Policija (27.03.20)

pjatk, 27. měrca 2020 spisane wot:

Njewočakowana překwapjenka

Zhorjelc. Zhorjelscy zarjadnicy so wutoru njemało dźiwachu. Jako k swojim awtam přińdźechu, witaše jich wóń kwětkow. Njeznaći běchu pod woknotrějaki kóždeho policajskeho jězdźidła, kotrež stejachu před rewěrom na Gobbinowej, róžu tyknyli. Zarjadnicy dźakuja so nje-znatym darićelam za spodobne floralne hódnoćenja swojeho dźěła.

Policija (26.03.20)

štwórtk, 26. měrca 2020 spisane wot:

Psyca zaso doma

Wuskidź. Wutoru wječor wuhlada policija na zwjazkowej dróze B 115 pola Hole samotneho psa a jeho popadny. Po rešerši za wobsedźerku podachu so k jeje adresy, žona pak doma njebě. Tak dyrbjachu psycu sobu na rewěr wzać, hdźež so krótko na to mějićelka přizjewi a swojeho lubuška sobu domoj wza.

Rozestajenje při durjach

Rakecy. Na Kaponičanskej hasy w Rakecach je so wobydler wopytowarjej do puća stupił. 54lětny nochcyše 33lětnemu do domu zastupić dać, dokelž tam njebydli. Tak dóńdźe k ćělnemu rozestajenju mjez mužomaj, při čimž so młódši lochko zrani. Nimo toho wjedźeše zwada k wobškodźenju zachodnych duri. Policija wo to prosy, zo bychu so po­trjecheni w tajkich padach na zastojnikow wobroćili, kotřiž njejasnosće wuswětla.

Zetkanku rozpušćili

Policija (25.03.20)

srjeda, 25. měrca 2020 spisane wot:

Awto sej wotewzać

Zhorjelc. Němske awta, kotrež su na parkowanišću při lětanišću Praha-Ruzyně wotstajene, hodźa so hač do pjatka, 27. měrca, wotewzać. Potrjecheni smědźa sej tam z přewodźacej wosobu po awto dojěć, dyrbja pak sej hubu z masku škitać. Při tym akceptuja medicinsku masku abo podobny škit, na přikład husće tkane rubiško abo šawl. Nimo toho trjebaja wobkrućenje, parkowanski tiket abo originalny boarding-pas.

Kradnyć chcył

Niska. Sobudźěłaćerjo nakupowanišća w Niskej su wobkedźbowali, kak chcyše sej muž pakćik kofeja do nachribjetnika tyknyć. Tak jeho zadźeržachu, jako chcyše bjez zapłaćenja nimo kasy. 29lětny měješe w nachribjetniku nimo kofeja hišće dalše kradnjene wěcy.

Policija (24.03.20)

wutora, 24. měrca 2020 spisane wot:

Postajenje njedodźerželi

Kamjenc/Wojerecy. Policija dźiwa dźeń a raznišo na to, zo maja wobydlerjo po­wšitkowne postajenja sakskeho ministerstwa za socialne a towaršnostnu zhromadnosć dodźeržeć. Tak dyrbjachu minjenu sobotu wobchod za běrowowu potrjebu na Kamjenskej Willyja Muhlowej zawrěć. Njedźelu dopołdnja su pjeć mužam a jednej žonje přebytk při tankowni we Wojerecach zakazali, kotřiž tam piwo pijachu. W Zhorjelcu hrajkaše sej samsny dźeń pjeć dźěći na Wilhelmowym naměsće. Zastojnicy su je powučili a domoj pósłali.

Pytanu žonu namakali

Wulka Dubrawa. Njedźelu wječor bě muž policiju informował, zo pyta přiwuznu. Wona bě popołdnju zahrodku wopušćiła a njeje so wróćiła. Zastojnicy a wokolne wohnjowe wobory na to za 73lětnej pytachu. Prjedy hač dyrbjachu helikopter zasadźić, nańdźe patrulja ­Budyskeho rewěra zamylenu seniorku na zahrodkowej ležownosći. Žona bě zranjena a mrěješe zymu. Wuchowanscy pomocnicy dowjezechu ju do chorownje.

Do wobchoda so zadobyli

Policija (23.03.20)

póndźela, 23. měrca 2020 spisane wot:

51lětny při wohenju zemrěł

Běła Woda. Sobotu wječor dóńdźe nuzowy telefonat na čisło 112, dokelž je z by­dlenja we wjaceswójbnym domje na Hasy Käthy Kollwitz w Běłej Wodźe kur stupał. Sobudźěłaćerka hladanskeje słužby w přizemju domskeho bě wohnjowu woboru zazwoniła. Kameradojo su z pódlanskeho bydlenja muža chowali, nuzowy lěkar pak zwěsći, zo bě wón hižo mortwy. 51lětny bydleše sam. Wobornicy płomjenja doskónčnje zhašachu. W dalšich bydlenjach a rumnosćach hladanskeje słužby žana škoda njenasta. Móžna přičina wohenja móhła być toaster.

