Ze spara wutorhnjeny
Wojerecy. Do pódlanskeho twarjenja jednoswójbneho domu we Wojerecach su so w nocy na srjedu njeznaći zadobyli a sej twarske mašiny za wottransport přihotowali. Jako spytachu tež chěžne durje wočinić a so w bydlenskim domje rozhladować, pak činjachu haru, tak zo wobsedźer wotući a za prawym pohladny. Na to zadobywarjo ćeknychu. Sobu wzali drje ničo njejsu, přiwšěm načinichu něhdźe tysac eurow wěcneje škody.
W bydlenju pistole namakali
Rakecy. Wosebje wukubłana skupina policistow bě zawčerawšim w Rakecach zasadźena, dokelž běchu pokiw dóstali, zo ma wobydler pistolu a móhł ju tež zasadźić. W bydlenju 63lětneho namakachu powětrowku, trašawku a pistolu za paintball. Nimo toho storčichu na škričkowanski nastroj Stróžanskeje wohnjoweje wobory. Tón bu w septembru 2017 pokradnjeny. Dokelž měješe muž strowotne problemy, dowjezechu jeho na to do chorownje. Hač smědźeše wón pistole w bydlenju měć, nětko přepytuja.
Grat z kolesom wotwjezli
Rakecy. Za čas wichora w nocy na póndźelu su so njeznaći namócnje do zawoda při Rakečanskej hłownej dróze zadobyli. Ze zamkarnjow pokradnychu wšelki grat a wzachu nimo toho mužace koleso sobu. Móžno, zo su z nim swoju rubiznu wotwjezli. Wobsedźer trochuje wěcnu škodu na něhdźe tysac eurow. Pokradnjeny grat pak měješe hódnotu něhdźe 1 900 eurow. Kriminalna policija pad nětko přepytuje.
W gmejnskim domje pobyli
Němcy. Zawčerawšim dopołdnja dyrbjachu w Němcach zwěsćić, zo bě so tam w nocy do toho něchtó do gmejnskeho twarjenja při hłownym puću zadobył. Paduši běchu wšitke rumnosće přepytali a njeznatu sumu pjenjez sobu wzali. Wěcna škoda wučinja po informacijach policije něhdźe 2 000 eurow.
Wopity z awtom jěł
Kulowc. W póstniskim času dyrbja šoferojo z tym ličić, zo jich policija zadźerži, dokelž za alkoholowymi hrěšnikami slědźi. Ćim bóle je to w karnewalowych centrumach móžno. To wě nětko tež 37lětny wodźer Forda, kotrehož zadźeržachu sobotu wječor w Kulowcu. Při kontroli napadny zastojnikam jeho „chorhojčka“. Z alkoholowym testom naměrichu pola njeho 2,4 promilow alkohola w kreji. Logiska konsekwenca bě, zo dyrbješe muž swoju jězbnu dowolnosć wotedać a ju tak spěšnje tež zaso njedóstanje. Nimo toho změje so 37lětny swojeho zadźerženja dla na sudnistwje zamołwić.
Přichodni policisća hewrjekali
Budyšin. Třo młodźi mužojo su w nocy na štwórtk w Budyšinje z woknom bydlenja „Sieg Heil“ wołali. Kaž wot wobydlerjow alarmowana policija zwěsći, jednaše so wo třoch studentow Budyskeje wotnožki Sakskeje policajskeje wysokeje šule. Jeje rektor je potrjechenych na njewobmjezowany čas wot dalšeho studija wuzamknył. Hač změje jich jednanje dalše konsekwency, so pruwuje.
W chorowni so wuspać chcył
Wojerecy. Nimoměry mučny drje bě wutoru popołdnju muž we Wojerecach. Po wšěm zdaću dyrbješe wón nuznje spać a nochcyše drje za to puć domoj hić. Tak wupyta sej Wojerowsku chorownju jako kmanu městnosć wotpočinka. Krótko do 14 hodź. su jeho sobudźěłaćerjo w jednym z łožow pacientow wuhladali a policiju zawołali. 38lětny tak kruće spaše, zo móžachu hakle policisća jeho wubudźić. Kaž zwěsćichu, pola muža žana přičina njepředležeše, zo by w chorowni wostać dyrbjał. Tohodla jeho přećelnje prošachu, klinikum wopušćić a so doma wuspać. Dale wšak w rozprawje Zhorjelskeje policajskeje direkcije rěka, zo 38lětny policiji runjewon njeznaty njeje.
Při dźěle znjezbožił
Horni Wujězd. Při wotkładowanju zornowcowych platow je wčera popołdnju w Hornim Wujězdźe dźěl platow na portugalskeho wodźerja Lkw-ja padnył. Hižo prjedy hač wobornicy na pomoc přijědźechu, běchu sobudźěłaćerjo ćežko zranjeneho muža wuswobodźili. Dowjezechu jeho do Drježdźanskeje chorownje.
W firmje kradnyli
Wjelkowy. Dotal njeznaći su w nocy na póndźelu we Wjelkowach pola Zemic-Tumic po puću byli. W rjemjeslniskim parku zadobychu so woni do předewzaća. Z běrowa a kasoweje rumnosće firmy pokradnychu 500 eurow. Wěcna škoda wučinja tohorunja 500 eurow.
Wopity znjezbožił a ćeknył
Budyšin. W nocy na njedźelu je 25lětny muž w Budyšinje alkoholej chětro přirěčował. To pak jeho njewotdźerža so za wodźidło swojeho awta sydnyć a domoj jěć. Na Jordanowej zrazy wón do parkowaceho VW Golfa, při čimž načini něhdźe tysac eurow škody, a ćekny. Wobsadka policajskeho awta pak winika bórze na to wuslědźi a naměri njesnadne 2,4 promile alkohola w kreji młodeho muža. Jězbnu dowolnosć jemu zastojnicy wězo nablaku sćazachu.