Na zelenym tydźenju rejwali

wutora, 31. januara 2017 spisane wot:

Na přeprošenje Sakskeho statneho ministerstwa za wobswět a ratarstwo je Ćišćanska rejwanska skupina minjenu sobotu sakski jewišćowy program na mjezynarodnym Zelenym tydźenju w Berlinje sobu wuhotowała. „Přez tele přepro­- šenje smy so jara zwjeselili, přetož někotři naši čłonojo tak a tak často na Zeleny tydźeń jězdźa“, praji předsydka skupiny Gabriela Linakowa. Rejwarki a rejwarjo z Łužicy mějachu dwójce 20mjeńšinski program předstajić. Tak rozsudźichu so za wurězk ze swojeje žnjenskeje rejohry, za wjacore serbske reje w swójskej choreografiji a jako referencu na stolicu za reju Rixdorfer. Hnydom po Nowym lěće započachu zwučować.

Lipa ma stare nowe předsydstwo

pjatk, 20. januara 2017 spisane wot:

Prjedy hač chór Lipa w jubilejnym lěće 2017 w Pančičansko-Kukowskej šulskej awli zaso zwučuje, běchu jeho čłonojo na hłownu wólbnu zhromadźiznu prošeni. Předsydka Franciska Zopic rozprawješe wo minjenym lěće, w kotrymž běše chór nimoměry aktiwny.

Loni mějachu Lipjenjo ze swojej dirigentku Jadwigu Kaulfürstowej 15 wu­stupow. Wjerški běchu druhi koncert „Lipa a přećeljo“ na kopatej połnej žurli w Haslowje, programaj w Choćebuzu a Budyšinje z dalšimi chórami k 25. róčnicy znowazałoženja Zwjazka serbskich spěwarskich towarstwow a wulkoprojekt „Serbski rekwiem“, kotryž su zhromadnje ze solistami a z Drježdźanskim orchestrom Sinfonietta pod nawodom Judith­ Kubicec w Chróšćanskej cyrkwi přednjesli. Tójšto připosłucharjow móžachu na nalětnim koncerće na zahrodźe klóštra Marijineje hwězdy a na tradicionalnym hodownym nyšporje w Róžeńće witać. W běhu lěta su so cyłkej tři spěwarki přidružili, tak zo ma tuchwilu 55 aktiwnych spěwarjow a spěwarkow.

Budyšin (CRM/SN). Lětdźesatki swjeća Serbja Budyskeje katolskeje tachantskeje wosady wokoło Třoch kralow swoju wosadnu hodowničku, a to kóždy raz z bjesadu při kofeju a wosušku a ze zhromadnym spěwanjom. Přetož mnohe lěta hižo stara so wučerka na wuměnku Ludmiła Bizoldowa tež wo mały kulturny program, kotryž wosadni sami wuhotuja.

Šmjatańca w raju bajkow

pjatk, 23. decembera 2016 spisane wot:

Njewšědne jewišćo, njewšědne předstajenje. Takle móhł so zhromadny projekt dźiwadłoweje skupiny a chóra Serbskeje wyšeje šule (SWŠ) Budyšin w telegramowym stilu zjeć. Z krótkej noticu pak njehodźi so hra „Šmjatańca w raju bajkow“ wopisać. Šulerki a šulerjo předstajichu pod nawodom Cornelije Benadźineje, Tila Magera, Sabiny Demuthoweje, Kerstin Klingneroweje a z podpěru dźiwadźelnika a hudźbnika Istvána Kobjele Cyketaruška, knjeni Móškowu, Janka a Hanku.

Njewšědnu inscenaciju pokazachu šulerjo Budyskeje SWŠ w minjenych dnjach pjeć króć. Póndźelu poradźi so wuspěšna premjera před staršimi a přiwuznymi, wutoru widźachu hru dźěći Serbskeje zakładneje šule Budyšin, srjedu sobušulerjo a wučerjo.

Na dobro wsy wjele organizuja

štwórtk, 22. decembera 2016 spisane wot:

Hižo wjele lět organizujemy w Smječkecach adwentničku za seniorow. Samsny dźeń wječor zetkawaja so wjesnjenjo a hosćo před domom wjesneho kluba. Tón bě tež lětsa zaso z hosćićelom rjaneje tradicije, kotruž hižo nimale dwaceći lět pěstujemy.

Pilne žony běchu blida kryli, pomazki mazali a nětko tež rentnarjow posłužowachu. Při kofeju rozprawješe předsyda wjesneho kluba Handrij Hejduška wo jeho dźěławosći. Protyčka přewjedźenych zarjadowanjow saha wot póstnic a přednoškow přez mejemjetanje a wjesny swjedźeń hač k zmijepušćenju a kermušnej zabawje.

Dźěći a młodostni pokazachu na to mały program. Lóštnemu wustupej přizamkny so přednošk Aleny Hejduškec wo zetkanju swětoweje młodźiny w pólskim Krakowje. Loni rozprawješe nam tu na samsnym městnje Smječkečan Marian Budar wo swojim přebytku w Chile. Na kóncu wopytaštaj nas hišće swjaty Mikławš a swjata Bor­bora, kotrajž měještaj za kóždeho mały darik sobu.

