Trudla Malinkowa čita

wutora, 27. februara 2018 spisane wot:

Slepo. Hromadźe z Ludowym nakładnistwom Domowina přeproša Slepjanski Serbski kulturny centrum štwórtk, 1. měrca, w 16 hodź. na zarjadowanje z Budyšanku Trudlu Malinkowej. Awtorka čita ze swojeje knihi „Ufer der Hoffnung“. W njej pisa wo přičinach wupućowanja Serbow w 19. lětstotku, rysuje napinacu jězbu do Texasa, Awstralskeje a Kanady a wopisuje ćežki nowozapočatk w cuzbje. Zajimcy móža sej knihu na městnje kupić a sej ju wot Trudle Malinkoweje signować dać.

Pomhaja pomocnikam

Budyšin. Powšitkownowužitne socialne a karitatiwne towarstwa a organizacije, kotrež za swoje skutkowanje jězdźidło wužiwaja, móža so hač do kónca měrca na internetnej stronje www.wirhelfen­helfern.de přizjewić a dobropis w hódnoće 1 500 eurow za nakup bencina abo diesela dobyć. Akciju rjećaza tankownjow Esso podpěruje tohorunja Budyska wo­krjesna lutowarnja. Za požadanje trěbne su informacije wo towarstwje abo organizaciji, mjeno rozmołwneho partnera a přičina, čehodla měło towarstwo tankowanski dobropis dóstać.

Štomy wurězać nawuknyć

Pytaja přisydnikow

póndźela, 26. februara 2018 spisane wot:

Budyšin. Hišće lětsa wola w Sakskej nowych hłownych a pomocnych přisydnikow (Schöffen) za přisydniske a chłostanske sudnistwa za dobu wot 2019 do 2023. Wo tym informuje w nowinskej zdźělence město Budyšin. Wone zestaja k tomu lisćiny z namjetami kandidatow. Zajim­cy za tele čestnohamtske a zamołwite zastojnstwo njech so na měšćanskim za­rjad­nistwje přizjewja. Z přisydnikom móže so kóždy zajimc stać, kiž w Budy­šinje bydli, je spočatk doby znajmjeńša 25, ale młódši hač 70 lět, wobknježi němčinu a je tež strowotnje kmany čestnohamtsku poziciju wukonjeć.

Nowy mějićel sćežora

Přednošuje wo Brazilskej

pjatk, 23. februara 2018 spisane wot:

Chrósćicy. Wo swojim přebytku w bra­zilskim pralěsu, wo zetkanju z Indianami a dalšimi zajimawymi ludźimi rozprawja jutře, sobotu, w 19.45 hodź. Pětr Rab w Chróšćanskej putniskej hospodźe. Stajnje­ při sebi měješe Kukowčan swoju kame­ru, z kotrejž je fantastiske motiwy zapopadnył. Turistiska ekspedicija wjedźeše jeho něhdźe 3 000 km po Brazilskej.

Sceniske wodźenje po muzeju

Budyšin. Njedźelu, 25. februara, poskići Budyski Serbski muzej dalše rjane do­žiwjenje. W zwisku z wustajeńcu „Krabat – Muž – Mytos – Marka“ wotměja tam mjeztym třeće sceniske wodźenje po přehladce. Krabat, pisar a Čorny młynk chce­dźa hosći po wosebitej přehladce wo chorwatskim wyšku wodźić. Jako Kra­bata dožiwja zajimcy Wolfganga Krausa, jako pisarja genealogu Hansa-Jürgena Schrötera a jako Čorneho młynka Dietera Klimeka. Wodźenje započnje so w 15 hodź. a traje něhdźe hodźinu.

Rjad wuměłskich rozmołwow

Dźěłarnička wabiła

srjeda, 21. februara 2018 spisane wot:

Wojerecy (SN). Derje wopytana bě wčera popołdnju we Wojerowskim Zusowym kompjuterowym muzeju dźěłarnička „Kak twarju sej swójsku alarmowu připrawu“. Dźěći a młodostni w starobje 11 do 15 lět su tam pod fachowym nawodom wuknyli, kak hodźi so tajki system z jednorymi eletroniskimi twarskimi dźělemi instalować. Kóždy wobdźělnik zestaji sej za to swójske šaltowanje.

Dobry wothłós w knihowni

Budyšin (SN). Pjeć zajimcow bě so za­wčerawšim w Budyskej měšćanskej bibliotece na zawodnym kursu za digitalne wupožčowanje medijow wobdźěliło. Zajim na „łužiskej Onleihe“ přiběra. Karin Hahn, sobudźěłaćerka knihownje, kotraž něhdźe hodźinski kurs nawjeduje, praji, zo su wobdźělnicy skerje starši ludźo. „Poradźowanje je jara indiwidualne, dokelž wjetšina zajimcow nam hižo lěta swěru dźerži a naše datowe banki wužiwa“, Karin Hahn wuzběhny.