Policija (20.03.20)

pjatk, 20. měrca 2020 spisane wot:

Kolesa chětro požadane

Ćisk/Wojerecy. Kolesa su tuchwilu najskerje mjez paduchami chětro woblubowane. Kaž policija zdźěla, dósta wona tón tydźeń wjace přizjewjenjow padustwow kolesow hač hewak. Tak běchu so njeznaći wutoru w Ćisku namócnje do kólnje zadobyli a wottam hnydom dwě drohej ­kolesy marki Cube Nature Pro a Pegasus sobu wzali. Hódnotu rubizny trochuje policija na nimale 1 200 eurow.

We Wojerecach su so paduši srjedu do pincy wjaceswójbneho domu na Šepšečanskej dróze zadobyli. Tam spakosćichu tohorunja dwě kolesy w hódnoće něhdźe 840 eurow. Paduši pak mějachu so tam jara lochko, dokelž njebě pinca zamknjena. Za wšitkimi štyrjomi kolesami policija nětko mjezynarodnje pyta.

Policija (19.03.20)

štwórtk, 19. měrca 2020 spisane wot:

Wobchadne znamjo na puću było

Ćichońca. Wutoru popołdnju bu 61lětny jězdźer e-bika na Małowjelkowskej dróze ćežko zranjeny. Muž bě na kolesowarjam swobodnje datej šćežce za pěškow w Ćichońcy do směra B 96 po puću. Z njejasneje přičiny wosta wón na wobchadnym znamjenju wisajo a padny, při čimž so ćežko zrani. Dyrbjachu jeho z helikopterom do kliniki transportować. Wobchadna słužba Zhorjelskeje policajskeje direkcije je wobdźěłanje padu na městnje njezboža přewzała. Swědcy, kotřiž běchu wašnje jězdźenja kolesowarja před zražku do wobchadneho znamjenja wobkedźbowali, njech so pod telefonowym čisłom 03591 367-0 abo na kóždej druhej policajskej staciji přizjewja.

Policija (18.03.20)

srjeda, 18. měrca 2020 spisane wot:

Wopačna policistka zazwoniła

Halštrow. Njeznata wobšudnica je předwčerawšim pola třoch žonow w Halštrowje, Wóslinku a Połčnicy zazwoniła, wudawajo so jako zastojnica Berlinskeje kriminalneje policije. Wona při telefonje „informowaše“, zo běchu rumunsku cwólbu zadobywarjow lepili a pola nich telefonowe čisło seniorow namakali. Kaž Zhorjelska policajska direkcija zdźěli, wołaše njeznata žona woprawdźe z Berlina, dokelž bě na displayju telefona Berlinska předwólba 030 widźeć. Dalše cyfry jeje čisła běchu 11033. Na zbožo pak wšitke tři žony spóznachu, zo jedna so wo pospytane wobšudnistwo. Wone telefonat skónčichu a zawołachu policiju. Kaž policija informuje, wobšudnicy stajnje znowa ličbowu kombinaciju 110 do swojeho čisła zatwarjeja, zo bychu policajske nuzowe čisło napodobnili. Na to měli dźiwać, jeli zaso raz klinka.

Policija (17.03.20)

wutora, 17. měrca 2020 spisane wot:

Debjenki njenamakali

Słona Boršć. Sakska policija měješe předwčerawšim při wuslědźenju padustwa w bayerskim Fürthu pomhać, hdźež buchu debjenki w hódnoće 10 000 eurow pokradnjene. Podhladna žona sedźeše pječa w pólskim busu. Tón zadźeržachu njedźelu připołdnju při awtodróhowym wotpočnišću pola Słoneje Boršće. Mjez druhim bě w nim tež pytana pólska staćanka, kotruž na městnje přesłyšowachu. Pokradnjene debjenki pak pola njeje žane njenamakachu. Po skónčenju policajskeje akcije smědźachu žona a dalše wosoby w busu dale jěć.

Policija (16.03.20)

póndźela, 16. měrca 2020 spisane wot:

Do awta so zadobyli

Kulow. Na ničo złeho njemyslo je Kulowčan minjeny pjatk wječor swoje wosobowe awto typa Ford Focus na Kamjenskej dróze w Kulowje wotstajił. Jako so sobotu dopołdnja k jězdźidłu wróći, dyrbješe wón zwěsćić, zo bě so w nocy něchtó do njeho zadobył. Cuzy je nabóčne wokno rozbił a móšnju pokradnył. W njej bě po informacijach wobsedźerja 175 eurow. Wěcna škoda wučinja 300 eurow.

Serbska debata

nowostki LND