Trójce Emil na jednym dnju

pjatk, 23. awgusta 2019 spisane wot:

Kamjenc. Na porodnej staciji Kamjenskeje chorownje maltezow swj. Jana su so minjenu njedźelu třo hólcy narodźili, kotrymž dachu jich starši mjeno Emil. Staršej jednoho z nich bydlitaj w Nowoslicach, tamni w Steinje a Dürrröhrsdorfje. Zo na jednym dnju hnydom tři narodźene dźěći samsne předmjeno dóstanu, so w Kamjenskej chorowni hišće ženje stało njeje. Hižo štwórtk do toho bě so dalši mały Emil narodźił. Kaž chorownja zdźěli, mějachu tam lětsa hižo šěsć Emilow. Tak drje je wotwidźeć, zo budźe tele předmjeno lětsa w Kamjenskej chorowni mjez hólcami najwoblubowaniše.

Na dźeń wotewrjenych duri

Njebjelčicy. Wot měrca 2018 přetwarja předewzaće Suburban Seafood jedyn z chlěwow Njebjelčanskeje plahowarnje rancow na plahowarnju garnelow. Jutře přeproša tam na dźeń wotewrjenych duri. Wot 10 do 16 hodź. móža sej zajimcy wobhladać, kak chcedźa w bywšim chlěwje přichodnje garnele plahować.

Přepodadźa nasćěnowy wobraz

štwórtk, 22. awgusta 2019 spisane wot:

Chrósćicy (SN). Štóž ze Zejic do Chrósćic jědźe, je minjene dny zawěsće hižo nowu atrakciju wsy widźał, mjenujcy wulki nasćěnowy wobraz na Kralec statoku. Nimale tři tydźenje je Berlinski grafikar Šćěpan Hanuš na kromje Chrósćic dźěłał a wobraz „Serbske potajnosće“ stworił. Je to dobyćerski projekt krajneho wjesneho kuratorija we wobłuku wubědźowanja sakskeho ministerstwa za wobswět a ratarstwo „Ideje za wjesnu kónčinu“. Nastata twórba njewabi jenož wóčko, ale pohnuwa zdobom k rozmyslowanju wo hódnotach, žiwjenskim nastajenju a socialnych poćahach. Wobraz chcedźa jutře w 13 hodź. přepodać. Přitomni budu nimo Šćěpana Hanuša statny sekretar dr. Frank Pfeil, Chróšćanski wjesnjanosta Marko Kliman (CDU), jednaćel krajneho wjesneho kuratorija Peter Neunert a dalši hosćo. Tež zajimcy su wutrobnje witani.

Na čitanje a wodźenje

Wuhotuja dworowy swjedźeń

srjeda, 21. awgusta 2019 spisane wot:

Dubrjenk. Mjeztym wosmy raz wuhotuje Krječmarjec swójba w Dubrjenku dworowy swjedźeń, a to njedźelu, 25. awgusta. Wot 11 hodź. porjedźeja tam wobjed, k čemuž zaklinči dujerska hudźba kapały „Hochsteinmusikanten“. Wot 14 hodź. wubědźuja so jěcharjo w kałanju wěnca, w 16 hodź. přizamknje so napřemojězdźenje konjacych zapřahow. Nimo toho budu jězby z konjacymi zapřahami móžne, wot 15.30 hodź. poskića potom kofej a tykanc. Na wopytowarjow čakaja dale paslenje za dźěći, skakanski hród a samotwarjene awta typa Hot Rod.

Saněruja farsku bróžnju

Wochozy (AK/SN). Šwjelowu bróžnju we Wochozach nětko saněruja, zdźěli wjesny předstejićer Mario Weber. Ćěslojo z Dźěwina su bróžnju za Wochožanskim farskim domom wottwarili. W Dźěwinje nětko jednotliwe dźěle saněruja a po po­trjebje wuměnja. Na to chcedźa bróžnju zaso natwarić a za wšelake kulturne zarjadowanja a zetkanja wužiwać.

Do chroniki pohladać

wutora, 20. awgusta 2019 spisane wot:

Sprjejcy. Šesty raz wotměje so lětsa Dźeń Hornjeje Łužicy, z kotrymž spominaja na załoženje Hornjołužiskeho zwjazka šesćiměstow 21. awgusta 1346. W tymle wobłuku wotměje so jutře, srjedu, wosebite zarjadowanje w Sprjejcach (Spreewitz) w gmejnje Sprjewiny Doł a w tamnišim wosadnym domje. Wot 19 hodź. předstaja tam runje wušłej prěnjej zwjazkaj Sprjejčanskeje cyrkwinskeje chroniki a podadźa wuhlad na třeći zwjazk.

Spominaja na wosebitu žonu

Budyšin. „Nowe widy na dr. Marju Grólmusec“ rěka zarjadowanje štwórtk, 22. awgusta, wot 18 hodź. w Budyskim Serbskim muzeju. Tam chcedźa na wosebitu žonu spominać a so jeje žiwjenju a skutkowanju z nowymi widami zbližić. Tak wěnuja so prašenju, što bě Mari Grólmusec wažne, kotru rólu hraja jeje serbske korjenje a kotre poselstwo wona za dźensniši čas ma? Na zarjadowanje přeprošeja dźěłarniski zwjazk, město Budyšin, žónska iniciatiwa, Maćica Serbska, Domowina, Serbski institut a gmejna Radwor.

Kniha změje premjeru

póndźela, 19. awgusta 2019 spisane wot:
Budyšin. Składnostnje 400lětneho jubileja Michałskeje wosady je superintendent Jan Malink wudał knihu „St. Michael Bautzen. Kirche – Gemeinde – Dörfer“. Wona změje štwórtk, 22. awgusta, w 19.30 hodź. premjeru w Budyskej Michałskej cyrkwi. W knize wěnuja so wšelacy awtorojo twarskim stawiznam Bo­žeho domu, wuwiću wosady hač do přitomnosće a wosadnym wsam. Nowostka je w němskej rěči spisana, tola nimale wšudźe je serbskosć do stawiznow a přitomnosće wosady sobu zaplećena. Wozjewjene su awtobiografiske teksty serbskich wosadnych, kotřiž přestupichu k Ochranowskej bratrowskej wosadźe, kaž tež dopomnjenki kantora Jana Awgusta Kaplerja a Hodźijskeho fararja Jana Křižana na čas dźěćatstwa na serbskej wsy. Bohaće ilustrowane wudaće předstaja fararjow, kantorow a dalše wosobiny, kiž běchu z Michałskej wosadu zwjazane. Na knižnej premjerje wustupi skupina Consonare St. Michael. Hudźbnicy hraja spěwy a reje z Kraloweho huslerskeho spěwnika, kotryž je w Michałskej wosadźe nastał.

Kedźbu, nowačcy!

pjatk, 16. awgusta 2019 spisane wot:

Budyšin. Přijězd nowačkow do Budyskeho Serbskeho internata budźe njedźelu, 18. awgusta, wot 18 do 21 hodź.

Kołowokoło Łužicy

Hodźij. Póndźelu we 18 hodź. přednošuje dr. Gabriele Lang w Hodźijskim towarstwowym domje na temu „Kołowokoło Hornjeje Łužicy“.

Zwučuja za musical

štwórtk, 15. awgusta 2019 spisane wot:

Worklecy. Wšitcy sobuskutkowacy šulskeho musicala „Quo vadis – dokal dźeš?“ Worklečanskeje wyšeje šule „Michał Hórnik“ jutře, pjatk, 16. awgusta, wot 9.30 hodź. zaso zhromadnje zwu­čuja. Zamołwići proša wo połnoličbne wobdźělenje a wo dypkownosć.

Boršć so započnje

Kamjenc. Ze zhromadnym koncertom Kamjenskeho a Kolínskeho dujerskeho orchestra započnje so jutře w 19.30 hodź. na Kamjenskim torhošću lětuša Boršć. Po tym zahraje wot 22 hodź. kapa­ła Triple Trouble. Wulki wjeršk budźe pón­dźelu, 19. awgusta, w 13 hodź. wućah ně­hdźe tysac šulerkow a šulerjow w běłej drasće a z mnohimi kwětkami a chorhojemi z města na swje­dźe­nišćo. Dale změja přichodne dny wše­lake wubědźowanja, turněry, srjedu woblubowany wohnjostroj a wjele hudźby w swjedźenskich stanach. Wopytowarjo móža zastupny lisćik­ za cyły tydźeń za sy­dom eurow kupić abo dnjowe zastupne lisćiki wot jutřišeho hač do srjedy po 2,50 eurach resp. za přichodny štwórtk za dwaj euraj.

Pokazuja politiske plakaty

srjeda, 14. awgusta 2019 spisane wot:

Budyšin. Hišće hač do pjatka, 16. awgusta, je pod hesłom „Kedźbu, wuměłstwo“ w Zelenym róžku na Budyskej Serbskej hasy 8 wustajeńca z politiskimi plaka­tami Heidelbergskeho wuměłca Klausa Staecka widźeć. Staeck, wot lěta 2006 do 2015 prezident Berlinskeje akademije wuměłstwa, wozjewja wotsrjedź 1970­tych lět politiske satiriske plakatowe wuměłstwo. K zakónčenju přehladki budźe wuměłc zajutřišim, pjatk, wot 19 hodź. na městnje a swoje twórby signuje. Te chcedźa za dobry zaměr přesadźować.

Kedźbu, brigadnicy!

Budyšin. Spěwarki a spěwarjo chóra 1. serbskeje kulturneje brigady njech njeskom­dźa proby jutře, 15. awgusta, a pjatk, 16. awgusta, wot 9.30 hodź. w Budyskim SLA. Proby su wažne za dalše nastudo­wanje swětneho oratorija „Hrodźišćo“, kotryž změje 28. a 29. septembra w Chrósćicach prapremjeru.

Kedźbu, brigadnicy!

wutora, 13. awgusta 2019 spisane wot:
Budyšin. Spěwarki a spěwarjo chóra 1. serbskeje kulturneje brigady njech njeskom­dźa proby štwórtk, 15., a pjatk, 16. awgusta, wot 9.30 hodź. w Budyskim SLA. Proby su wažne za dalše nastudo­wanje swětneho oratorija „Hrodźišćo“, kotryž změje 28. a 29. septembra w Chrósćicach prapremjeru.

Spominaja na wopory

póndźela, 12. awgusta 2019 spisane wot:

Slepo. Z nutrnosću spomina Slepjanska ewangelska wosada jutře, ­wutoru, we 18.30 hodź. na wopory, kotrež su při nutřkoněmskej hranicy žiwjenje přisadźili. Přichodne tydźenje wotměja so w Slepom dalše zarjadowanja, wěnowace so 30. róčnicy měrliweje rewolucije.

Čitataj twórby Strittmattera

Ćisk. Na wječor žorta a rozmyslowanja z twórbami Erwina Strittmattera a jeho mandźelskeje Evy přeproša Kulturne towar­stwo Ćisk srjedu, 14. awgusta, w 19 hodź. na Ćišćanski statok. Z twórbow wobeju spisowaćelow čitataj Uwe Jordan a Majka Kowarjec.

Projekt w muzeju

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND