cyłkownje něhdźe 1 100 eurow.