Tradicionelnje prezentowaše so minjenu sobotu Ćišćanski nalětni swjedźeń z kwětkami a zeleninowymi rostlinami kaž tež z drjewjanymi, wołmjanymi a keramiskimi wudźěłkami. Wo ćělne derjeměće swojich hosći postarachu so organizatorojo nalětnich wikow z gulašowej poliwku z pólneje kuchnje, ze samopječenym tykancom, z plincami a z čerstwym chlěbom z tamnišeje pjecy.
Prěni raz je lětsa serbska dujerska kapała Horjany rańše piwko hudźbnje wobrubiła. Hromadźe ze swojimi swěrnymi fanami z Hućiny a Worklec zaručichu muzikanća najlěpšu naladu mjez připosłucharjemi. „Přewodźamoj kapału na nimale wšitke koncerty“, rjeknyštaj Helmut a Hannelore Paff ze Złeho Komorowa. Jako zahoritaj rejwarjej staj 83lětny a jeho 77lětna mandźelska lědma jednu štučku skomdźiłoj. Kedźbyhódne běchu tohorunja spěwne kwality mnohich wopytowarjow. Tym z najsylnišim hłosom so moderator Horjanow Uwe Macka ze słódnej kapku podźakowa. Wosebje wuzběhny wón Ursulu Schäfer z Wojerec, kotraž so jako rodźena Wětničanka hižo stajnje za dujersku hudźbu zajimuje.