Wosebity wječor Bjesady

srjeda, 21. decembera 2016 spisane wot:

Je mjeztym z rjanej z tradiciju, zo čłonojo Bukečanskeje Bjesady swoje poslednje zetkanje lěta časej wotpowědnje jako adwentničku­ přewjeduja. Za lětušu běchu sej předewzali, we wosadźe do zjawnosće stupić a so rjadej wosadnych wječorkow wotewrjeneje adwentneje pro­tyki při­družić. Dobry dwanatk wosadnych, mjez nimi tež němskorěčni, běše přeprošenje do wosadneho domu při farje sćěhowało. Po witanju z Ochranowskim hesłom dnja serbsce a němsce přednošowaše Marko Grojlich wo serbskich hodownych nałožkach. Přitomnym němskim wosadnym poda wón w běhu přednoška přeco zaso krótke zjimanje w němskej rěči. Bywši rozhłosownik złožowaše swoje wuwjedźenja hłownje na před lětami nazběrane informacije z Wojerowskich kónčin. Stari Bukečenjo wědźachu z wosobinskeho nazhonjenja to abo tamne hišće dodać.

Dźěćom dźiwadło hrali

wutora, 20. decembera 2016 spisane wot:

Ylvi, małka holca z Flake, bu rubjena. Wikingojo hnydom wědźachu, štó za tym tči: „hrozny Sven“. Wón je najwjetši njepřećel wikingow. Jemu hodźi so wšitko přicpěwać. Halvar da přikaz, płachty čołma nastajeć a so z połnej paru do spěcha dać, prjedy hač so holčce Ylvi něšto stanje.­ Wiki, najmłódši wobydler z Flake a syn nawjedowarja wikingow, kradnje so na wulki čołm najebać zakaz nana, zo by sobu pomhał swoju najlěpšu přećelku wuswobodźić.

Hač su wikingojo swojich přećiwnikow hišće w prawym času přemóhli, móžeše minjeny tydźeń nimale 300 pěstowarskich a hortowych dźěći z Budyskeho wokrjesa dožiwić. Tole zmóžni jim 21 šulerjow a šulerkow rjadownje S15v Budyskeje Serbskeje fachoweje šule za socialnu pedagogiku, kotřiž/kotrež so na statnje připóznateho kubłarja/připóznatu kubłarku wukubłuja. Woni su tuchwilu w druhim wukubłanskim lěće.

Před wjesnej kapałku so zetkali

wutora, 13. decembera 2016 spisane wot:

Je z tradiciju, zo so w Jaworje do hód k horcemu winku a praženym kołbaskam při wjesnej kapałce zetkamy. Młodźi ženjeni ze wsy běchu minjenu sobotu mjeztym třeći raz tele zarjado­wanje organizowali. Tež rumpodich bě so sem zaběžał a 30 mjeńšich dźěći z darikom zawjeselił. Za to wone mócnje spěwachu a basnje přednošowachu.

Wječor při jara přijomnym wjedrje bě nalada na Jaworskej nawsy wulkotna, a wjele rjanych spěwow do ćmy klinčeše. Wutrobny dźak wšitkim organizatoram tohole zetkanja a rumpodichej, kiž njeje jeno dźěćom, ale tež dorosćenym wulku porciju adwentneho měra a přezjednosće do wutrobow pósłał.

Weronika Bulankowa

Wuměnkarjow zawjeselili

póndźela, 12. decembera 2016 spisane wot:

Na přeprošenje wjesnjanosty gmejny Chrósćicy Marka Klimana (CDU) zetkachu so tele dny wuměnkarjo k zhromadnej adwentničce w sydarni Chróšćanskeje wjacezaměroweje hale „Jednota“. Tam dožiwichu hosćo wobšěrny kulturny program šulerjow zakładneje šule „Jurij Chěžka“. Z wušiknosću a połni elana dopokazachu wuknjacy swoje kmanosće w spěwach, basnjach kaž tež w spěwnych a hudźbnych scenach. Jako wjeršk předstaji 4. lětnik bajku wo „zbožownym Janku“. Wučerkam a šulerjam słuša dźak za derje poradźeny kulturny poskitk.

Po programje dachu sej wuměnkarjo kofej, wosušk a dalše přikuski słodźeć, kotrež běštaj Chróšćanski pjekar Florian Zahrodnik a firma EVSE sponserowałoj. Přizamkny so čiła rozmołwa. Kaž bě z njeje wusłyšeć, sej seniorojo jara chwala, zo su zaso jónu po jara dołhim času tež na staršu generaciju myslili. Šulerjo wužiwachu składnosć, hosćom swoje paslenki poskićeć. Dobytk a pjenježne připóznaće gmejny nochcedźa za sebje wužiwać, ale darja woboje Towarstwu swj. Filomeny.

Swjaty Mikławš w pěstowarni był

štwórtk, 08. decembera 2016 spisane wot:

Na swjedźenju swjateho Mikławša wopyta farar Michał Nawka zawčerawšim Njebjelčansku pěstowarnju „Barbojte kamuški“, kotraž je w nošerstwje Miłočanskeho Křesćansko-socialneho kubłanskeho skutka. Wón powědaše dźěćom stawiznu wo swjatym Mikławšu. Tón bě w štwórtym lětstotku žiwy w regionje Lykiska w dźensnišej Turkowskej. Pozdźišo ćehnješe do města Myra. Dźensa je to Demre nad Srjedźnym morjom. Wón bě stajny pomocnik w nuzy, je domy za syroty a chudych twarić dał a pomhaše namórnikam, kotřiž njemóžachu swoje dźěło hižo wukonjeć.

Dźěći stawiznu wćipnje sćěhowachu, a napjatosć stupaše, jako so farar Nawka kaž swjaty Mikławš zdrasći a rozjasni, što na přikład mitra a pastyrski kij woznamjenjatej. Wězo měješe za dźěći tež překwapjenku přihotowanu. Wone so Njebjelčanskemu wosadnemu fararjej z pěsnjemi tohorunja w mjenje swojich kubłarkow dźakowachu. Maik Brězan

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND