Hančik nawoda

srjeda, 24. oktobera 2018 spisane wot:
Běła Woda (SN/MiR). Radworčan Cyril Hančik nawjeduje nowu paliatiwnu me­dicin­sku staciju w Běłowodźanskej wo­krjesnej chorowni. Serbski šeflěkar w tym­le lěkowanišću mjeztym hižo wjacore lěta skutkuje. Byrnjež paliatiwna stacija z wosom derje wućeženymi łožemi hižo něšto časa wobstała, chcedźa ju dźensa oficialnje wotewrěć. Nawodnistwu je zhromadne dźěło mjez domjacymi lěkarjemi, hladarnjemi a hospicami wažny zakład lěkarskeho a čłowjeskeho zasta­ranja na runinje česćownosće a lubosće. Swětłe rumnosće, swójbna a přijomna atmosfera kaž tež team wukubłanych a wysoko specializowanych hladarjow poskitk skulojćeja. Na dźensnišim wotewrjenju zetkachu so domjacy a lěkarjo chorownje z teamom stacije.

Hladanske słužby jara wužadane

srjeda, 24. oktobera 2018 spisane wot:

Po wšej Łužicy zastaruja hladanske słuž­by­ starych abo chorych ludźi doma. Wobjed woža jim socialne słužby na skazanku. Ludźo­ su dale a starši a trjebaja pomoc. Kónc lěta 2015 bě jich po cyłej Němskej 2,9 milionow ludźi, kotřiž bě­chu­ na podpěru pokazani. Něhdyša idylka wo star­comaj na wuměnku, wo kotrejuž so dźěći a wnučki staraja, zda so wusonjena być. Nawopak: Ličba tych, kotrychž ambu­lantnje zastaruja, je dźeń a wjetša. Nimale třećinu něhdźe třoch milionow hladanja potrěbnych doma zastaruja (staw 2015). Na jednym boku nochcedźa starši ludźo do starownje abo hladarnje. Na druhim boku dóstawa hladanske zawěsćenje za domjace zastaranje wjace spěchowanja. Při­wšěm je to wulke wužadanje za hladanske słužby. Wone dyrbja fleksibelne być a maja přiwšěm najmodernišim standardam hladanja wotpowědować.

Nimamy tu trajneho přebytka

srjeda, 24. oktobera 2018 spisane wot:

Nětko nazymu, hdyž so přiroda poněčim na wotpočink hotuje, myslimy tež my ludźo časćišo hač hewak na zachodnosć žiwjenja. Lětsa wšak smy dožiwili přewšo krasne lěćo, prózdninarjam a dowolnikam k wjeselu. Tak mějachu w kupjelach rekordne ličby wopytowarjow. Ratarjo, rybarjo a mnozy dalši porno tomu su pak pod wulkej horcotu a ekstremnej suchotu ćerpjeli.

Wšo to je mjeztym zabyte. Dešć njeje­ jenož wochłódźenje přinjesł, ale zemja je so zaso napiła, byrnjež de­ficit lěća zdawna hišće wurunany njeje. Nětko w času kermušow ludźo jenož njeswjeća, ale so tež za Bože dary z polow a zahrodow dźakuja. Byrnjež ratarjo lětsa mjeńše abo wjetše žnjowe straty měli, njetrjeba nichtó z hłodom tradać.

Hladanski dialog nastork był

srjeda, 17. oktobera 2018 spisane wot:

Budyski wokrjes bě minjenu póndźelu druha stacija tak mjenowaneho hladanskeho dialoga Sakskeje. Zarjadowanje přewjeduje ministerstwo we wšěch 13 wokrjesach w Sakskej. Na městnje pyta přisłušne ministerstwo za socialne a škit přetrjebarjow rozmołwu z ludźi­mi. Na zarjadowanju w Smochćicach je so statna sekretarka za strowotnistwo Regina Kraushaar wobdźěliła.

Budyšin/Smochćicy (SN/at). Wjesnjanosća, w hladanju dźěłacy, komunalni politikarjo a dalši potrjecheni, jich je něhdźe połsta wosobow, běchu póndźelu do Smochćic přijěli. Jich wid na tule wažnu towaršnostnu temu zastupjerjow ministerstwa wosebje zajimowaše. „Chcemy předewšěm připosłuchać, wšako móžemy jeno zhromadnje wujasnić, što a štó je za dobre hladanje trjeba“, rjekny statna sekretarka Regina Kraushaar. Zwěsćić chcychu, hdźe klaca, a zhonić, kotre dobre ideje su wobdźěleni w regionje nastupajo hladanje hižo wuwili.

W Chróšćanskim Domje swjateje Ludmile wotewrěchu zawčerawšim wustajeńcu Ludmiły Bizoldoweje (nalěwo). Wobydlerjam a hosćom je Budyšanka wo swojim tworjenju powědała a wustajene mólby a rysowanki rozłožiła. Za nje zajimowaše so mjez druhim moler Jan Buk (2. wotlěwa), kiž w domje bydli. Foto: Feliks Haza

Ličba 200 zwólniwych přemóžaca

póndźela, 17. septembera 2018 spisane wot:
Na kromje jěchanskeho turněra kónc tydźenja w Hórkach stej so Michaela Körner a Maria-Theresia Heilemannowa (wotlěwa) wo to starałoj, zo móžachu so jěcharjo, pomocnicy a wězo tež wopytowarjo wobdźělić na akciji pytanja darićela rodowych bańkow za 13lětneho Bena z Halštrowa. Hólčec je druhi raz na leukemiju schorjeł. Dwěsćě ludźi je poskitk wužiło. „Smy přemóženi wo wulkej ličbje podpěraćelow, ­njejsmy z tajkej zwólniwosću ličili“, rjekny Sandra Berndt z předsydstwa towarstwa konjaceho sporta Při Klóšterskej wodźe. Foto: Jörg Stephan

Bukecy přikład cyłej Sakskej

wutora, 04. septembera 2018 spisane wot:

Nimale 130 zběrarnjow lěkarskich receptow je tuchwilu w Sakskej. Za tajki serwis farmaceutiskeho zastaranja we wjesnych kónčinach wužiwaja w Bukecach nětko lěpšiny digitalizacije.

Bukecy (SN/at). W Bukecach maja prěnju digitalnu zběrarnju receptow w Sakskej. Ministerski prezident Michael Kretsch­mer (CDU) přepoda ju wčera w foyeru tamnišeje wotnožki Ludoweje banki Drježdźany-Budyšin. Tak zahaji so poslednja etapa pilotoweje fazy terminala, kotryž bě Mnichowska firma NOVENTI HealthCare tzwr k zastaranju z medikamentami we wotležanych kónčinach wuwiła. Wjesnjanosta Norbert Wolf (CDU) so wjeseli, „zo bu Bukečanska gmejna za projekt wuzwolena“. Wšako ma jón za konkretnu podpěru wjesneho ruma. Kaž zdźěli Zwjazk sakskich apotekarjow, je Budyski wokrjes po wšej Sakskej region z najmjenje lěkarnjemi. Jedna tajka zastaruje hač do 5 100 wobydlerjow. To je jasnje pod přerězkom Němskeje.

Nowy nawoda

póndźela, 03. septembera 2018 spisane wot:

Smječkecy (SN/JaW). Dom swj. Jana w Smječkecach, w kotrymž su duchownje zbrašeni zaměstnjeni, změje noweho nawodu. Wot 1. januara 2019 budźe to Marko Kliman. To wobkrući wón Serbskim Nowinam na kromje sobotneje swjatočnosće k 10lětnemu wobstaću Budyskeho wokrjesa w Budyšinje. Kliman, skutko­wacy tuchwilu w Budyskej chorowni we wotdźělu za hladanje nutřkowneje a urologiskeje kliniki, přewozmje zastojnstwo tuchwilneho nawody Smječkečanskeho domu Tadeja Šimana, kiž ma jeho do noweho dźěła zapokazać. Šiman budźe w nadawku nošerja Smječkečanskeje hladarnje zbrašenych Křesćansko-socialneho skutka (CSW) regionalnje a nadregionalnje fachowje dale skutkować.

Kaž Marko Kliman na naprašowanje našeho wječornika wobkrući, ma wón přichodnje wšitke štyri zarjadnišća CSW w Hornjej Łužicy w Smječkecach, Kamjencu, a Budyšinje jako regionalny nawo­da zastupować. „Wjeselu so na nowy nadawk. Tu móžu so hišće regionalnišo na dobro našeje dwurěčneje kón­činy zasadźeć“, rjekny wón SN. Zdobom Prawočan wobkrući, zo wostanje dale čestnohamtski wjesnjanosta Chróšćanskeje gmejny.

Socialny angažement sylnić

srjeda, 29. awgusta 2018 spisane wot:

Kubłanski projekt Europskeje unije zwjazuje łužiskich a pólskich seniorow. Woni wuměnjeja sej nazhonjenja na wše­lakich polach towaršnostneho žiwjenja. Serbscy zajimcy su witani.

Wostrowc (AK/SN). „Nazhonjenja a kompetency ludźi, staršich hač 55 lět, wobohaćeja našu towaršnosć a móža mjezu přesahujo skutkować,“ podšmórnje Birgit Fleischer. Wona je koordinatorka kubłan­skeho projekta Europskeje unije „Natwar kompetencneho teama 55+“ w němsko-pólskim pomjeznym rumje. Hižo wot februara 2017 w mjenowanym teamje seniorow z Němskeje a Pólskeje hromadźe wjedu. Na nim wobdźěleni su to­warstwa, skupiny, wjace­generaciske domy a wšelacy zajimcy. „Smy tež serbskim a wšitkim dalšim wobdźělnikam wotewrjeni. Woni móhli ze swojej rěču a kulturu přichod­ne seminary wobohaćić“, Birgit Fleischer potwjerdźa.

Štó měł wotmołwić?

pjatk, 24. awgusta 2018 spisane wot:
Kotre šansy maja ludźo z handikapom, sej turistiske drohoćinki wotkryć? Měnjach, zo je derje so z prašenjemi wobroćić mjez druhim na Budyske turistiske towarstwo. Wot jeho předsydy dóstach wotmołwy na prašenja z pokiwom, zo by snano měšćanske zarjadnistwo lěpši partner było. Ně, měnju, zo nic na kóždy pad. Wočakuju wotmołwy z kruha tych, kotřiž ­za turistow a domoródnych poskitki přihotuja. Z Kamjenskeho měšćanskeho zarjadnistwa dóstach pokiw na wotpowědne internetne strony. We Wojerecach zaso zdźěli mi sobudźěłaćerka turistiskeje informacije, zo njewě na prašenja wotmołwić. We Wojerecach dźě su wšelake zarjadnišća za turistiske poskitki zamołwite. To mje zadźiwa. Wšako maja tam turistisku informaciju, w kotrejž dyrbjeli nitki hromadu běžeć. Derje, zo je naměstny jednaćel zwjazka Łužiska jězorina pomhał – tež ze informacijemi nastupajo město Wojerecy. Milenka Rječcyna

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND