Wjesnu dróhu zawru

pjatk, 19. awgusta 2022 spisane wot:

Serbske Pazlicy. Twarskich dźěłow na nadróžnych šachtach dla budźe wjesna dróha po Serbskich Pazlicach dwaj dnjej dospołnje zawrjena. Kaž zdźěli Budyski krajnoradny zarjad stej za to wutora, 23., a srjeda, 24. awgust, předwidźanej. Wob­jězdka budźe woznamjenjena

Kemše z Dźěćacym a młodźinskim chórom

Smochćicy. Z Božej mšu zakónči Dźěćacy a młodźinski chór z Magdeburgskeho biskop­stwa njedźelu, 21. awgusta, w Smochčanskim kubłanišću swj. Bena swój lětuši spěwarski tydźeń. 30 młodych spěwarjow a spěwarkow wobrubja w 10 hodź. kemše w tamnišej cyrkwičce, kotrež sćelak MDR Kultur live wusyła.

Serbske pěsnje na Čornoboze

Čornobóh. Chór Budyšin koncertuje njedźelu, 21. awgusta, znowa při hosćencu na Čornoboze. Program budźe pisana měšeńca serbskich, słowjanskich, němskich a dalšich mjezynarodnych pěsnjow, připowědźi předsyda spěwneho cyłka Benjamin Wirth. Koncert wotměje so we wobłuku lětušeho Dnja Hornjeje Łužicy, započatk je w 14 hodź.

Na zelowu njedźelu do klóštra

štwórtk, 18. awgusta 2022 spisane wot:

Pančicy-Kukow. Křesćansko-socialny kubłanski (CSB) přeprošuje zhromadnje z aba­tisu Pančičansko-Kukowskeho klóštra Marijina hwězda Gabrielu Hesse a dalšimi sotrami konwenta njedźelu, 21. awgusta, na zelowu njedźelu do tamnišeho Zežiwjenskeho a zeloweho centruma. Wot 13 hodź. změja na dworje zelowe a přirodowe wiki z 25 regionalnymi wikowarjemi a producentami. Zdobom po­dawaja zelowi profijojo nastorki a poradźuja zajimcow w plahowanju, předźěłowanju a składowanju wšěch móžnych zelow. W 14:30 hodź. swjeća zelowy nyšpor ze žohnowanjom zelowych kwěćelow.

Chcedźa knihi sušić

póndźela, 15. awgusta 2022 spisane wot:

Budyšin. Budyski měšćanski archiw je dóstał za lěće 2022 a 2023 spěchowanske srědki we wysokosći 39 500 eurow. Z pjenjezami móža tam nětko hódnotne historiske dokumenty wurjedźić a fachowje zapakować dać. Wulki podźěl na cyłkownym financowanju projekta ma z 15 000 eurami Sakski krajny zarjad za zachowanje wobstatkow. Dalše 24 500 eurow pochadźeja ze srědkow zamołwiteho zwjazkoweho knježerstwa za kulturu a medije z wosebitych pjenjez Zwjazka za zachowanje pisomneho kulturneho namrěwstwa. Město Budyšin so tohorunja na financowanju projekta wobdźěli a přida 9 500 eurow. Jako prěnje chcedźa 248 z dohromady 256 knihow komornistwa wurjedźić a zapakować. Přičina naprawy je, zo su mnohe historiske dokumenty Budyskeho měšćanskeho archiwa zdźěla mazane a mokre, a zwjetša njejsu wotpowědnje žadanjam zapakowane.

Na prózdninski campus

Informuja wo projekće

pjatk, 12. awgusta 2022 spisane wot:

Konjecy. Dalše zjawne informaciske zarjadowanje wo Němskim centrumje za astrofyziku (DZA) wotměje so wutoru, 16. awgusta, wot 17.30 hodź. při Konječanskim towarstwowym domje. Tam chcedźa fachowcy ze zajimowanymi wobydlerjemi zhromadnje grilować, jim mjez druhim wuslědki proboweho točenja na kromje Konjec rozłožić a na pra­šenja wopytowarjow wotmołwjeć. Kónc septembra Zwjazk wo projekće rozsudźi.

Swjeća ekumenisku namšu

Zły Komorow. Dźěłowa skupina Serbska namša kaž tež Złokomorowska ewangelska a katolska wosada přeprošuja na serbsko-němsku ekumenisku namšu, kotraž budźe njedźelu, 14. awgusta, w 14 hodź. w Złokomorowskej Serbskej cyrkwi. Liturgiski nawod změjetaj fararjej Manfred Schwarz a Udo Jäckel. Čitaja Günter Pawliš, dr. Hartmut Leipner a dr. Madlena Norbergowa. Po namši budźe zhromadny kofej ze spěwnej skupinu Přěza.

Na dworowy swjedźeń

Přednošuje wo putnikowanju

štwórtk, 11. awgusta 2022 spisane wot:

Chrósćicy. „Putnikować za klimowu sprawnosć – wot Pólskeje hač do Glasgowa“ rěka hesło němskorěčneho přednoška jutře, pjatk, po wječornych kemšach w Chróšćanskim Hórnikowym domje. Referent je Wolfgang Eber z badensko-württembergskeho Heidenheima. Wón je wjac hač tysac kilometrow dołhi puć pěši sobu běžał a bě tež do organizacije sobu zapřijaty. Započatk je w 19.45 hodź.

Wodźa po wustajeńcy

Budyšin. Štóž njeje dotal hišće wustajeńcu „Party w 21. lětstotku“ w Budyskim Serbskim muzeju widźał, móže to na přikład njedźelu, 14. awgusta, nachwatać. Tón dźeń poskića dwě wodźeni po přehladce, mjenujcy w 14 hodź. serbsce a w 15 hodź. němsce. Wustajeńca je hišće hač do 4. septembra přistupna.

W prózdninach do muzeja

srjeda, 10. awgusta 2022 spisane wot:

Budyšin. Budyski Serbski muzej ma w prózdninach wjacore poskitki za šulerjow a šulerki přihotowane. Jutře, štwórtk, zaběraja so dźěći wot wosom lět wot 10 do 12 hodź. z woznamom kwětkow a mustrow. Wobhladaja sej wušiwanki narodnych drastow, pomolowane meble, keramiku a druhe eksponaty z typiskimi debjenkami. Tež někotre serbske pěsnje a basnje wo kwětkach rěča. Zhromadnje sej zmysł a pozadk kwětkow a ornamentow wuwědo­mja a do knižki zběraja. Přinošk płaći 5,50 eurow. Zajimcy njech přizjewja so pod telefonowym čisłom 03591/2708700 abo e-mejlnje pod adresu .

PoŠtyrjoch spěwaja w barje

Budyšin. Rjany hudźbny wječor dožiwić a sej k tomu słódnu kapku zesłodźeć dać móža zajimcy zajutřišim, 12. awgusta, w Budyskej barje „Sundowner“. Wot 20 hodź. zaspěwa tam spěwna skupina PoŠtyrjoch wuběr swojich znatych acapella-titlow. Jako hosći přeprosyli su sej dujersku skupinu „Tutn und blasn“. Wšitcy su wutrobnje witani.

Darmotnje do prazwěrjenca

wutora, 09. awgusta 2022 spisane wot:
Budyšin. Składnostnje 30lětneho wobstaća Budyskeje wobdźělenskeje a wobhospodarjenskeje towaršnosće (BBB) wulosuja kóždy měsac atraktiwne myta. W awgusće wulosuja 30 swójbnych zastupnych lisćikow do Małowjelkowskeho prazwěrjenca. Na wulosowanju wobdźělić móža so zajimcy hač do kónca měsaca z mejlku pod adresu . Hač dosrjedź přichodneho měsaca dobyćerjow zwěsća a jich na to pisomnje informuja.

Na rozmołwu do bary

póndźela, 08. awgusta 2022 spisane wot:
Budyšin. Iniciatiwa „Budyšin zhromadnje“ přeprošuje na přichodnych štyrjoch wutorach stajnje wot 19 hodź. na wosebite rozmołwne koło do bary „Sundowner“ na zahrodźe Serbskeho ludoweho ansambla. Tam chcedźa so wo tym rozmołwjeć, što městu najbóle tyje, što je zesylnja a čehodla měli wobydlerjo tu wostać. Hłownje dźe wo to, so wo zhromadnosći w měsće rozmołwjeć, rěka w přeprošenju organizatorow. Skupinu „Budyšin zhromadnje“ su w decembru 2021 jako reakciju na zdźěla namócne koronowe protesty załožili. Po prěnim zetkanju ­jutře, 9. awgusta, budu dalše zetkanja 16., 23. a 30 awgusta. Na nje su wšitcy zajimcy wutrobnje witani.

Na wjesny swjedźeń

pjatk, 05. awgusta 2022 spisane wot:

Sernjany. Z natočenjom piwa a z wubědźowanjom wohnjowych woborow započnje so dźensa wjesny swjedźeń w Sernjanach. Wot 21.30 hodź. budźe kino při Klóšterskej wodźe. Jutře wot 14 hodź. přizamknje so soccerowy turněr. Wot 21 hodź. budu reje pod hołym njebjom z kapału „Die Wehder“. Njedźelu zahudźa Chróšćanscy muzikanća k rańšemu piwku. W 14.30 hodź. slěduje swójbne popołdnjo ze sokolnistwom Winde a ze zabawu za wulkich a małych.

Filmy we wowčerni

Stróža. Druhi raz přewjedu na dworje zarjadnistwa biosferoweho rezerwata Hornjołužiska hola a haty w Stróži filmowe wječory we wowčerni. Dźensa wot 20 hodź. widźa wopytowarjo film „Contra“. Dale pokazaja „Die Wiese – Ein Paradies nebenan“ (12.8., 20 hodź.), „Willi und die Wunderkröte“ (19.8., 18 hodź.) a „Das Pubertier“ (26.8., 20 hodź.)

Dróhu bórze ponowja

srjeda, 03. awgusta 2022 spisane wot:

Róžant. Po wšěm zdaću wot 15. do 26. awgusta ponowja statnu dróhu S 92 mjez Róžantom a Smjerdźacej. Puć dóstanje nowu asfaltowu worštu. Kaž krajnoradny zarjad zdźěli, budźe dróha za to dospołnje zawrjena. Wobjězdka powjedźe do wobeju směrow po S 97 a K 9232.

Techno při skale

Miłoćicy. Pjatk, 5. awgusta, zahaji towarstwo Meta Solis swój lětuši festiwal samsneho mjena při Miłočanskej skale. Mjez druhim zahudźi Paul Geigerzähler, elektronisku hudźbu prezentuja na přikład Ida Bux, Knytl, STOI a Ignomus. Zastup wučinja minimalnje 5 eurow.

Serbska debata

nowostki LND