Rady na statok załožeja

„Historiske blido“ wotměli

wutora, 20. februara 2018 spisane wot:

Mnišonc (HG/SN). 20 zajimcow je njedawno w Mnišonskej Radnej pincy „Historiske blido“ Hornjohórčanskeho domizniskeho towarstwa wotměło. Mě­sačne zetkanja nawjeduje Frank Jünger z Hornjeje Hórki hižo wot lěta 1999. W srjedźišću minjeneho steješe mjez druhim ćahańca wokoło přizamknjenja Łužicy k Čěskej po Prěnjej a Druhej swětowej wójnje kaž tež załoženje Serbskeho se­minara na Małej Stronje w Praze. Přizamknychu so informacije dźěławosće Zwjazka přećelow Łužiskich Serbow w Čěskej a Słowakskej.

Hród w nowym wobsydstwje

Droždźij (SN). Po tragiskej smjerći ně­hdyšeho hrodoweho knjeza Droždźijskeho hrodu, swobodneho knjeza von Salza, w lěće 2013 stare murje poněčim zaso wožiwjeja. Nowa swójba (tři generacije) hród a park priwatnje wužiwa. Stare hró­dźe­ a pódlanske twarjenja chcedźa saněrować a potom jako ratarski zawod z konjemi wobhospodarjeć. Twarske dźěła budu znajmjeńša hač do klětušeho trać.

Młodźi slědźerjo prašani

Wotewru přehladku

pjatk, 16. februara 2018 spisane wot:

Budyšin. Fotowu přehladku „Heimat – Domizna“ Andreasa Varnhorna z Frankfurta nad Mohanom wotewru srjedu, 21. februara, we 18 hodź. w Budyskej Serbskej kulturnej informaciji. Budźe-li zajim jara wulki, zetkaja so wopytowarjo k wotewrjenju na žurli. Andreas Varnhorn je před 25 lětami Hornju Łužicu wopytał a wosebje katolskich Serbow při naj­wšelakorišich přiležnosćach, nałožkach, swjedźenjach atd. fotografował. Loni je jich znowa wopytał, wospjet na swojim aparaće zapopadnył, z nimi samo někotružkuli rozmołwu wjedł a so prašał, kak bě so jim mjeztym zešło. Wustajeńca w SKI a na chódbach Serbskeho domu skići zajimawy wid na nowše serbske stawizny. Wona je dwurěčna (němsko-serbska) a tuž tež němskim wopytowarjam jara zajimawa. Prěnjotnje za Dom při hłownej cyrkwi w Frankfurće koncipowanu su ju tam wot 1. decembra 2017 do 31. januara 2018 pokazali. Załožba za serbski lud je składnosć wužiła a přehladku do Łužicy skazała. Prezentaciju z fotami a tekstami pokazaja hač do 30. junija, a to wot póndźele do pjatka k wotewrjenskim časam Serbskeje kulturneje informacije wot 10 do 16.30 hodź.

Witaja nowonarodźene dźěći

štwórtk, 15. februara 2018 spisane wot:

Wojerecy. Wot spočatka lěta płaći we Wojerecach směrnica wo witanskim pjenjezu za nowonarodźene dźěći. Po njej wupłaća kóždemu dźěsću, kotrež je so po 1. juliju 2017 narodźiło, 250 eurow. Wuměnjenje je, zo bydli dźěćo w domjacnosći staršeju resp. zastaraćelow, kotřiž su znajmjeńša tři měsacy do poroda dźěsća we Wojerecach přizjewjeni, a zo su so přepytowanja U1 hač do U6 dospołnje a sčasom přewjedli. Trěbne formulary za to dóstanu starši we wobydlerskim běrowje na Dillingenskej abo na internetnej stronje Wojerec, rěka w zdźělence měšćanskeho zarjadnistwa.

Na słowjansku nóc

Lipsk. Słowjanska zymska nócna party wotměje so sobotu, 17. februara, wot 18.30 hodź. w Lipšćanskej kulturnej kofejowni „Knicklicht“ na Drježdźanskej dróze 79. Chór Slavia předstaji ruske, pólske a ukrainske ludowe pěsnje, kapała Kupazukow hraje serbsku rejwansku hudźbu, jej poboku je dalša pólska kapała. Wšitcy zajimcy su wutrobnje přeprošeni sobu rejwać, spěwać a so po słowjanskim wašnju zabawjeć. Organizatorojo wjesela so na bohate wobdźělenje.

Swinjorězanje a brunch

srjeda, 14. februara 2018 spisane wot:

Hórki. Štóž chce sej zaso raz słódne dobroty ze swinjorězanja popřeć, móže to sobotu, 17. februara, w Hórčanskim Młynkec hosćencu. Tam krupjane a całtowe kołbasy kaž tež połćik a wšo dalše předawaja. Nimo toho přeprošeja Młynkecy njedźelu, 18. februara, wot 12 hodź. na Walentinowy brunch.

Radźićeljo so zetkaja

Worklecy. Wohnjoškitne naprawy na wyšej šuli „Michał Hórnik“ budu jedna z temow posedźenja Worklečanskeje gmejnskeje rady jutře, štwórtk, w 19 hodź. w šuli. Dale zaběraja so z nowym hortowym twarjenjom a z naćiskom twarskeho plana za přemysłowu pře­strjeń Nowa Wjeska-zapad II. Posedźenje je zjawne, zajimcy su přeprošeni.

Sčasom na dźěłarničku přińć

Budyšin. W zwisku z dźěłarničku „Rjekojo z pjelsća“ sobotu, 17. februara, wot 10 do 18 hodź. skedźbnja Budyski Serbski muzej na to, zo je radźomne sčasom na dźěłarničku přińć, zo by chwile dosć było klanku dokónčić. Čim wjace časa za jeje wuhotowanje je, ćim lěpje.

Přidatne předstajenje

pjatk, 09. februara 2018 spisane wot:

Budyšin. Mnoho naprašowanjow dla je so Serbski ludowy ansambl rozsudźił, poskićić přidatne předstajenje swojeho wuspěšneho wječorneho ptačokwasneho programa „Po serbskich slědach“, a to njedźelu, 11. februara, w 19.30 hodź. na žurli SLA. Zastupne lisćiki dóstanu zajimcy při wječornej kasy. Předstajenja jutře w 16 a 19.30 hodź. kaž tež njedźelu w 16 hodź. su wupředate.

Kružk pisacych w hospodźe

Chrósćicy. Wosom čłonow wopřijmje Róžeńčanski kružk pisacych, kotřiž pod nawodom spisowaćela Bena Budarja ­prawidłownje swójske twórby pisaja. Lětsa kružk hižo swoje 55. narodniny swjeći a přeco hišće so z pjerow kreatiwne ideje wužórla. Hač do lěća ma samo nowa zběrka wuńć: „Zornjatka na puću“. ­Něštožkuli z tejele knihi budźe hižo ­słyšeć jutře, sobotu, w 19.45 hodź w Chróšćanskej putniskej hospodźe. Hobbyjowi poeća čitaja basnje a powědančka wo běhu lěta, zdźěla podpěrani wot ­młodeje generacije. Wo hudźbny přewod postara so čłonka kružka Marija Šołćina na gitarje.

Poskitk za prózdniny

Póstnicy w „Jednoće“

srjeda, 07. februara 2018 spisane wot:

Chrósćicy. Na póstniske zarjadowanje we wjacezaměrowej hali „Jednota“ přeprošeja Chróšćanscy młodostni a Smječkečanski Dom swjateho Jana wšitkich zbrašenych, jich přećelow a přiwuznych pjatk, 9. februara. Wot 18 hodź. chce diskotekar Frank wšěm noram z horcej hudźbu zapyrić. Organizatorojo wjesela so na bo­hate wobdźělenje.

Přednošuje wo Madźarskej

Budyšin. Do kotreho směra wuwiwa so Madźarska a kajki poměr ma kraj k Europskej uniji a k Němskej? Tajke a podobne prašenja steja w srjedźišću přednoška Daniela Hegedüsa jutře, štwórtk, we 18 hodź. w Budyskim Kamjentnym domje. Sakska krajna centrala za politiske kubłanje wječor zarjaduje. Daniel Hegedüs wuwučuje­ na Berlinskej Humboldtowej uniwersiće a so z madźarskej knježerstwowej politiku dokładnje zaběra.

Žony wulce swjeća

Njebjelčicy. Žonjace póstnicy Serbsko­pazličanskeho karnewaloweho towarstwa budu zajutřišim, 9. februara, wot 20 hodź. w Njebjelčanskej „Bjesadźe“. Program započnje­ so w 21 hodź. Wšitke žony, kotrež­ su hač do toho časa do „Bjesady“ přišli, dóstanu darmotnu škleńčku sekta.

nawěšk

nowostki LND