Wot wčerawšeho zběraja w Smochćicach nachribjetniki, kotrež kónc januara do Tansanije pósćelu. 28 ewangelskich wosadow kaž tež šule a pěstowarnje so na akciji wobdźěleja. Po wšěm zdaću nazběraja něhdźe 4 000 nachribjetnikow, zdźělataj bywši superintendent­ Reinhard Pappai a Katrin Pilz ze superintendentury (prědku wotlěwa). Tež šulerjo Serbskeje wyšeje šule Budyšin pomhaja wotstronić njetrjebawše zapakowanja, kotrež w Africe porjadnje njewotbywaja. Foto: Carmen Schumann

Tole móže přikład być

pjatk, 30. decembera 2016 spisane wot:
Rjana to hodowna akcija sobudźěłaćerjow łužiskeho energijoweho předewzaća LEAG dźěćom a młodostnym, w ćežkej žiwjenskej situaciji k hodam wjeselo wobradźić. W Choćebuskej hłownej centrali koncerna LEAG a w Čornopumpskim techniskim sydle běchu sej přistajeni cedlki přećow z tamnišich hodownych štomikow wupytali a dary wobstarali. Dóstała je tajke nětko na přikład dźěsćownja w Běłej Wodźe. Symboliska to akcija, wšako móža wobdarjeni tak začuwać, zo ludźo na nich njezabywaja. Runje w hodownym času dźě so kóždy za harmoniju, zbožom a ćopłotu žedźi. Zo su tež w bjezposrědnim susodstwje dźěći a młodostni, kotřiž nimaja zbožo w swójbje žiwi być, mnohim bo­hužel wědome njeje. Mam tuž hodownu akciju­ sobudźěłaćerjow LEAG za jara spomóžnu.­ Snano je to přikład dalšim předewzaćam,­ podobne darne akcije přewjesć. Bianka Šeferowa

Dźěćom hodowne přeća spjelnili

pjatk, 30. decembera 2016 spisane wot:
Sobudźěłaćerjo łužiskeho energijoweho předewzaća LEAG – brunicowa sparta a milinarnje – su so jako hodowni pomocnicy angažowali. Tak běchu sej z hodownych štomikow w centralnym sydle LEAG w Choćebuzu kaž tež w Čornopumpskim techniskim sydle cedlki z hodownymi přećemi dźěći wupytali a je spjelnili. Lětušu akciju přewjedźechu za dźěći a młodostnych intensiwnopedagogiskeho projekta „Neustart“ w Janšojcach, za dom „StattRand“ a dźěsćownju w Běłej Wodźe kaž tež za Choćebuske młodźinske zarjadnišćo „Miteinander“. Foto: LEAG/Kathi Gerstner

Tež ćěkancy mjez akterami byli

štwórtk, 29. decembera 2016 spisane wot:
Něhdźe 420 hosći je sej prěni swjaty dźeń hód w Budyskim NSLDź jewišćowy program Budyskeje ewangelskeje wosady Jozuwy wobhladało. Wobrazy kemšow wosebiteho razu pokazowachu, zo bě mjez něhdźe 75 akterami tójšto ćěkancow, kotřiž tuchwilu w Budyskim wokrjesu přebywaja. Kaž młody farar Clemens Mudrich na­šemu wječornikej zdźěli, je sej wjele ludźi zarjadowanje tež přez livestream wob­hladało. Zličili su 258 přizamknjenych nastrojow. Foto: Clemens Mudrich

Ćah spěcha přez krajinu. Wjedro je rjane, słónčne. Trochu chłódno drje je, ale to je w adwenće normalne. W spěšniku z Berlina do Drježdźan sedźi Simona, młoda žona, kotraž ćěka. To pak sobupućowacy njepytnu, chibazo so dźiwaja, čehodla sedźi młoda žona w rukajcach w poměrnje ćopłym ćahu. Chcu wam stawiznu Simony tuž wot spočatka powědać:

Narodźiła je so do intaktneje swójby w Berlinje. Nan dźěłaše w fabrice, mać na někajkim zarjedźe. Zažne dźě­ćatstwo bě zbožowne. Wjele rjanych do­žiwjenjow měješe ze swojim bratrom Lutzom­. Jako bě Simona dźewjeć lět, pak so bjezstarostne žiwjenje za nju njejapcy skónči. Při ćežkim wobchadnym njezbožu na awtodróze su nan, mać a bratr žiwjenje přisadźili. Při čakanju zatykaneje dróhi dla bě LKW bjez borzdźenja do jich awta zajěł. Njemějachu žanu šansu.

Šulerjo Chróšćanskeje zakładneje šule přepodachu dźensa předsydźe towarstwa swj. Filomeny Geratej Róblej dar nimale 350 eurow­. Wone budu na dobro domu za zbrašene maćerje z dźěćimi we wsy Dolní Podluží. Pjenjezy běchu šulerjo ze wšelakimi akcijemi zezběrali. Tak předawachu samopaslene hwězdy na adwentničce wuměnkarjow w Chrósćicach a Nuknicy a zawjese­lichu wuměnkarjow w Chrósćicach kaž tež wobydlerjow Domu swj. Ludmile z adwentnym program. Foto: Feliks Haza

Mjenje je druhdy wjace

póndźela, 19. decembera 2016 spisane wot:

Do rjadu lětušich dohodownych koncertow zarjadowa so tež wčerawši beneficny w Chróšćanskej wosadnej cyrkwi. W derje pjelnjenym Božim domje dožiwichu wosadni a zajimcy wotměnjawy poskitk adwentnych serbskich kěrlušow a młodźinskich spěwow.

Chrósćicy (JK/SN). Spěwy a hudźbne kruchi młodostnych dekanata zarjadowachu so derje do nyšpora, kotryž je z wěriwymi farar Daniel Dziekiewicz swjećił. W běhu nyšpora jimaše so Christina Pólkec słowa a rozłoži přitomnym zaměr beneficneho zarjadowanja. Dokelž bě hižo­ w lětomaj 2012 a 2013 dlěši čas w Malawiju dźěłała, znaje wona tamniše poměry a konkretnu potrjebu. Po lětsa zakónčenym wukubłanja na babu poda so młodostna z Kulowca w januaru do misionskeje chorownje „St. Gabriel’s Hospital“­ w Namitete, něhdźe 60 kilo­metrow wot stolicy Lilongwe zdaleneje, hdźež budźe wosom tydźenjow na porodowej staciji pomhać.

Adwentnička bjez rěčnych hranicow

wutora, 13. decembera 2016 spisane wot:

Budyšin (SK/SN). Sto dźěći z dźesać krajow,­ serbski rumpodich, Djed Moroz, dariki­ ­­za kóždeho wopytowarja – tajkile wobraz skićeše so minjeny pjatk na žurli Budyskeho Serbskeho domu. Mjeztym hižo šesty raz wotmě so tam mjezynarodna adwentnička za dźěći socialnje słabych­ swójbow, za wobydlerjow Wu­ježčanskeho dźěćaceho domu, za dźěći požadarjow azyla a z Budyskich swójbow z ruskim pozadkom. Wuhotowarjo běchu znowa Europski mjezynarodny klub, towarstwo Majak a Budyska tafla. Dźěći paslachu, hrajkachu sej a dachu so we­ wulkej wjesołej zhromadnosći šminkować. Při tym njebě za nje ani rěčnych hranicow ani nabožnych před­sudkow.

W swojich rjadach witachu někotrehožkuli prominentneho hosća, kaž Budyskeho financneho měšćanostu dr. Roberta Böhmera. Zapósłanča zwjazko­weho sejma Caren Lay (Lěwica) přepoda w nadawku swojeje frakcije šek w hódnoće 300 eurow. A wězo bě tež zapósłanc sakskeho sejma Hajko Kozel (Lěwica) přitomny. Wón dźě bě před pjeć lětami iniciator­ njewšědneje adwentnički.

Za dobry skutk spěwali

póndźela, 05. decembera 2016 spisane wot:

Beneficny koncert skupiny PoŠtyrjoch pjenježny kaž towaršliwy wuspěch

Jaseńca (SN/MWj). Štož su dru­hdźe wjele ludźi wabjace adwentne wiki abo jedyn z mnohich koncertow w cyrkwi, je w Jaseńcy kóždolětny beneficny koncert spěwneje skupiny PoŠtyrjoch a jeje přećelow. Sobotu bě to hižo šesty tajki wječor, na kotryž je wjace hač 120 ludźi přichwatało. Woni njedožiwichu jeno přitulnu serbsku atmosferu w bróžni Floriana Rynča, ale tež lóštny program muskeho kwarteta – zdźěla z podpěru dalšich spěwarjow – a skupiny Přezpólni.

Hdźež dźěło wozboža

wutora, 29. nowembera 2016 spisane wot:

Jónu wob lěto ma zjawnosć składnosć, sej w Pančicach-Kukowje dźěłarnje swjateho Michała wobhladać. Wosebje w najnowšim času tam stajnje něšto noweho nazhonješ.

Pančicy-Kukow (JK/SN). Dźěłarnja swjateho Michała w Pančicach-Kukowje bě minjeny pjatk swoje wrota zajimcam zaso­ šěroko wotewrěła. Hosćo dźěłarnje sej najwšelakoriše zaběry zbrašenych wobhladachu a běchu sej po tym pře­zjedni, zo stej dźěło a kreatiwne tworjenje jara dobra móžnosć, zbrašenych zapřijeć do wužitneho skutkowanja. Widźomne a čujomne wjeselo a hordosć zaběranych zbrašenych stej wuraz wuspěšneje integracije a posrědkuja začuće, zo su zbra­šeni na swoje wašnje zbožowni.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND